1Sinmabi may kumalabintalon agew na Adar, samay agew a panumpal ed samay ganggan na ari, say agew ya inilaloan na saray kalaban da ray Judio a panalo rad sikara. Balet saray Judio la laingen so analod sikara.
2Diad ayaman na saray Judio ed balang siudad na nanarian, nankakasakey tan namparaan iran ondogpa ed siopaman a mamasakit ed sikara. Diad inerman a pasen natatakot iray totoo ed sikara, tan anggapoy makalaban ed sikara.
3Diad tuay tua, amin da ray opisyal ed balang luyag—saray gobirnador, saray makaoley, tan saray mangilalaman na ari—tinmutulong irad saray Judio lapud antakot ira ed kinen Mardokeo.
4Kabkabat ed intiron nanarian a si Mardokeo et makapanyari ed palasio, tan ombabaleg so pakayari to.
5Kanyan nayarian na saray Judio a gawaen ed saray kalaban da so labay da. Dinmogpa ran sankaawit da ray ispada tan pinapatey da ra.
6Diad Susa a manonan siudad, pinatey na saray Judio so liman lasus a totoo.
7-10Kaibad saraya so samploran lalakin anak nen Haman ya anak nen Hamedata tan kalaban na saray Judio: Parsandata, Dalfon, Aspata, Porata, Adelia, Aridata, Parmasta, Arisai, Aridai, tan Vaisata. Balet ag da diniwit so kayamanan na saray pinatey da.
11Diad saman lamlamang ya agew nipasabid ari so bilang na saray apatey ed Susa.
12Inkuantod kinen Riyna Ester, “Diad Susa labat liman lasus, pati saray samploran lalakin anak nen Haman, so pinapatey na saray Judio. Dakdakel ni angangko so pinatey da ed saray luyag. Anto niy labay mo. Ibagam et iter ed sika.”
13Inmebat si Ester, “No labay na Kagalang kon Ari, abuloyan mo komun iray Judio a gawaen da lamet nabwas so ginawa ra natan. Ipabitay mo komun ed panagbitayan iray bangkay da ra may anak nen Haman.”
14Ingganggan na ari a nagawa ra ya, kanyan angipaakseb na ganggan ed Susa. Nipanengneng ed karaklan iray bangkay na saramay anak nen Haman.
15Diad kumalabinapat ya agew na Adar nantitipon lamet iray Judio ed Susa tan pinatey da niy talon lasus nin lalaki ed siudad. Balet ag da diniwit so kayamanan na saray pinatey da.
16Nantotogyup met iray Judio ed saray luyag tan inyagel day sikaran dili. Pitomplo tan liman libon totoo so pinapatey dan mamobosul ed sikara. Balet ag da met diniwit so kayamanan na saray pinatey da.
17Ginawa da ya nen kumalabintalon agew na Adar. Diad kaimbwas, say kumalabinapat ya agew, tinondaan la na saray Judio so nampatey, tan ginawa ran maliket a pistay panangan iman ya agew.
18Balet say kumalabinliman agew so ginawan pista na saray Judio ed Susa, ta diad kumalabintalo tan kumalabinapat ya agew so impanpatey da tan diad kumalabinliman agew so intonda ra.
19Sikato yay makasengeg a saray Judion manaayam ed saray ankekelag a baley et maliket dan sisilibraan a pista so kumalabinapat ya agew na bulan na Adar, say agew a paniiteran day rigalo na kakanen.
Say Pista na Purim20Impaisulat nen Mardokeo ira yan agawa tan sinulat ton amin iray Judion walad Impirio na Persia, arawi may asingger so kawalaan da.
21Imbaga to a gawaen da ran pista opisyal so kumalabinapat tan kumalabinliman agew na bulan na Adar kapag taon.
22Sarayan agew so impamaandi na saray Judio ed saray kalaban da tan sikato yay bulan a nagmaliw a panaon na liket tan gayaga so panaon na ermen tan inkaandiay ilalo. Nibagad sikara a diad sarayan agew mampoponsia, manliliket tan maniiteran ira na saray rigalon kakanen tan itdan da met iray mairap-bilay.
23Kanyan sinumpal na saray Judio iray bilin nen Mardokeo, et nagmaliw a tinaon yan pista.
24Nen saman, si Haman ya anak nen Hamedata—say kabyangay boleg nen Agag tan kalaban na saray Judio—et ginawa to so pampapalaranan a tatawagen na “purim”, pian naamtaan to so agew a pamatey ed saray Judio; implano ton paandipaten ira.
25Balet linmay Ester ed ari, tan angipaakseb so ari na saray nisulat a ganggan. Say agawa et si Haman so nansumpalan na samay maoges a ginetma tod saray Judio; sikato tan saray anak ton lalaki so nibitay ed panagbitayan.
26Sikato yay makasengeg no akin ya atawag na Purim ira yan pista opisyal na saray Judio. Say salitan Purim kabaliksan toy “saray pampapalaranan.” Lapud samay sulat nen Mardokeo tan lapud saramay amin ya agawad sikara,
27ginawa ran sakey a totontonen da, saray kabyangay boleg da, tan siopaman a magmaliw a Judio, a diad manepeg a panaon na kapag taon pistaan da ra yan duaran agew onung ed saray bilin nen Mardokeo.
28Nakaukolan a balang Judion pamilya na balang kailalakan ed arapen, diad balang luyag tan balang siudad, tandaan tan pistaan da ra yan duaran agew na Purim ya anggad kapigan.
29Nansulat met si Riyna Ester ya anak nen Abihael pian napaneknekan na pakaoley to imay sulat a nipaakar ed Purim a ginawa nen Mardokeo.
30Para amin da ray Judio yan sulat tan nipawit iray kopia ed amin da ray sanlasus tan duamplo tan piton luyag na Impirio na Persia. Nilogan ed sayan sulat a nawalaan komun na kareenan tan niarawid saray kaatapan iray Judio,
31tan ingganggan to ra tan saray kabyangay boleg da a silibraan da ray agew na Purim diad manepeg a panaon, a singa panusumpal da ed saray totontonen a nipaakar ed panagayuno tan saray agew na panagermen. Ingganggan ya di Mardokeo tan Riyna Ester.
32Say ganggan nen Ester a pamaneknek tod saray totontonen a nipaakar ed Purim et nisulat ed sakey a nilokut a babasaen.
Who We AreWhat We EelieveWhat We Do
2025 by iamachristian.org,Inc All rights reserved.
