Saray Bilang 7 - Pangasinan Meaning-Based Bible(MBBPAN83)

Saray Bagat da ray Pangulo

1Diad samay agew ya asumpal nen Moises ya inlira imay Tuldan Ayamay Katawan, nilanaan toy larak tan insaklang to so Tulda tan amin ya kagawaan to; insaklang to met so altar tan amin a kagawaan to.

2Insan saray pangulo da ray boleg a sikaray pangulo met na saray tribu na Israel tan makaoley irad samay impanbilang ed saray totoo,

3angyakar iray bagat da ed Katawan: anemiran kariton tan labinduan baka, sakey a kariton so inter na kapag duaran pangulo tan sakey a baka so inter na kapag sakey. Kayari ran inyapay ira yan bagat da,

4say Katawan kuantod kinen Moises,

5“Awat mo ra yan rigalo, ta ikana ra ed kimey ed Tulda; iter mo rad saray Levita onung ed saray kimey a gawaen da.”

6Kanyan inter nen Moises ira may kariton tan saramay baka ed saray Levita.

7Inter tod saray kabyangay boleg nen Gerson so duaran kariton tan apatiran baka;

8inter tod saray kabyangay boleg nen Merari so apatiran kariton tan waloran baka. Si Itamar a lakin anak nen Aaron so mangipangulo ed amin a kimey da.

9Balet ag to initdan na kariton odino baka iray kabyangay boleg nen Coat, ta nepeg dan sakbaten iray masanton bengatla ya aasikasoen da.

10Saramay pangulo et angyakar met iray bagat da ya onkanad pangisaklang na samay altar. Nen akaparaan la ran mangyapay ed altar na saramay rigalo ra,

11say Katawan kuantod kinen Moises, “Ibagam ed sikara a diad loob na labinduan agew, sakey ed sikara kapag sakey ya agew so mangyapay na saray rigalo ton para pangisaklang na altar.”

12-83Inyaapay da ray bagat da onung na onggendan:

Diad ononan agew, si Naason a lakin anak nen Aminadab, tan pangulo na tribu nen Juda

Diad kumadwan agew, si Natanel a lakin anak nen Zuar, tan pangulo na tribu nen Isacar

Diad kumatlon agew, si Eliab a lakin anak nen Helon, tan pangulo na tribu nen Zabulon

Diad kumapat ya agew, si Elizur a lakin anak nen Sedeur, tan pangulo na tribu nen Ruben

Diad kumaliman agew, si Selumiel a lakin anak nen Zurisadai, tan pangulo na tribu nen Simeon

Diad kumanem ya agew, si Eliasaf a lakin anak nen Duel, tan pangulo na tribu nen Gad

Diad kumapiton agew, si Elisama a lakin anak nen Amihud, tan pangulo na tribu nen Efraim

Diad kumawalon agew, si Gamaliel a lakin anak nen Pedazur, tan pangulo na tribu nen Manases

Diad kumasiam agew, si Abidan a lakin anak nen Gideoni tan pangulo na tribu nen Benjamin

Diad kumasamplon agew, si Ahiezer a lakin anak nen Amisadai, tan pangulo na tribu nen Dan

Diad kumalabinsakey agew, si Pagiel a lakin anak nen Ocran, tan pangulo na tribu nen Aser

Diad kumalabinduan agew, si Ahira a lakin anak nen Enan, tan pangulo na tribu nen Neftali.

Nampapara so bagat ya inawit na balang sakey ed sikara: sakey a pilak a yaung a mambelat na sakey tan kapalduan kilo tan sakey a pilak a palanggana a mambelat na kulang-kulang a sakey kilo, onung na panagsimbang ed santuario tan napno ra yan dua na arinan inkames ed larak a para bagat a trigo; sakey a balituk a platito a mambelat na apatiran onsa tan napno na insinso; sakey a kilaw a bakan kalakyan, sakey a karniron kalakyan, tan sakey taon a kordiron para bagat a popoolan; sakey a kanding ya ibagat a para kasalanan; tan duaran bakan kalakyan, limaran karniron kalakyan, limaran kanding, tan limaran sakey taon a kordiro ya ibagat a para kareenan.

84-88Say karakel na amin a bagat ya inyakar na saray labinduan pangulo a para pangisaklang na altar et say onggendan:

–labinduan pilak a yaung tan labinduan pilak a palanggana a mambelat iran amin na duamplo tan piton kilo

–labinduan balituk a platito a mambelat iran amin na masoluk a sakey kilo tan napno na insinso

–labinduan bakan kalakyan, labinduan karniron kalakyan tan labinduan sakey taon a kordiro, tan saray bagat a trigo a katekep da, para bagat a popoolan

–labinduan kanding ya ibagat a para kasalanan

–duamplo tan apat a bakan kalakyan, anemaplon karniron kalakyan, anemaplon kanding, anemaplon sakey taon a kordiro ya ibagat para kareenan.

89Nen linmoob ed Tulda si Moises ta mitongtong ed Katawan, nadngel toy Katawan a misasalitad sikato manlapud tagey na sakub na Kaban na Sipanan, diad nanleetan na duaran kirubin.