1Si Ari Nabucodonosor na Babilonia inyakar ton adakep ed Babilonia, manlapud Jerusalem, so lakin anak nen Joakim a si Joakin ya ari na Juda, saray pangulo na Juda, tan saray marunong a karpintiro tan kumikimey. Kayari na sayan inkagawa, say Katawan impanengneng tod siak so duaran baskit a bungay igos a niiyan ed arap na Timplo.
2Samay sakey a baskit nankarga na balibali ran onaan a bungay igos; samay sakey a baskit nankargay aliwaliwan bungay igos ya ag nayarin kanen.
3Insan inkuan ed siak an Katawan, “Jeremias, antoy nanenengneng mo?”
Inmebat ak, “Bungay igos. Saray balibali et mapalalon balibali, tan saray aliwaliwa et mapalalon aliwaliwa, kanyan ag nayarin kanen.”
4Kanyan inkuan ed siak na Katawan,
5“Siak, say Katawan a Dios na Israel, ipapasen ko a saray totoon niakar ed Babilonia et singa sarayan balibalin bungay igos et kasian ko ra.
6Asikasoen ko ra tan ipawil ko rad sayan dalin. Iletneg, aliwan temeken, ko ra; itanem, aliwan baguten, ko ra.
7Itdan ko ra na pilalek a mangamta a siak so Katawan. Diad satan magmaliw iran totook tan siak so Dios da, lapud ompawil irad siak diad intiron puso ra.
8“No panon a sarayan aliwaliwan bungay igos et ag nayari ran kanen, ontan met so gawaen ko, siak a Katawan, ed kinen Ari Sedekias na Juda, saray katambayan tod oley, tan saray arum a totood Jerusalem ya atilak ed sayan dalin odino batik ed Egipto.
9Iyakar kod sikara yan deral pian ontakot iray amin a bansa ed mundo. Ludlureyen ira na saray totoo, sutil-sutilen da ra, balbalawen da ra, tan ikana ran sakey a samba so ngaran da anggan iner a pasen a pangikayatan kod sikara.
10Ipadalan kod sikaray bakal, eras, tan salot anggad anggapoy anggan sakey ed sikara so natilak ed dalin ya inter kod sikara tan saray lalaki ra.”
Who We AreWhat We EelieveWhat We Do
2025 by iamachristian.org,Inc All rights reserved.
