Sirac 35 - Pangasinan Meaning-Based Bible(MBBPAN83)

1Say Pangonur ed Ganggan et singa saray amayamay a bagat, bagat met yan para kareenan.

2Say pangibales ed panangasi et singa bagat a trigo; say pangiter na bengatla ed saray mairap-bilay et singa pangisaklang na bagat a pisasalamat.

3Say iyarawi ed kasalanan paliketen toy Katawan tan ekalen toy kasalanan.

4Balet ag ka oonlad Timplo no anggapoy bagat mo.

5Kakaukolan na Ganggan a mangawit kay bagat.

6No mangibagat so sakey a matonung a too tan onterter ed altar so taba, onatagey ed Sankatageyan so ambalingit ya angub.

7Awaten na Katawan iray bagat ya insaklang na toon matonung tan ag to ra lingwanan.

8Igalang moy Katawan diad pangisaklang mod sikato na mabonluk iran bagat; ag ka maigot ed pangiter mod saray ononan naanim.

9Panliketan moy pangiter mod balang rigalom, tan no bayaran moy kakaplom, gawam a magayaga.

10Mangiter kan mabonbonluk ed Sankatageyan onung na impangiter tod sika.

11Mambabayar lawas so Katawan tan ooliten ton mamimpiga-piga.

12Balet ag mo sasalien a pasoksokan; ag ka manmamatalek ed saray bagat a nalad kasaolan. Ag to ra awaten.

Say Inkatonung na Dios

Matonung so Katawan tan aliwan manangibiig.

13Ag to kakalabanen iray mairap-bilay; no mampikasi so sakey a toon nanggawaay makapoy, ondengel so Katawan.

14No mampikasi ray olila tan saray bibiin balo, ag to pepetay layag tod sikara.

15Saray luan onteterter ed lupa na sakey a biin balo et oneeyag a mangaakusad samay toon amaermen ed sikato.

16Panlingkuran mon mabolbolus so Katawan, et awaten to ka; onsabid tawen iray pikakasim.

17Onlabas ed lorem so pikakasi na toon mapaabeba tan ontuloy ya anggad pakasabi tod Sankatageyan a Katawan; manayam diman imay pikakasi, anggad ebatan na Katawan diad pangimano ton nagawa so inkatonung tan nadusa iray nankasalanan.

18Masiglat ya onggalaw so Katawan. Anggapoy anos tod saray totoon maoges. Ombawi diad panamegley na panemek tod saray paganon totoo. Sigput ton paandipaten iray totoon anggapoy panangasi tan mapaatagey, tan deralen toy pakaoley da ray totoon maoges.

19Iter to so kanepegan na saray kanunotan tan kagagawan na balang too. Lapud panangasi na Katawan manliket iray totoo to no sintinsiaan toy kaso ra.

20Diad panaon na gunigon, maliket a nanaawat so panangasi to, a singa say oran kayari na andokey a panaon ya anggapoy oran.