1 Saray Arari 22 - Pangasinan Meaning-Based Bible(MBBPAN83)

Pinaksakbayan nen Micaya si Acab(2 Awa. 18:2-27)

1Duay taon ya anggapoy balingaan na Israel tan Siria,

2balet diad kumatlon taon linman akitongtong si Ari Josafat na Juda ed kinen Ari Acab na Israel.

3Tinepet nen Acab ed saray opisyal to, “Amta yo a kayaryan tayoy Ramot-Galaad. Akin balet et ag tayo babawien ed ari na Siria?”

4Inkuanen Acab ed kinen Josafat, “Mila ka pad sikamin mibakal ed Ramot-galaad.”

Inmebat si Josafat, “No akaparaan kayo la, akaparaan kami met la. Mikasakey kamid sikayon mibakal.”

5Insan inkuanto ni, “Balet ipanon tayo ni ya ed Katawan.”

6Impantitipon sirin nen Acab iray propita a sakey ya apat a lasus ira tan tinepet tod sikara, “Laen kon dogpaan so Ramot-galaad odino andi?”

“Dogpaan mo,” ebat da. “Panaloen ka na Katawan.”

7Balet tinepet nen Josafat, “Anggapo ta lay sananey a propita na Katawan a pangipanonan tayo?”

8Inmebat si Acab, “Wala niy sananey, si Micaya a lakin anak nen Imla. Balet kabosul ko, ta ag balut mampropropisiya na pankaabigan ko; pakaderalan kon amin.”

“Ag mo nepeg ya ibaga tan!” ebat nen Josafat.

9Tinawag sirin nen Ari Acab so sakey ya opisyal, tan imbaga tod sikato ya awiten ton tampol si Micaya.

10Saramay duaran ari akasolung ira na kawes da ray arari et akayorung irad saray trono ra diad samay pasen a panagilikan ya asingger ed puirta na Samaria. Mampropropisiyad arap da ira may amin a propita.

11Nanggawa na saray saklur a balatyang so sakey ed sarap propita a si Sedekias a lakin anak nen Canaana tan kuantod kinen Acab, “Onyay inkuan na Katawan: ‘Diad panamegley na saraya, labanan mo ray Siriano, et sigput a taloen mo ra.’”

12Nampapara so imbaga na amin da ra may propita. Inkuanda, “Lakad Ramot-galaad, et manalo ka. Panaloen ka na Katawan.”

13Legan to ya, samay opisyal a mangaawit ed kinen Micaya inkuantod sikato, “Aligwas na ari so impropisiya na amin da ray arum a propita, kanyan onya met so ipropisiyam.”

14Balet inmebat si Micaya, “Diad ngaran na mabilay a Katawan, say papaibaga tod siak so ibagak!”

15Nen pinmarontal ed arap nen Ari Acab si Micaya, inkuan na ari ed sikato, “Micaya, dogpaan mi nen Ari Josafat so Ramot-galaad odino andi?”

Inmebat si Micaya, “Laka yo, ta manalo kayo. Panaloen kayo na Katawan.”

16Balet inmebat si Acab, “Mamimpigan ibagak ed sikan say katwaan labat so ibagam ed siak diad ngaray Katawan?”

17Inmebat si Micaya “Anengneng kon ataytayak ed saray pokdul iray totood Israel, a singa ra karniron anggapoy pumapastol da. Insan inkuan na Katawan, ‘Anggapoy pangulo da ra yan totoo; pasempet mo la ran walay kareenan.’”

18Inkuanen Acab ed kinen Josafat, “Imbagak ed sikan ag balut mampropropisiyay pankaabigan ko; pakaderalan kon amin!”

19Intuloy nen Micaya ya inkuan, “Dengel mo natan so ibabagay Katawan! Anengneng koy Katawan a manyodyorung ed trono tod tawen, tan manalalagey ed diking to iray amin ya anghil to.

20Tinepet na Katawan, ‘Siopay mamalikdod kinen Acab, pian onlad Ramot-galaad tan diman napatey?’ Sananey so imbaga na saray arum ya anghil tan sananey met so imbaga na arum.

21Kabebekta inmasingger so sakey ya ispiritu, nanalagey ed arap na Katawan tan kuanto, ‘Siak so mamalikdo.’ ‘Panon mon palikdoen?’ tepet na Katawan.

22Inmebat imay ispiritu, ‘Onla ak, ta pantilaen kon amin iray propita nen Acab.’ Inkuan na Katawan, ‘Laka, ta palikdom si Acab. Nagaway pilalek mo.’”

23Inkuanen Micaya ed kaonuran, “Saya sirin so agawa. Impantila na Katawan ed sika ra yan propitam. Balet imbaga la na Katawan ed sika so kaogsan a nagawad sika.”

24Balet inasinggeran nen Sedekias si Micaya, tinampal to, tan kuanto, “Kapigan ya inmekal ed siak so ispiritu na Katawan, insan nansalita ed sika?”

25“Naamtaan mo no onla kan onamut ed kuarton walad beneg,” ebat nen Micaya.

