Josue 23 - Pangasinan Meaning-Based Bible(MBBPAN83)

Say Kaonuran a Paliwawa nen Josue

1Kalabas na abayag a panaon kasumpal to ya, impanari na Katawan so kareenan ed dalin na Israel. Masikesiken lad saman si Josue,

2kanyan tinawag toy intiron Israel, saray mamatakken, saray pangulo, saray huis, tan saray opisyal na saray totoo, tan kuanto, “Masikesiken ak la.

3Anengneng yo ray amin a ginagawa na Katawan a Dios yo ed amin da ra yan bansa lapud sikayo. Say Katawan a Dios so mibabakal para sikayo.

4Impabetang ko lad saray tribu yo so dalin na saray akeraan nin bansa; tan amin da ray bansan dinadakep ko la, manlapud Ilog na Jordan diad bokig ya anggad Dayat na Mediteraneo diad sagur.

5Say Katawan a Dios yo et pabatiken to ra legan yon lolooban iray dalin da. Nakayaryan yoy dalin da onung na insipan ed sikayo na Katawan a Dios yo.

6Kanyan pampelegan yon onuren tan sumpalen iray amin a nisulat ed libro na Ganggan nen Moises. Ag yo papaolyan so anggan anton parti na ganggan,

7et ag kayod satan milimug-limug ed saray akeraan ed sarayan totoo a manaayam ed kawalaan yo, o salitaen yoy kangaranan da ray diriyos da, o ikana yo ray kangaranan da diad pansamba yo, o galangen yo ray diriyos da, odino ondadakmomo kayod sikara.

8Ingen, nepeg a mansiansia kayon matoor ed Katawan, a singa ginawa yo la nen saman ya anggad natan.

9Pinataynan na Katawan iray totood ankakabaleg tan makapanyarin bansa legan na pankukurang yo, et anggapoy akayarin milaban ed sikayo.

10Anggan siopad sikayo nayarian ton pabatiken so sanlibon lalaki, ta mibabakal a para sikayo so Katawan a Dios yo, onung na insipan tod sikayo.

11Pampelengan yo sirin ya aroen so Katawan a Dios yo.

12No ipolisay yo so Katawan tan migampi kayod saray akeraan nin bansa tan miasawaan kayod sikara,

13andiduaruwan ag la ra pabatiken na Katawan a Dios yo legan yon lolooban iray dalin da. Ingen, magmaliw iran singa patit o kalut ed sikayo odino singa ra ansakit a bakbak ed beneg yo odino sabit ed mata yo. Et mansiansia yan anggad anggapoy nakeraan ed sikayo ed sayan maung a dalin ya inter ed sikayo na Katawan a Dios yo.

14“Magano ak lan ontaynan ed sayan mundo. Amta na balang sakey ed sikayo diad puso tan kamarerwa to a say Katawan a Dios yo et inter tod sikayoy amin iran maabig a bengatla ya insipan to. Asumpal ya amin iray insipan to; anggapoy ag agawa.

15Balet no panoy impanumpal tod amin ya insipan tod sikayo, ontan met so gawaen tod amin ya impasakbay tod sikayo.

16No ag yo sumpaley impisipanan na Katawan a Dios yo onung na ganggan ton sumpalen yo, tan manlingkur tan mangigalang kayod arum a diriyos, dusaen to kayod pasnuk to, et ag mabayag anggapoy nakeraan ed sikayo diad sayan maung a dalin ya inter tod sikayo.”