Josue 22 - Pangasinan Meaning-Based Bible(MBBPAN83)

Pinasempet nen Josue iray Tribu ed Bokig na Jordan

1Insan impantitipon nen Josue iray totood saray tribu di Ruben, Gad, tan kapalduay Manases.

2Inkuantod sikara, “Sinumpal yo ray amin ya ingganggan ed sikayo nen Moises ya aripen na Katawan tan inonur yo ray amin a ganggan ko.

3Nanlapud la nen saman ya anggad natan ag yon balut ikakaindan iray kapara yon Israelita. Pampepelengan yon oonuren iray ganggan na Katawan a Dios yo.

4Onung na insipan na Katawan a Dios yo initdan to na kareenan iray kapara yon Israelita. Sempet kayo natan sirin ed dalin a kayaryan yo, say dalin ed bokig na Jordan ya inter ed sikayo nen Moises ya aripen na Katawan.

5Pampelengan yon onuren so ganggan ya inter ed sikayo nen Moises: aro yoy Katawan a Dios yo, onur yoy linawa to, sumpal yo ray ganggan to, nepeg a matoor kayo lawas ed sikato, tan lingkuran yo ed intiron puso tan kamarerwa yo.”

6-8Pinasempet ira nen Josue kayari to ran binindisionan tan binilin: “Mayamyaman kayon onsempet; amayamay iray ayayep, pilak, balituk, gansa, balatyang tan kawes yo. Pinabang yo ray katribuwan yo na saray asamsam yod saray kalaban yo.” Insan la ra sinmempet.

Si Moises inter to so dalin a walad bokig na Jordan ed kapalduay tribu nen Manases, balet si Josue inter tod kapaldua na sayan tribu tan diad saray arum a tribu so dalin a walad sagur na Jordan.

9Kanyan sinmempet la ra may totood tribu di Ruben, Gad, tan say kapalduay Manases. Tinaynan da ra may arum a totood Israel diad Silo ed dalin na Canaan, ta onsempet la rad dilin dalin da, say dalin ed Galaad, a sikatoy inala ra onung na ingganggan ed sikara na Katawan diad panamegley nen Moises.

Say Altar ed gilig na Jordan

10Nen saray totood tribu di Ruben, Gad, tan kapalduay Manases et akasabi ra ed Gelilot, a sakop ni na sagur na Jordan, amaalagey ira na balbaleg ya altar diad gilig na ilog.

11Nibagad saray arum a totood Israel, “Dengel kayo! Saray totood tribu di Ruben, Gad, tan say kapaldua na Manases et angipaalagey ira na altar diad Gelilot, diad kawalaan tayon dapag na Jordan!”

12Nen nadngelan ya na saray totood Israel, nantitipon iran amin ed Silo ta mibakal irad saray tribun walad bokig.

13Insan saray totood Israel imbaki rad saray totood tribu di Ruben, Gad, tan say kapalduay Manases diad dalin na Galaad si Finees a lakin anak nen Eleazar a pari.

14Akilad kinen Finees iray samploran manonan lalaki, sakey so manlapud kapag tribu ed saray tribun walad sagur tan balang sakey ed sikara so pangulo na sakey a pamilya ed saray boleg.

15Sinmabi ra ed dalin na Galaad, diad saray totoo na tribu di Ruben, Gad, tan say kapalduay Manases.

16Insan insalitaan day amin a totoo na Katawan ya inkuanda, “Akin et ginawa yo yan kaogsan a sumpad Dios na Israel? Sinumlang yoy Katawan diad impamaalagey yod sayan altar a para sikayon dili! Ag yo la oonuren so Katawan!

17Ag yo ta nanunotan imay kasalanan tayo nen wala tayod Peor, nen say Katawan et dinusa to na salot iray dilin totoo to? Maniirap itayo ni lapud saman a kasalanan tayo. Kulang ta ni man a kasalanan tayo?

18Ag yo la labay ya onuren natan? No onsumlang kayo natan ed Katawan, pampasnukan to ray Israelita ed anggan arapen a panaon.

19Natan sirin, no aliwan manepeg so dalin yo a pangigalangan ed Katawan, laka yod dalin na Katawan a kawalaan na Tulda to. Mangala kayoy parti na dalin mi. Balet ag kayo onsusumlang ed Katawan o pagmamaliwen yo kamin mananumpa diad pamaalagey yoy altar ya onarum ed altar na Katawan a Dios tayo.

