Probirbio 12 - Pangasinan Meaning-Based Bible(MBBPAN83)

1Say toon pinabli toy pakaamta labay ton naamtaay kalilingo to, balet say toon makulang-kulang bobosulen toy panametek.

2Pakaliliketan na Katawan iray totoon matonung, balet sisintinsiaan ton nadusa iray mamplaplanoy kaogsan.

3Say kaogsan mangiiter na kaatapan ed too, balet maligen so bilay na toon matonung.

4Say maung ya asawan bii pakagagayagaan tan ikikinon na asawa to. Balet say bii a mangiiter na kababaingan ed asawa to et singa kanser ed saray pokel to.

5Matwa so gawaen ed sika na saray totoon maptek; pamalikdo labat so labay a gawaen ed sika na saray totoon maoges.

6Makapatey iray salita na totoon maoges, balet makapangyagel iray salita na totoon matonung.

7Nadederal iray totoon maoges tan anggapoy ititilak dan kabyangay boleg da, balet mansiansia ray pamilya da ray totoon matonung.

8No makabat ka nadayew ka, balet no makulang-kulang ka nabalaw ka.

9Say toon abebay kipapasen a walay anapay bilay et maung ni nen say toon konkonwarin matalonggaring balet eges toy narasan.

10Say toon matonung kokomponien to ray ayayep to, balet saray totoon maoges maruksa ed saray ayayep da.

11Say makolin dumaralus daakan so kakanen to, balet kinaambagelan so pandarak na panaon ed andi-kakanaan iran pamaakaran.

12Say pilalek na saray totoon maoges et say panggaway kaogsan ed katoowan, balet malet so inkiletneg da ray totoon matonung.

13Say toon maoges naeerel ed saray dilin salita to, balet say toon matonung makalolokpus ed gunigon.

14Saray salita tan gawgawa na too so pakatumangan to; say manepeg ed sikato so nagamuran to.

15Saray totoon makulang-kulang abaloan dan maptek lawas so gagawaen da. Saray makabat a totoo onderengel irad simbawa.

16No makapasnuk so makulang-kulang a too tampol ya ipapatnag to, balet say toon makatalus palalabasen toy panamabaing.

17No ibagam so katwaan, nagawa so katonungan, balet no saray tila, mansusumpal ira ed pakapikewet na katonungan.

18Saray salitan andi-nunotan singa ra ispadan makasugat, balet makapaabig iray salitan napnoy kakabatan.

19Antikey so bilay na tila, balet mansiansiad anggad angga so katwaan.

20Panamalikdo so walad kanunotan da ray manggegetman manggaway kaogsan, balet liket so nagamuran da ray manggagaway kamaungan.

21Anggapoy makapoy a nagagawad saray totoon matonung, balet natatabunan na gunigon iray totoon maoges.

22Kabosul na Katawan iray matila, balet maliket ed saray matoor ed salita ra.

23Saray totoon makabat ag to ipanpanta a walay amta to, balet say makulang-kulang ibabawag toy inkakulang-kulang to.

24Say toon makoli nawalaan na pakayari; say toon mangiras magmaliw ya aripen.

25Say kapagaan napaandi toy liket mo, balet saray marakep a salita paliketen da ka.

26Say toon matonung iwawanwan toy kaaro to, balet say dalan da ray totoon maoges ibabalang to ra.

27Say mangiras a too ag to nagamuray gegemtan to, balet say toon makoli makagamur na kayamanan iran ankabli.

28Say katonungan so dalan a mamaarap ed bilay; say kaogsan so dalan a mamaarap ed patey.