2 Saray Awaran 4 - Pangasinan Meaning-Based Bible(MBBPAN83)

Saray Kagawaan ed Timplo(1 Ar. 7:23-51)

1Nanggawa si Ari Solomon na gansan altar a samploran mitro a kuadrado tan limaran mitroy kaatagey to.

2Nanggawa met na malimpek a gansan kawa; duaran mitroy kaaralem to, limaran mitroy kaawang to, tan labinliman mitroy kinalimpek to.

3Diad kaliber-liber na paway na sangab na kawa et walay duaran dasig na dikorasion a nantapewan. Singa ra bakan kalakyan ira may dikorasion tan nibubo ran nitekep irad samay kawa.

4Naampatut yan kawa ed beneg na saray labinduan gansan bakan kalakyan ya akaarap irad paway, taloray akaarap ed baybay, talorad abalaten, talorad bokig, tan talorad sagur.

5Sankarangan so kakapal to may kawa. Singa sangab na kupa so sangab to; binmaluk ed paway a singa pital na rosas. Limamplo tan anem a libo, duan lasus tan limamplon litro so nakarga to.

6Nanggawa met na samploran palanggana, limara so nipasen ed abalaten na Timplo tan limara diad baybay. Ikana ran panorasan ed saray parti na ayayep ya isaklang a bagat a popoolan. Samay danum ed baleg a kawa et ikana na saray papari a panoras.

7-8Nanggawa na samploran balituk a panangipatoonay lamparaan onung na gendat a panaggawa tan samploran lamisaan, insan to ra inyan ed manonan kuarto na Timplo. Limaran panangipatoonan tan limaran lamisaan so niiyan ed baybay a dapag tan saray arum diad abalaten a dapag. Nanggawa met na sanlasus a yaung.

9Nanggawa met na patio ed dalem a para papari, tan say patio ed paway. Saray kaput da ray puirta ed nanleetan na saramay duaran patio et naokupan ira na gansa.

10Samay kawa et niiyan ed abay na abalaten a bokig, diad suyok na Timplo.

11-16Nanggawa met si Huram na saray banga, pala, tan yaung. Sinumpal ton ginawa iray amin a kagawaan ya insipan ton Ari Solomon a gawaen para Timplo:

Saray duaran lusek

Saray duaran singa yaung ya olo ed toktok na saramay lusek

Saray golunggolung ed toktok na olo na saramay lusek

Saray apat a lasus a gansan granada a nidasig ya amidwa ed kapag olo na saramay lusek

Saray samploran kariton

Saray samploran palanggana

Say kawa

Saray labinduan bakan kalakyan ya angampatot ed samay kawa

Saray banga, saray pala, tan saray tinidor

Pinasileng a gansa so inkana nen Huram nen ginagawa to ra yan amin a kagawaan a para Timplo na Katawan, onung na ingganggan nen Ari Solomon.

17Ginawa na ari ira yan amin a kagawaan diad panagpandayan a walad ketegan na Sucot tan Zereda diad Patar na Jordan.

18Diad ontan lan karakel na agawan kagawaan ag asimbang so intiron belat na gansan nikana.

19Nanggawa met si Ari Solomon na saray balituk a kagawaan a para Timplo: say altar tan saray lamisaan a pangibagatan na tinapay ed Dios;

20saray panangipatoonan na lamparaan, tan saray lamparaan a puron balituk a selselan irad arap na Sankasantosan a Pasen onung ed plano;

21saray dikorasion a rosas, saray lamparaan, tan saray sipit;

22saray panagpotut na pabilo, saray yaung, saray pananginay insinso, tan saray pananginay ngalab. Amin da ra yan kagawaan et puro ran balituk. Naokupan na balituk iray puirtad paway na Timplo tan saray puirta na Sankasantosan a Pasen.