1 Saray Awaran 11 - Pangasinan Meaning-Based Bible(MBBPAN83)

Si David Nagmaliw ya Ari ed Israel tan Juda(2 Sam. 5:1-10)

1Amin a totood Israel linma rad kinen David diad Hebron tan kuandad sikato, “Kadalaan tan kalamanan mo kami.

2Nen saman, anggan nen ari mi ni si Saul, impangulom ed bakal iray totood Israel, tan insipan ed sikayo na Katawan a Dios mo ya iwanwan mo ray totoo to tan oleyan mo ra.”

3Kanyan amin a panguloy Israel linma rad kinen Ari David diad Hebron. Diad arap na Katawan akisipanan ed sikara si David; nilanaan da et nagmaliw ya ari na Israel onung na insipan na Katawan ed panamegley nen Samuel.

4Si Ari David tan saray Israelita dinogpaan day Jerusalem. Say ngaran ni nen saman na Jerusalem et Jebus, tan manaayam nid man iray Jebuseo, saray inmona-onan totoo a nanayam ed saman a dalin.

5Imbaga na saray Jebuseo ed kinen David ya ag balut makaloob ed Jerusalem, balet adakep nen David so tirinsira ed Sion, kanyan atawag na “Siudad nen David.”

6Inkuanen David, “Magmaliw a pangulo na saray sondalo so siopaman a makaonan makapatey na Jebuseo.” Impangulo nen Joab a lakin anak nen Sarvia so indogpa ra tan nagmaliw a pangulo na saray sondalo.

7Atawag na “Siudad nen David” so tirinsira, ta diman nanayam si David.

8Pinasimbalo tan inletneg so siudad ed kaliber-liber na tirinsira; inggapo tod pasen a tinabonan diad bokig na pokdul. Inapiger nen Joab iray arum a pasen na siudad.

9Pinmalalo lan pinmalalo so inkatalonggaring nen David, lapud walad sikatoy Katawan a Makapanyarin-amin.

Saray Bantug a Sondalo nen David(2 Sam. 23:8-39)

10Saya so listaan na saray bantug a sondalo nen David. Diad tulong da tan amin da ray arum a totood Israel nagmaliw ya ari si David, onung na insipan na Katawan. Impansiansia ran mabiskeg so nanarian to.

11Say onona si Jasobeam a kabyangay boleg nen Hacmon, tan sikatoy pangulo na “Saray Talora.” Inkana toy pika diad impilaban tod talon lasus a lalaki tan apatey to ran amin legan na sakey a bakal.

12Say kumadwa ed “Saray Talora” a bantug et si Eleazar a lakin anak nen Dodo a kabyangay boleg nen Aho.

13Kaiba ton akibakal ed saray Filisteo si David diad bakal na Pasdamim. Walad alog na sibada si Eleazar nen ginapwan na saray Israelita so ombatik,

14kanyan sikato tan saray totoo to et ag ira inmalis ed pegley na alog tan nilabanan da ray Filisteo. Say Katawan initdan to na baleg ya impanalo.

15Aminsan ya agew, talora ed saray talomplon manonan sondalo et linma rad ongib na Adullam a kawalaan nen David legan a mankakampod Patar na Refaim iray pigaran Filisteo.

16Diad saman a panaon walad pokdul a tirinsira si David tan sakey ya olup na saray Filisteo so linmoob ya anakop ed Betlehem.

17Sinmabid kinen David so pakakailiw kanyan inkuanto, “Wala komuy makapangiter ed siak na danum a nanlapud bobun a walad abay na puirtay Betlehem.”

18Saramay taloran bantug a sondalo et pinasoot day sinmelak ed kampo da ray Filisteo, angala ray danum ed bobun, insan da inter ed kinen David. Balet ag to inomen, no ag ta inkalbo ton imbagat ed Katawan

19tan kuanto, “Ag nayarin balut ya inomen ko ya! Ta no inomen ko, singa iinomen ko so dala da ra yan totoo ya angipostay bilay da!” Kanyan ag to ininom. Sikara ya so ginagawa na saramay taloran bantug a sondalo.

20Say lakin agi nen Joab a si Abisai so pangulo da ray “Talomplon Bantug.” Inkana toy pika diad impilaban tod talon lasus a lalaki tan pinapatey to ra, kanyan nagmaliw a bantug ed “Saray Talomplo.”

21Sikatoy sankabantugan ed “Saray Talomplo,” kanyan nagmaliw a pangulo ra, balet ag to aparaan so inkabantug na “Saray Talora.”

22Say lakin anak nen Joiada a si Benaya a taga Cabseel et sakey a bantug a sondalo; wala ray ginagawa ton makapakebyew. Pinatey toy duaran matalonggaring a bumabakal a taga Moab. Aminsan ya agew ya ambetebetel, linma ed dalem na ongib tan pinatey toy sakey a lion.

23Pinatey to met so sakey ya Egipsion baleg so laman to; masoluk a duaran mitroy kaatagey to, tan nanarmas na balbaleg a pika. Pinekpek to na baston, sinamsam toy pika to tan sikatoy impamatey to.

24Saraya so ginagawa nen Benaya a sakey ed “Saray Talomplo.”

25Bantug ed “Saray Talomplo,” balet et ag to aparaay inkabantug na “Saray Talora.” Si David ginawa ton pangulo na saray umaantabay to.

26-47Sikara yay arum a matalonan sondalo:

Asael a lakin agi nen Joab

Elhanan a lakin anak nen Dodo, tan taga Betlehem

Samot a taga Harod

Helez a taga Pelet

Ira a lakin anak nen Ikes, tan taga Tecoa

Abiezer a taga Anatot

Sibecai a taga Husa

Ilai a taga Aho

Maharai a taga Netofa

Heled a lakin anak nen Baana, tan taga Netofa

Itai a lakin anak nen Ribai, tan taga Gabaa a sakop nen Benjamin

Benaya a taga Piraton

Hurai a taga saray patar a kaabay na Gaas

Abiel a taga Arba

Asmavet a taga Bahurum

Eliaba a taga Saalbon

Hasem a taga Gizon

Jonatan a lakin anak nen Sagee tan taga Arar

Ahiam a lakin anak nen Sacar, tan taga Arar

Elifal a lakin anak nen Ur

Hefer a taga Mekera

Ahias a taga Pelon

Hezro a taga Carmel

Naarai a lakin anak nen Ezbai

Joel a lakin agi nen Natan

Mibhar a lakin anak nen Hagri

Zelec a taga Ammon

Naharai a taga Beerot tan sikatoy umaawit na armas nen Joab ya anak nen Sarvia

Ira tan Jareb a taga ra Jatir

Urias a Heteo

Zabad a lakin anak nen Ahlai

Adina a lakin anak nen Siza (a matalonan kabyangay tribu na Ruben tan walay olup na talomplon sondalo ton dili)

Hanan a lakin anak nen Maaca

Josafat a taga Mitan

Uzia a taga Astera

Sama tan Jeiel a lalakin anak ira nen Hotam tan taga ra Aroer

Jediael tan Joha a lalakin anak nen Simri tan taga ra Tiz

Eliel a taga Mahava

Jeribai tan Josavia a lalakin anak nen Elnaam;

Itma a taga Moab

Eliel, Obed, tan Jasael a taga Zoba.