Jeremias 37 - Pangasinan Meaning-Based Bible(MBBPAN83)

Say Kerew nen Sedekias ed kinen Jeremias

1Si Ari Nabucodonosor na Babilonia insalat tod kinen Joakin a lakin anak nen Joakim so lakin anak nen Josias a si Sedekias a manari ed dalin na Juda.

2Balet si Sedekias, saray opisyal to, tan saray totoo et ag ira inmonur ed saray salitan impaibagad siak na Katawan.

3Si Ari Sedekias imbaki tod siak si Jucal a lakin anak nen Selemias tan say pari a si Sofonias a lakin anak nen Maasias, ta kerewen dan ipikasik ed Katawan a Dios tayo so bansa.

4Ag ak ni aprisod sayan panaon, kanyan mililimug-limug ak nid saray totoo.

5Pinmaway lad ketegan na Egipto iray sondalon Egipsio, et nen nadngelan ya na saray taga Babilonia ya onlalakob ed Jerusalem, sinmener ira.

6Insan imbagad siak na Katawan a Dios na Israel ya ikuankod kinen Sedekias yan salita,

7“Onsasabin ontulong ed sika ray sondalon Egipsio, balet ompawil irad Egipto.

8Insan ompawil diad satan iray taga Babilonia, dogpaan da yan siudad, dakepen da, insan da poolan.

9Papasakbayan ta ka, siak a Katawan, ya ag mo papalikdoey sikan dili diad panilalom ya ag dia ompawil iray taga Babilonia, ta talagan ompawil ira.

10Anggaman a natalom ya amin iray sondalo na Babilonia, ta pian saray nakeraan labat ed sikara et saray sugatan a mandokdokul ed dalem na saray tulda ra, sarayan totoo et looban da ni yan siudad, insan da poolan.”

Narel tan Nipriso si Jeremias

11Nen manasingger ed Jerusalem iray sondalo na Egipto sinmoner iray sondalo na Babilonia.

12Manlapud Jerusalem linma ak ed pasen a nasasakopan nen Benjamin, ta alaen koy nabebetangan ko ed kayaryan na pamilyak.

13Balet nen akasabi ak ed Puirta nen Benjamin, say makaoley ed saray sondalon mambabantay diman, a si Irias ya anak nen Selemias tan apo nen Ananias, sinabat to ak tan kuanto, “Ombabatik kan migampid saray taga Babilonia!”

14Inmebat ak, “Aliwan tua tan! Ag ak ombabatik a migampid saray taga Babilonia.” Balet ag ak dinengel nen Irias. Inerel to ak ingen tan inyakar to ak ed saray opisyal.

15Mapalaloy pasnuk dad siak; sinisiplatan da ak, insan da ak impokuk ed abung nen Jonatan a sikritarioy ari, a nagmaliw a prisowan so abung to.

16Nipokuk ak ed kuartod dalem na dalin tan nanayam ak diman ya abayag.

17Insan impaawit ak nen Ari Sedekias, tan maamut ton tinepet ed siak diman ed palasio, “Walay papaibaga na Katawan?”

Inmebat ak, “Wala! Nipalima kad ari na Babilonia.”

18Insan tinepet ko, “Antoy kasalanan kod sika, odino diad saray opisyal mo, odino diad saray totoom a makasengeg na pangipiprisoan mod siak?

19Antoy asumpalan da ray propitan angibagad sika a say ari na Babilonia et ag to ka dogpaan odino sayan bansa?

20Kanyan natan, Kagalang kon Ari, kerewen kod sika a dengel mo ak pa, tan iter moy kerewen ko. Ag mo ak pa la ipapawil ed prisowan diad abung nen Jonatan. Ta no ipawil mo ak, andi-saew ya ompatey ak lad man.”

21Kanyan ingganggan nen Ari Sedekias a nipokuk ak ed dalem na patio a diman ak naiitdan na sakey a tinapay ya inagew-agew, anggad naoput lan amin so tinapay ed siudad.