26Insan ingganggan nen Acab so sakey ed saray opisyal to, “Singkat moy Micaya, insan mo iyakar ed kinen Amon a gobirnador na siudad, tan kinen Prinsipi Joas.

27Ibagam ed sikaran ipriso ra tan pakanen da labat na tinapay tan itdan day danum ya anggad isabik ya anggapoy maoges ya agawad siak.”

28“No ompawil kan anggapoy maoges ya agawa,” kuanen Micaya, “ag nansalitad panamegley ko so Katawan!” Insan to inyarum ya inkuan, “Tandaan yon amin a totoo—imay imbagak!”

Say Impatey nen Acab(2 Awa. 18:28-34)

29Linman dinmogpad siudad na Ramot-galaad si Ari Acab na Israel tan si Ari Josafat na Juda.

30Inkuanen Acab ed kinen Josafat, “No onla itayon mibakal ag ak pabirbir, balet mansolung kay kawes na ari.” Kanyan ag nampabirbir so ari na Israel nen linman mibakal.

31Ingganggan na arid Siria iray talomplo tan duan pangulo na saray sondalon akakarwahi ya anggapoy arum a dogpaan da no ag say ari na Israel.

32Nen anengneng day Ari Josafat abaloan dan ari na Israel, kanyan dinogpaan da. Balet nen inmeyag,

33abirbir dan aliwan ari na Israel, kanyan tinondaan dan dogpaan.

34Balet apalaranan ya apana na sakey a sondalon Siriano si Acab diad nanleetan na saray kawes ton para bakal. Ineyag tod kutsiroy karwahi to, “Asugatan ak! Poliktar ka, ta onarawi ta lad bakalan.”

35Legan na pinasian laban, nansiansian akasaral ed karwahi to si Ari Acab tan sankaarap to ray Siriano. Managagos so dala a manlalapud sugat to tan aluak na dala so datal na karwahi, insan inatey nen labi la.

36Nen onlalabi la niganggan ed saray sondalo na Israelita, “Onsempet lay balang sakey a laki ed dilin bansa tan siudad to!”

37Kanyan inatey si Ari Acab. Niakar ed Samaria so bangkay to tan diman nipompon.

38Naorasan ed dipositoway danum so karwahi to diad Samaria a diman dinidildilan na saray aso so dala to tan dimay nanoorasan na saray marotak a bibii, onung na sinalita na Katawan.

39Nisulat ed libron Say Awaran da ray Ararid Israel iray arum nin ginagawa nen Ari Acab, pati say nipaakar ed palasio ton garing tan saray siudad ya impapaalagey to.

40Kapatey nen Acab sinmalat ed sikaton nanari so lakin anak to a si Ahazias.

Si Ari Josafat na Juda(2 Awa. 20:31–21:1)

41Diad kumapat a taon na panooley nen Ari Acab ed Israel, nagmaliw ya ari na Juda si Josafat a lakin anak nen Asa.

42Talomplo tan limay taon to nen ginmapon manari, tan nanayam ed Jerusalem legan ton nanoley a duamplo tan limay taon. Si Azuba ya anak nen Silhi so ina to.

43Ginawa toy kaptekan ed arap na Katawan a singa ginawa nen Asa ya ama to; balet ag to aderal iray paganon pasen a panangigalangan, kanyan intuloy na saray totoo so nambabagat tan nampopool na insinso ed saraman a pasen.

44Akikaaro si Josafat ed ari na Israel.

45Nisulat ed libron Saray Awaran da ray Ararid Juda iray arum nin ginagawa nen Josafat, say inkasebeg to tan saray impibakal to.

46Pinataynan ton amin ed dalin iray marotak a lalaki tan bibiin atilak nid saramay panaon nen ama ton Asa, tan manlilingkur irad saray paganon altar.

47Nen saman anggapoy ari ed dalin na Edom; inoleyan na toon tinoro na ari ed Juda.

48Wala ray barko nen Josafat a para biahid dalin na Ofir, ta manalay balituk; balet aderal irad Ezion-geber, kanyan ag la ra nambiahin balut.

49Insan imbaga nen Ari Ahazias na Israel a mambiahid bapor iray totoo to a kaolup da ray totoo nen Josafat, balet ag inmabubon si Josafat.

50Inatey si Josafat tan nipompon ed Siudad nen David, insan sinmalat ed sikaton nanari si Jehoram a lakin anak to.

Si Ari Ahazias na Israel

51Diad kumalabinpiton taon na panooley nen Ari Josafat ed Juda, nagmaliw ya ari na Israel si Ahazias a lakin anak nen Acab, tan nanoley ed Samaria na duay taon.

52Nankasalanan ed Katawan, ta inalig toy ginagawa di Acab ya ama to, Jezebel ya ina to, tan Ari Jeroboam a nilagyat dan nankasalanan so Israel.

53Inggalang tan nanlingkuran toy Baal tan impanpasnuk toy Katawan a Dios na Israel, a singa si ama to.