1Nen mabiskeg lan niletneg nen Roboam so panooley to, inkaindan to tan amin da ray totoo to so Ganggan na Katawan.
2Lapud saya, dinogpaan nen Ari Sisak na Egipto so Jerusalem diad kumaliman taon na panooley nen Roboam.
3Impangulo to ray sondalo: sanlibo tan duan lasus ya akalogan ed karwahi, anemaplon libo ya akakabayo, tan arum nin sondalo ya ag ira nabilang lapud karakel da, a pati saray taga Libia, saray Sukeo, tan saray taga Etiopia.
4Adakep to ray aliber na padir a siudad na Juda tan linma ya anggad Jerusalem.
5Linmay propita Semaya ed kinen Ari Roboam tan saray pangulo na Juda a nantitipon ed Jerusalem, ta ibabatikan day Sisak. Inkuantod sikara, “Saya so papaibaga na Katawan ed sikayo: ‘Inkaindan yo ak, kanyan natan inkaindan ta kayo ed lima nen Sisak.’”
6Binirbir na ari tan saray pangulo a nankasalanan ira, et inkuanda, “Matonung so Dios.”
7Nen anengneng na Katawan so impanpaabeba ra, akisalita lamet ed kinen Semaya tan kuantod sikato, “Lapud binirbir dan nankasalanan ira, ag ko ra pateyen. Balet no ondogpay Sisak, ngalngalin ag ira mambilay. Ag ondapod Jerusalem so intiron petang na olok.
8Balet taloen ira nen Sisak, et naamtaan da so pandomaan na panlingkur ed siak tan say panlingkur ed saray mangaraldalin a manoley.”
9Nilooban nen Ari Sisak so Jerusalem tan inala to ray kayamanan ed Timplo tan saray kayamanan ed palasio. Inala to ray amin a bengatla pati saramay balituk a samper a ginawa nen Ari Solomon.
10Pian nasalatan ira may samper, nanggawa na saray gansan samper si Roboam tan impalima to rad saray opisyal a makaoley ed panagguardiad saray puirta na palasio.
11Kapag onlad Timplo so ari, awiten na saray guardia ira may samper, insan da ra ipawil ed kuarton panagguardiaan.
12Lapud tinmoluk ed Katawan si Roboam, ag impadapo na Katawan so intiron pasnuk to, et siansian maung so kipapasen na Juda.
Say Segek na Impanoley nen Roboam13Nanoley ed Jerusalem si Roboam tan pinmalaloy pakayari ton ari. Apataplo tan sakey so taon to nen nagmaliw ya ari. Nanoley na labimpitoy taon ed Jerusalem, say siudad a pinili na Katawan, diad intiron dalin na Israel a pasen a pangigalangan ed Katawan. Say ina nen Roboam et si Naama a taga Ammon.
14Maoges iray ginagawa to, lapud ag to nampilalekay mangamtad linaway Katawan.
15Saray ginagawa nen Roboam manlapud gapo ya anggad kasamputan tan say listaan na pamilya to et nikorit ed Say Awaran nen Propita Semaya tan Say Awaran nen Propita Iddo. Legan na impanoley di Roboam tan Jeroboam naynay so impanbabakal da.
16Inatey si Roboam, tan nipompon ed Siudad nen David. Si Abiam a lakin anak to so sinmalat ed sikaton nanari.
Who We AreWhat We EelieveWhat We Do
2025 by iamachristian.org,Inc All rights reserved.
