1 Samuel 30 - Pangasinan Meaning-Based Bible(MBBPAN83)

Say Bakal a Sumpad saray Amalecita

1Kalabas na duay agew, sinmabid Siclag si David tan saray totoo to. Dinogpaan na saray Amalecita so sagur na Juda tan say Siclag. Pinoolan day baley na Siclag,

2tan dinakep da ray bii; anggapoy pinatey da, balet inawit da ran amin nen tinmaynan ira.

3Nen sinmabiy David tan saray totoo to, nalmo ran apoolan so baley tan adakep iray kaasawaan da, tan saray anak dan lalaki tan bibii.

4Kanyan nanakis si David tan saray totoo to, tan ag ira tinmonda ya anggad makapkapoy la ran maung.

5Adakep met iray anggan duaran asawa nen David, a si Ahinoam a taga Jezreel tan si Abigail ya asawa nen Nabal a taga Carmelo.

6Agunigon a maung si David, ta ansakit a maung so linawa da ray totoo to lapud inkabalang na saray anak da, tan pantotongtongan da lan tupaken. Balet pinabiskeg na Katawan a Dios to so linawa to.

7Inkuanen David ed kinen Abiatar a pari tan lakin anak nen Ahimelec, “Iyakar mo dia may ipod,” et inyakar nen Abiatar ed sikato.

8Tinepet nen David ed Katawan, “Osilan ko ray dinmogpa? Naabot ko ni ra kasi?”

Inmebat so Katawan, “Osilan mo ra: andi-duaruwan naabot mo ra tan nabawim iray adakep.”

9Pinmikal si David tan saray anem a lasus a totoo to, et nen akasabi rad Kolus na Besor, tinmilak iray arum diman.

10Intuloy nen David so kurang to a kaiba to ray apat a lasus a lalaki; atilak iray duan lasus, ta diad inkaksawan da, ag da nabaliw lay kolus.

11Saramay kaiba nen David akalmo rad bario na ogaw ya Egipsio tan inyakar dad kinen David. Pinakan tan pinainom da;

12initdan da met na pigaran impamagan bungay igos tan duaran monggol a pasas. Kayari ton angan, pinmawil so gendat a biskeg to; diad imbeneg a taloy agew tan taloy labi ag balut angan o inminom.

13Tinepet nen David ed sikato, “Siopay amom, tan taga ka iner?”

“Taga ak Egipto, tan aripen ak na sakey ya Amalecita,” ebat to. “Taloy agew lay apalabas nanlapu lad impangitilak na amok; ta nansakit ak.

14Dinogpaan miy lugar da ray Kereteo, diad sagur na Juda, tan say lugar da ray boleg nen Caleb; pinoolan miy Siclag.”

15“Ibaan mo ak pan onlad kawalaan da ray dinmogpa,” kuanen David.

Inmebat, “Ibaan ta ka no isipan mod ngaran na Dios ya ag yo ak papateyen o ipapalima ed amok.”

16Inibaan to sirin si David a mananap ed sikara.

Akaykayat ed nandoroman pasen iray dinmogpa tan malikeliket iran manaakan tan maniinom, lapud karakel na asamsam dad dalin na Filistia tan Juda.

17Diad palbangon ed ontombuk ya agew, dinogpaan ira nen David tan nilabanan to ra ya anggad labi. Likud ed apat a lasus a babalolakin batik a nankabayod kamilyo, anggapo lay arum ya akabatik.

18Abawi nen David ya amin iray sinamsam na saray Amalecita, pati saray duaran asawa to.

19Anggapon balut so naandi; abawi nen David ya amin iray lalaki tan bibiin anak na saray totoo to, tan amin a bengatlan sinamsam na saray Amalecita.

20Abawi to met ya amin iray baka tan karniro; saray totoo to dinadagdag da ran amin tan kuanda, “Kayaryan nen David ira ya!”

21Insan amawil ed saramay duan lasus a lalakin tinmilak ed gilig na Kolus na Besor lapud inkaksawan dan maung. Inmabet irad kinen David tan saray totoo to; dinago ra nen David tan ampetapetang so impangilugay tod sikara.

22Balet inkuan na saray maoges tan andi-kakanaan a totoon akilad kinen David, “Ag ira akilad sikatayo, kanyan ag ti ra itdan na antokaman ya asamsam. Alaen da labat iray kaasawaan da tan saray anak da tan onla la ra.”

23Balet inmebat si David, “Agagik ira, ag yo ya nayarin gawaen ed saray inter na Katawan ed sikatayo! Inyarawi to tayod kaatapan tan impanalo to itayod saray dinmogpa.

24Anggapoy onabuloy ed satay ibabaga yo! Nepeg a panaapagan yoy betang na balang sakey. Namparay betang na saray ontilak a nambantay na abasto tan saray onlan mibakal.”

25Ginawa nen David yan totontonen et anggad natan, totombuken ni ya na saray Israelita.

26Nen pinmawil ed Siclag si David, impawitan to ray kakaaro to, saray panguloy Juda, na saray asamsam tan impaibaga to, “Niay panangarok ed sikayo; kabyangan ya na saray asamsam mid saray kalaban na Katawan.”

27Impawitan to ray totood Betel, saray totood Ramot a sagur na Juda, tan saray totood Jatir,

28Aroer, Sifmot, Estemoa,

29tan Racal; saray kabyangay boleg nen Jerameel, tan saray Cineo,

30saray totood Horma, Borasan, Atac,

31tan Hebron. Impawitan to ray amin a lugar a nanlalapwan to tan saray totoo to.