Sirac 10 - Pangasinan Meaning-Based Bible(MBBPAN83)

1Panaralen na makabat a manoley iray totoo to, tan maokoksuy so oley to.

2Amin da ray opisyal tan amin da ray ombaley et magmaliw a singa manoley da.

3Deralen na arin anggapoy aral iray totoo to, balet ombiskeg so oley no makabat iray manoley to.

4Aasikasoen na Katawan so oley ed mundo tan mangyaakar na dugan toon manoley ed dugan panaon.

5Walad saray lima na Katawan so aligwas na satan a too. Say Katawan so panlalapwan na galang a niiiter ed siopaman ya opisyal.

Say Panagpaatagey

6Ag ka mamapasnuk ed siopaman lapud balang melag a bengatlan makapoy a gagawaen to. Ag mo gagawaey bengatla lapud asakitan so liknaan mo.

7Kabosul na Katawan tan too so panagpaatagey tan ag inkatonung.

8Makapangyepas ed pakayari na saray bansa so ag inkatonung, panagpaatagey, tan kayamanan, insan napaatagey iray arum a bansa ya onsalat ed sikara.

9Dabuk tan dapul itayo labat; antoy nipasirayew tayo? Naboboluk so laman tayo anggan mabilay itayo ni.

10Pakagogoloay olo na doktor so mabayag a sakit. Nayarin mabilay natan so anggan ari, balet nabwas inatey la.

11No inatey lay too, saray kayaryan to labat et saray bigis, apangat, tan saray alumbayar.

12Onggapo so panagpaatagey no ikaindan la na sakey a too so Katawan a manamalsa to.

13Say panagpaatagey et singa sobul a mangipapatoro na kasalanan, tan siopamay mansiansia ed saya et napano na kaogsan. Sikato yay makasengeg a mapalaloy impanusa na Katawan ed saray pigaran totoo tan sigput to ran pinapatey.

14Ineekal na Katawan ed pakayari iray arari tan insasalat tod sikaray totoon lalon mapaabeba.

15Binabagut na Katawan iray bansa tan insasalat tod sikaray lalon mapaabeba.

16Tinatalo na Katawan iray impirio tan sigput ton dinederal iray dalin da.

17Sigput ton dinederal iray arum, kanyan ag la ran balut nanunotan.

18Ag balut ginetma na Manamalsa a magmaliw a mapaatagey tan maruksa iray totoo.

Saray Totoon Nepeg a Pagalangan

19Siopay toon manepeg a mangawat na kagalangan? Saray katoowan, lapud tatakotan na saray totoo so Katawan. Siopay aliwan manepeg a mangawat na kagalangan? Saray katoowan, lapud susumlangen na saray totoo iray ganggan na Katawan.

20Nepeg a pagalangan na saray ontotombuk ed sikato so pangulo, tan papagalangan na Katawan iray walay takot ed sikato.

22Saray totoon mayaman, saray bantug, tan saray mairap-bilay et ipapasirayew day itatakot dad Katawan.

23Aliwan duga so pangipolisay na kagalangan ed sakey toon mairap so bilay to, balet ta maotek, tan aliwan duga so pangiter na kagalangan ed toon makasalanan.

24Napagalangan iray totoon bibirbiren, saray manoley, tan saray huis, balet anggapod sikaray matalona nen say toon tatakotan toy Katawan.

25Nawalaan na saray bolus ya ombaley a manlingkur ed sikato so sakey ya aripen a makabat; tan no makalakal ira ag ira onsumlang.

Say Panagpaabeba tan say Panamagalang ed Inkasika

26No gawaen moy kimey mo, ag mo ipapanta so karunongan mo, tan ag ka mampapanta no wala kad gunigon.

27Maung ni so mankimey tan walaan ka na masoluk nen say nakaukolan mo, nen say manliber-liber kan mampapasirayew balet narasan ka.

28Anak, pansiansiam a pagalangan so inkasika, balet mansiansia kan mapaabeba. Pablim so sikan dili onung na tuan kablian mo.

29Anggapoy nibaraan na sakey a toon leglemewen toy sikaton dili. Anggapoy toon pagalangan toy toon anggapoy panamagalang tod sikaton dili.

30Napagalangan iray totoon mairap so bilay lapud makalakal ira, tan napagalangan iray mayaman a totoo lapud mayaman ira.

31No napagalangan so too legan a mairap so bilay to, nunot mo so ontan lan pakagalangan to no onyaman! No nabalaw so sakey a too legan ton mayaman, nunot mo so ontan lan pakabalaw to no magmaliw a mairap so bilay to!