2 Samuel 14 - Pangasinan Meaning-Based Bible(MBBPAN83)

Implano nen Joab so Ipawil nen Absalom

1Amta nen Joab a lakin anak nen Sarvia a makakailiw lan maung si Ari David ed kinen Absalom.

2Kanyan impaawit toy sakey a biin masilib a taga Tecoa. Kasabi to, inkuanen Joab ed sikato, “Mankonkuanan kan maermen; mambaliwan ka, tan ag mo sasagaysayen so buek mo. Ipanengneng mon sakey kan bii ya abayag lan maneermen.

3Lakad ari tan ibagam ed sikato so paibagak ed sika.” Insan imbaga nen Joab so paibaga to.

4Linma may bii ed ari, dinmakmomo ya anggad dalin a pamagalang to, tan kuanto, “Tulongan mo ak pa, Kagalang kon Ari!”

5“Antoy labay mo,” tepet na ari.

“Balo ak a mairap-bilay,” ebat to. “Inatey lay asawak.

6Walay duaran anak kon laki; aminsan ya agew, nankokol irad kaalogan ya anggapoy makabelsay ed sikara, et apatey so sakey.

7Natan balet, kalaban ak na amin a kakanayon ko, tan labay dan ipalimak ed sikara may sakey ya anak ko, pian napatey da lapud pinatey toy agi to. No gawaen da ya, magmaliw ya anggapoy anak ko! Ekalen day samput a kawalaay ilalok, tan paandian day asawak na anak a mangituloy na ngaran to diad tapew na dalin.”

8Inmebat so ari, “Sempet ka la, ta siak lay akaoley.”

9Inkuan na samay bii, “Kagalang kon Ari, say pamilyak tan siak so nepeg a tetelen ed antokaman a gawaen mo; anggapoy kasalanan mo tan say mapagalang a pamilyam.”

10Inmebat so ari, “No walay manaktakot ed sika, awit mo dia et ag to ka lad satan sigensigenen.”

11Inkuanto may bii, “Mampikasi ka pad Katawan a Dios mo, pian say kanayon kon labay toy ombawi et ag to la labay so mamatey, et diad ontan, ag la napatey imay sakey ya anak ko.”

Inmebat si David, “Isipan kod mabilay a Katawan ya ag balut nadiwit so anak mo.”

12“Iyabuloy mo pan mangibaga ak niy sakey a bengatlad sika, Kagalang kon Ari,” inkuanto may bii.

“On, sigi,” kuan na ari.

13Inkuanto may bii ed sikato, “Akin et onyay ginawam a kaogsan ed saray totoo na Dios? Ag mo abuloyan ya ompawil so anak mon binmatik, kanyan sikan diliy anintinsia a nalilingo ka diad panamegley na samay kapkapangibagam.

14Ompatey itayon amin; aliling tayoy danum a naibung ed dalin, ya ag la nakupkup. Anggan say Dios ag to la pabibilayen iray inatey a totoo, balet nayarian na ari a papawilen so toon nibantak ed arum a bansa.

15Natan, Kagalang kon Ari, say makasengeg na nilaan ko dian mitongtong ed sika et lapud tataktakoten ak na saray totoo; kanyan kuankod siak a dili a mitongtong ak ed sika, ta ag la pigan gawaen moy kerewen kod sika.

16Inisip kon dengelen mo ak tan iyagel mo ak ed toon manggegetman mamatey ed siak tan say anak ko, et diad ontan, naekal to kamid dalin ya inter na Dios ed saray totoo to.

17Inkuankod siak a dili a say sipan mo, Kagalang kon Ari, et iyarawi to ak ed kaatapan, ta say ari et singa anghil na Dios tan napambiigan toy maung tan maoges. Wala komun ed sika so Katawan a Dios mo!”

18Inmebat so ari, “Tepetan ta ka, et ibagam ed siak so amin a katwaan.”

“Mantepet ka, Kagalang kon Ari,” ebat to.

19“Si Joab so nambangat ed sikad saya?” tepet na ari.

Inmebat may bii, “Isambak ed tawen, Kagalang kon Ari, ya anggapoy polaing a makapangipaliis na pangebat ed tepet mo. Say katawan to, si opisyal mon Joab so angibangat na gawaen tan salitaen ko.

20Balet ginawa to ya, pian naapiger so antokaman ya aderal. Balet makabat a singa anghil na Dios so Kagalang kon Ari tan kabat toy amin a nagagawa.”

21Nanagonuyan, inkuan na ari ed kinen Joab, “Ninunot kon gawaen so labay mon nagawa. Laka, ta papawil mo la dia may balolakin Absalom.”

22Si Joab tinmiblak ed dalin a pamagalang to, tan kuanto, “Bindisionan ka komuy Dios, Kagalang kon Ari! Amtak la natan a nalak so maung a linawam, ta inter moy kekerewen ko.”

23Kanyan pinmikal si Joab, linmad Gesur tan pinapawil tod Jerusalem si Absalom.

24Balet ingganggan na ari ya ag manayam ed palasio si Absalom. Inkuanto, “Ag ko labay a nanengneng so lupa to.” Kanyan nanayam ed dilin abung to si Absalom tan ag akiarapan ed ari.

Akapipawilan si Absalom ed kinen David

25Diad intiron Israel anggapoy anggan sakey a toon mipara ed inkabantug nen Absalom lapud inkaguapo to; anggapoy deral to manlapud toktok na olo to ya anggad dapan to.

26Makapakapal so buek to, tan maminsan a mampakatlid sakey taon no andokorokey tan ambelbelat lay buek to. Say naekal a buek to et mambelat na duaran kilo onung na panagsimbang na ari.

27Si Absalom taloray lakin anak to tan sakey so bii a si Tamar a magangganan maung.

28Diad duay taon ya impanayam nen Absalom ed Jerusalem, ag ton balut anengneng so ari.

29Insan to impatawag si Joab, ta paonlaen tod ari; balet ag ondagoy Joab. Impatawag lamet nen Absalom, balet ag nin siansia ondago.

30Kanyan inkuantod saray aripen to, “Dengel kayo, kaabay na alog ko so alog nen Joab, tan walay tanem ton sibada. Laka yo, ta poolan yo.” Kanyan linma ra tan pinoolan da may alog.

31Linmay Joab ed abung nen Absalom tan tinepet to, “Akin et pinoolan na saray aripen mo so alog ko?”

32Inmebat si Absalom, “Ag ka ondago nen impatawag ta kan onla dia, pian nibaki ta kad ari ya ontepet diad ngaran ko: ‘Akin et tinaynan ko niy Gesur tan linma ak dia? Maung la laingen no ag ak inmalis diman.’” Intuloy nen Absalom so nansalita, “Gawam so polaing a pakapitongtong kod ari, tan no walay kasalanan ko, papatey mo ak ed sikato.”

33Kanyan linmay Joab ed kinen ari tan imbaga toy sinalita nen Absalom. Impatawag na ari si Absalom; dinmagoy Absalom tan dinmakmomo ya anggad dalin diad arap na ari. Inawat na ari si Absalom tan inanguban to.