Judit 9 - Pangasinan Meaning-Based Bible(MBBPAN83)

Say Pikakasi nen Judit

1Insan ininan nen Judit na dapul so olo to, inlokas toy kawes to pian nanengneng so sakon insolung tod dalem, tan dinmakmomon anggad datal so lupa to. Oras ed saman a niyaapay so insinson para labi diad Timplo ed Jerusalem, tan nampikasi na maksil si Judit:

2“O Katawan, say Dios na lakik a Simeon, nunot mo pa no panoy impangiter mo na ispada ed kinen Simeon, pian makabawi ed saray totoon taga sananey a bansa ya anakep ed kinen Dina a marikit, ginabyas day kawes to, tan dinotakan da onung ed ganggan; nilakseban da tan pinabaingan da; pinasoot dan miakdul ed sikara tan impelag dad kababaingan, anggaman ya insebel mo ya.

3Sikato yay makasengeg na impangyabuloy mon napatey iray pangulo ra; apatey ira ed katrin amasootan dad samay bii. Pinatey mo ran amin, saray aripen, saray prinsipi, tan saray manoley diad trono ra.

4Inabuloyan mon nibatik iray kaasawaan da, naalan priso iray anak dan bibii, tan nasamsam na saray Israelita iray kayaryan da, saray Israelitan pinilim a totoon maseet a mangonur na linawam. Mapalaloy petang na olo da ra may lalakin agagi nen Dina lapud kababaingan na pamilya ra, kanyan kinmerew irad sika na tulong.

“O Dios ko, dengel mo pay pikakasik, say pikakasi na sakey a biin balo.

5Say limam so angiwanwan ed saman ya agawa, tan diad amin ya agawa kasakbayan tan kayari to. Sikay angiplano na amin—say nagagawa natan tan say nagawa ni. Nasusumpal lawas iray amin a planom,

6No antoy labay mon nagawa, sikatoy andi-saew a nagawa. Amtam lan onona so gawaen mo tan no anto ray getman gawaen mo.

7Natan, lalon mabiskeg iray taga Asiria; ikikinon da ray sondalo ran akakabayo tan akaran. Manmamatalek irad saray armas da, balet ag da amta a sika, O Katawan, so bumabakal a mamapatonda na laban. Say Katawan so ngaran mo.

8Diad pasnuk mo, ikanam pay pakayarim a mamuyak ed saray makapanyarin sondalo ra. Implano ran dotakan, onung ed ganggan, so Timplom a pangigagalangan ed sika tan ipelag da iray sokung na altar mo diad panamegley na saray ispada ra.

9Nengneng mo no panoy inkastug tan inkamapasirayew da! Ikalbom pay pasnuk mod sikara! Sakey ak labat a biin balo, balet itdan mo ak pay biskeg a manumpal na planok.

10Ikanam pa ray makapalikdon salitak a mangabil ed sikara ya anggad ag da ipatey ya amin, saray amo tan saray aripen. Iyabuloy mo pan poterey pakayari na bii so biskeg da.

11Ag onsasaral ed karakel tan kabiskeg na saray sondalo so pakayarim. Sika so Dios a mangaasikaso ed saray mapaabeba tan ontutulong ed saray napapairap. Mangiiter kay tulong tan panangyagel ed saray totoon makapoy tan anggapoy nagawaan; ilalaban mo ray totoon nakalan na ilalo.

12Dengel mo pa natan so pikakasik, O Dios na lakik a Simeon, say Dios a panmamatalkan na Israel, manoley na tawen tan dalin, manamalsa na saray ilog tan saray dayat, ari na amin a pinalsa. Dengel mo pay pikakasik tan

13iyabuloy mo pan sugaten tan pateyen na saray makapalikdon salitak iray angiplano na ontan lan karuksaan sumpad sipanan mo tan say masantan Timplom, sumpad Palandey na Sion tan say dalin ya inter mod saray totoom.

14Gawam pan say intiron bansa tan balang tribu et birbiren dan sika so Dios a makapanyarin-amin tan sankabiskegan, tan sika labat so mangyaagel na saray totood Israel!”