Ester (Grigo) E - Pangasinan Meaning-Based Bible(MBBPAN83)

Say Ganggan a Pinilaan to ray Judio

13 Sikato yay kopia na samay ganggan:

“Maliket a pabano a manlalapud Ari Asuero a Matalonggaring para saray gobirnador na sanlasus tan duamplo tan piton luyag, manlapud India ya anggad Sudan, tan para amin da ray matoor ed sikami.

14 “Dakel iray totoon magmamaliw a mapalalon mapaatagey no niiter ed sikaray kagalangan tan say pankaabigan da.

15 Ag da amtay gawaen da ed ontan lan karakel na maung a kapalaran, kanyan ag da labat papairapen iray totoon walad silong na pakaoley tayo, no ag ingen mangiplaplano ray maoges sumpad saray mangiiter na pankaabigan da.

16 Ag iran balut misasalamat ed saray gagawaen na totoo a para sikara, tan nununoten da ni a napaliisan day panintinsia na Dios a bobosulen toy kaogsan tan nanenengneng toy amin a bengatla. Diad inkalastug da, ondedengel irad panagpalikdo na saray anggapoy amta tan makasalanan a totoo.

17 “Naynay met a nagagawa a wala ray kakaaron naitdan na atagey a kipapasen ed gobirno ya aanamuten day pankanawnawa ra ed saray walad pakaoley. Gagawaen dan kaiba ra iray pangulo ra ed pampapatey ed saray totoo tan mangyaakar iray desyang ya ag balut naapiger.

18 Aanamuten na sarayan kakaaro so abig-linawa na saray manoley, diad panamegley na panagtila tan panagpalikdo ra.

19 “Nanengneng yan maoges a panangikanay pakayari, aliwan dia labat ed saray tongtong a nipaamtad sikatayo nipaakar ed saray agawad imbeneg a panaon, no ag ingen diad saray aganggano nin makapasinagem ya agawa ed pegley yo.

20 “Manlapud natan sirin, gawaen koy anggaay nayarian ko a mambilay ed kareenan tan ag nasigensigen iray totoo ed nanarian ko.

21 Nagaway onya diad panamegley na pangoman ed saray pigaran totontonen tan diad panimbang ya anggapoy nilabi ed amin a gunigon a niapireng ed siak.

22 “Nengneng yo so ginawa nen Haman a lakin anak nen Hammedata a taga Macedonia. Sakey a sangkaili tan anggapoy dala ton Persiano tan anggapod sikato so anggan anino na inkamaung na linawak; balet maliket kon inawat,

23 tan inawat toy panagpagak tan panangarok ed amin a katoowan. Nibawag ni ingen ya ‘Ama’ na impirio tan dakel ni nen saray arum so inawat ton kagalangan, likud ed ari.

24 “Balet anggapoy anggaan so panagpaatagey to, tan sinali to ak a pateyen tan oleyan so impirio.

25 Diad inkasilib to tan panagpalikdo to, kinerew ton napatey si Mardokeo, say toon inlaban toy bilay ko tan lawas ya ontutulong ed siak. Kinerew ni ingen nen Haman a napatey si Ester, say anggapoy pakabalawan a riyna tayo; diad tuay tua, kinerew ton napatey ya amin iray Judio.

26 Say getma to et say pagmaliw tayon anggapoy nagawaan, pian nasamsam na saray taga Macedonia so Impirio na Persia.

27 Anggaman ya implano nen Haman a paandipaten iray Judio, nalmoan kon aliwa ran traidor manaya no ag ingen nanaoleyan ira na matonung iran ganggan.

28 Igagalang day mabilay a Dios, say sankatageyan tan sankatalonggaringan a Dios, ya impansiansia ton walad sankamaungan a kipapasen so impirio tayo, manlapud panaon da ray lalaki tayo ya anggad natan.

29 “Kanyan sisimbawaen ta kayo ya ag yo itutuloy iray bilin a walad saramay sulat ya impaitolur nen Haman.

30 Sikatoy akaoley ed amin da ra yan agawa. Nibitay la, a pati amin da ray kabyangan na pamilya to, diad saray puirta na Susa. Say Dios ya ooleyan toy amin a bengatla so angiter ed sikato na masiglat a dusan kanepegan to.

31 “Igaganggan ta kayo ya ipeket yo ray kopia na sayan ganggan diad saray pasen a nanengneng na karaklan. Abuloyan yo ray Judion mambilay onung ed saray kaogaliyan da,

32 tan tulongan yo ra no iyagel day sikaran dili ed saray ondogpad sikara no agew a niganan pamatey ed sikara, say kumalabintalon agew na Adar, say kumalabinduan bulan.

33 Say Dios ya ooleyan toy amin a bengatla et impagmaliw to man ya agew na deral a sakey ya agew na silibrasyon da ray totoon pinili to.

34 “Ipila yo yan agew ed saray pista opisyal na bansa tan silibraan yo.

35 Natan tan diad arapen a panaon, sayan agew ipanunot tod sikatayo tan amin da ray kagampi tayo so panangasikaso na Dios ed bansa tayo, tan ipanunot to met so dusan iter na Dios ed saray mangokomplut sumpad sikatayo.

36 “Amin a luyag tan amin a siudad ya ag ononur ed sarayan ganggan ko et dapoan ira na pasnuk ko. Naderal irad bakal tan napoolan iran anggad napalanas ed dalin. Anggapo lay toon onlad saratan a pasen, tan anggad anggan ag panayaman na saray manok tan saray ayayep ed katakelan.