1Manlapud saray patar na Moab si Moises linmad Palandey na Nebo, tan kinmalab ed toktok na Palandey na Pisga a nibokig na Jerico, tan diman impanengneng ed sikato na Katawan so intiron dalin na Canaan: say dalin na Galaad ya anggad baybay diad baley na Dan;
2say intiron dalin na Neftali; saray dalin na Efraim tan Manases; say dalin na Juda ya anggad sagur diad Dayat na Mediteraneo;
3say niabalaten a parti na Juda; tan say patar a manlapud Zoar ya anggad Jerico, say siudad na saray kiew a palmira.
4Insan say Katawan kuantod kinen Moises, “Saman so dalin ya insipan kod kindi Abraham, Isaac, Jacob ya iter kod saray kabyangay boleg da. Impanengneng kod sika, balet ag ta ka palooben diman.”
5Kanyan si Moises ya aripen na Katawan inatey diman ed dalin na Moab, onung na imbagay Katawan ed sikato.
6Say Katawan impompon tod sakey a patar na Moab a kapetekan na baley na Bet-peor, balet anggad sayan agew anggapo niy makaamtad pasen ya angipomponan ed sikato.
7Sanlasus tan duamploy taon nen Moises nen inatey; ag angoman so biskeg to, tan maung niy pakanengneng to.
8Saray totood Israel et inermenan dan talomploy agew diad saray patar na Moab.
9Si Josue a lakin anak nen Nun et napno na kakabatan, lapud tinoro nen Moises a kasalat to. Inonur na saray totood Israel si Josue tan sinumpal da ray ganggan ya inter ed sikara na Katawan diad panamegley nen Moises.
10Anggapon balut so linmetaw a propitan singa si Moises diad dalin na Israel; say Katawan akisalitad sikato a lupa-lupaan.
11Anggapoy arum a propitan akagawa na saray milagro tan saray pakelaw a singa saray milagro tan pakelaw ya impagawa na Katawan ed kinen Moises sumpad ari na Egipto, saray opisyal to, tan diad intiron bansa.
12Anggapoy arum a propitan akagawa na singa saray makapanyari tan makapataktakot a bengatlan ginagawa nen Moises ed arap na amin ya Israelita.
Who We AreWhat We EelieveWhat We Do
2025 by iamachristian.org,Inc All rights reserved.