20Ag yo ta nanunotan imay ag impangonur nen Acan a lakin anak nen Zera ed ganggan a nipaakar ed saray bengatlan nepeg a deralen, et adusa so intiron totood Israel? Aliwan si Acan labat so inatey lapud samay kasalanan to.”

21Saray totood tribu di Ruben, Gad, tan say kapalduay Manases et inmebat irad saramay pangulo da ray pamilya ed saray tribun walad sagur:

22“Say Makapanyari et say Dios! Sikato so Katawan! Say Makapanyari et say Dios! Sikato so Katawan! Amta to no akin et ginawa mi yan altar, tan labay mi met a naamtaan yo no akin! No sinumpa mi so Katawan tan inekal miy pananisia mid sikato, patey yo kami la natan.

23No sinumpa miy Katawan ta nanggawa kamiy altar min dili a pampoolan mid saray bagat odino ikana min pangisaklangan na saray bagat a trigo odino saray bagat a para kareenan, sikato lan dili so manusad sikami.

24Andi, ginawa mi yan altar lapud antakot kami ta ag la pigan saray kabyangay boleg yod arapen a panaon et ibaga rad saray kabyangay boleg mi, ‘Antoy pibabali yo ed Katawan a Dios na Israel?

25Impagmaliw ton ketegan tayo so Jordan, sikami tan sikayo ran totoo na Ruben tan Gad. Anggapoy pibabali yod Katawan.’ Diad ontan saray kabyangay boleg yo et nayarin patondaen dan mangigalang ed Katawan iray kabyangay boleg mi.

26Kanyan ginawa mi yan altar, aliwan pampoolan odino pangisaklangan mid saray bagat,

27no ag ingen sikatoy sakey a tanda a para saray totoo mi tan saray totoo yo, tan ontan met a para saray kailalakan ya ontombuk ed sikatayo, tanda a talagan mangigagalang kamid Katawan diad arapan na masanton Tulda to diad panamegley na saray bagat min popoolan, saray bagat a para kareenan tan arum ni ran bagat. Sikato sirin so pamasakbay ed saray kabyangay boleg yo ya ag da ibagan saray kabyangay boleg mi et anggapoy pibabali rad Katawan.

28Ninunot mi a no onyay nagawa, saray kabyangay boleg mi et nayarian dan ikuan, ‘Nengneng yo! Saray lalaki mi et nanggawa ray altar a singa altar na Katawan. Sayan altar et aliwan pangisaklangan na saray bagat a popoolan odino arum a bagat, no ag ingen sikatoy sakey a tanda para saray totoo mi tan saray totoo yo.’

29Anggapon balut so getma min onsumpad Katawan odino ontonda kamin ontombuk ed sikato diad panggawa miy sakey ya altar a pangisaklangan mi na saray bagat a para kareenan odino saray bagat a trigo odino arum ni ran bagat. Ag mi kaduaan imay altar a walad arap na Tuldan Ayaman to.”

30Si Finees a pari tan saramay akilad sikaton samploran manonan lalaki ed saray totood Israel, saray pangulo da ray pamilya na saray tribun walad sagur et nadngel da may imbaga na saray totood saray tribu di Ruben, Gad, tan say kapalduay na Manases, kanyan aliketan ira.

31Si Finees a lakin anak nen Eleazar a pari kuantod sikara, “Natan amta mi a kaiba tayo so Katawan. Ag kayo sinmumpad sikato, kanyan inyagel yod pananusay Katawan iray totood Israel.”

32Insan si Finees tan saramay pangulo tinaynan da ra may totoo na Ruben tan Gad diad dalin na Galaad tan pinmawil la rad Canaan, diad saray totood Israel, tan insalaysay dad sikara so agawa.

33Aliketan iray Israelita tan inggalang day Dios. Ag da la nantotongtongan so iyakar dan mibakal pian naderal day dalin a panaayaman na saray totoo na Ruben tan Gad.

34Inkuan na saray totoo na Ruben tan Gad, “Sayan altar et sakey a tasi ed sikatayo a say Katawan et Dios.” Kanyan inngaran da may altar na “Tasi.”