Habacuc 3 - Pangasinan Meaning-Based Bible(MBBPAN83)

Say Pikakasi nen Habacuc

1Sikato yay pikakasi nen propita Habacuc:

2O Katawan, nadngelan ko so ginagawam,

et mapalaloy pankelaw ko.

Diad sayan panaon mi gawam pa natan

ira may makapakelaw a ginagawam nen saman.

Mangasi ka pa, anggan mamapasnuk ka.

3Onsasabi lamet a manlapud Edom so Dios;

onsasabin manlapud kapokdulan na Paran so masanton Dios.

Akobutan na kagalangan to so katawenan,

tan napno na dayew to so sankamundoan.

4Onsasabin maliwliwawa a singa kirmat;

mankikidyam ed lima to so silew,

a diay akaiyamutan na pakayari to.

5Papaonaen tod arap to so salot

tan gangganen ton ontombuk ed sikato so patey.

6No sikatoy ontonda, nayegyeg so mundo;

diad ilinggis to onggiwgiw iray bansa.

Abuybuyak iray andi-anggaan a kapalandeyan;

linmereg iray ag manganggan kapokdulan,

saray kapokdulan a nanaakaran to ra nen saman.

7Anengneng kon antakot iray totood Cusan

tan manggiwgiw iray totood Madian.

8Saray ilog so amapasnuk ed sika, Katawan?

Say dayat so amapetang na olom?

Linmogan kad tapew na kaloreman;

karwahim so lorem ya ipapalir na bagyo,

nen inyakar moy pananalo ed saray totoom.

9Imparaan mon ikana so panam;

akaparaan kan mangibolus na balay panam.

Papalduaen na kirmat mo so mundo.

10Nen anengneng ka na kapalandeyan ginmiwgiw ira;

naibung so danum manlapud saray tawen.

Inmungol iray danum ed dalem na dalin,

tan binmabaleg iray daluyon da.

11Lapud kidyam na maples iran panam

tan say siayap na makasileng a pikam,

nantanyareg so agew tan say bulan.

12Sipapasnuk kan binmeltang ed mundo;

diad gaway sanuk mo ginagatinan mo ray bansa.

13Pinmaway kan mangilaban ed saray totoom,

tan mangiliktar ed pinilim ya ari.

Kinabil moy pangulo da ray totoon maoges

tan sigput mon dineral iray totoo to.

14Tinoruk na saray panam so pangulo da ray sondalo to,

nen sinmabi ran singa bagyo ya angikayat ed sikami,

malikeliket iran singa saray totoon maamut a mamapairap ed saray mairap-bilay.

15Impagatin-gatinan mod saray kabayom so dayat,

et binmora-bora so mabiskeg a danum.

16Narerengel ko ra yan amin, et manggiwgiw ak;

manggigiwgiw ed takot iray bibil ko.

Paligpalig so laman ko,

mankitakit iray salik.

Mandeen ak a manalagar ed isabiy panaon

a dusaen na Dios iray ondodogpad sikami.

17Anggan anggapoy bungay igos

tan saray kaubasan,

anggan anggapoy naborbor ed kaolibaan

tan anggapoy naanid kaalogan,

anggan ompatey ya amin iray karniro

tan naandian na baka iray koral,

18manliket tan manggayaga ak nin siansia,

lapud say Katawan a Dios so manangilaban ko.

19Pinabiskeg ak na Katawan a Dios.

Patalabiten to ray salik a singa sali na ulsa

tan iyarawi to ak ed kaatapan diad kapalandeyan.