1Diad impisipanan na Katawan saraya so ingganggan to ed kinen Moises ya ipasumpal ed saray Israelita nen wala rad dalin na Moab; amin da ra ya et kaaruman na samay impisipanan na Katawan ed sikara diad Palandey na Sinai.
2Impantitipon nen Moises iray amin a totood Israel tan kuantod sikara, “Anengneng yon dili so ginawa na Katawan ed ari na Egipto, saray opisyal to, tan diad intiron bansa.
3Anengneng yo ra may makapataktakot a salot, saramay milagro, tan saramay ankakabaleg a pakelaw a ginagawa na Katawan.
4Balet anggad natan ag to ni impatalus ed sikayo so kabaliksan na saraman ya asalsali yo.
5Say Katawan inwanwan to kayod a kalawakan et ag balut dinmaan iray kawes tan saray sandalya yo.
6Anggapoy naakan yon tinapay odino nainom ya alak odino antokaman a makabuek, balet inter na Katawan ed sikayo ray nakaukolan yo pian nibangat tod sikayo a sikato et Dios yo.
7Et nen akasabi tayod sayan pasen, pinmaway ya akibakal ed sikatayo ira di Ari Sehon na Hesbon tan Ari Og na Basan. Balet tinalo tayo ra,
8inala tayoy dalin da, tan inapag tayod saray tribu nen Ruben tan Gad, tan diad kapaldua na tribu nen Manases.
9Pampelengan yon onuren iray yan amin a pasusumpal na sayan sipanan, pian onaligwas kayod amin a gawaen yo.
10“Natad sayan agew amin yo et manalalagey ed arap na Katawan a Dios yo—saray pangulo yo tan saray opisyal yo, saray lalaki yo,
11saray bibii, saray anak yo, tan saray sangkailin manaayam ed kawalaan yo a managala ray itotongo tan managasul iray danum yo.
12Wadya kayo natan ya onabubon ed sayan pisipanan ed sikayo na Katawan a Dios yo tan mangawat na saray susumpalen a nipaakar ed sayan sipanan,
13pian napaletan to natan a sikayo ray totoo to tan sikato so Dios yo, onung na insipan tod sikayo tan saray lalaki yon di Abraham, Isaac, tan Jacob.
14Aliwan sikayo labat so pisisipanan na Katawan tan pangiitdan to na sarayan susumpalen.
15Misisipanan ed sikatayon amin a manalalagey natan ed arap to tan ontan met diad saray kabyangay boleg tayon ag ni ra nianak.
16“Amta yo no panoy impanbilay tayod man ed Egipto tan no panoy indalan tayo ed dalin da ray arum a bansa.
17Anengneng yo ray makapaingungot a talintao ran kiew, bato, pilak, tan balituk.
18Manalwar kayo ya anggapoy sakey a laki, bii, pamilya, odino tribu a manalalagey natad sayan agew a mangikaindan ed Katawan a Dios tayo pian mangigalang ed saray diriyos na arum a bansa. Singa ya sakey a lamut a magmaliw ya ampait tan samal a tanaman.
19Pampelengan yo ya anggapo diay anggan sakey ed sikayo ya onderengel ed sarayan pagagawa na Dios, a sisiaen tod sikaton dili a maung lawas so kipapasen to, anggaman a diad gaway awet na olo to et gawaen toy labay to. Pateyen kayo na satan a nagawa, sikayon amin, maung may maoges.
20Say Katawan ag to pirdonaen itan a too. Ingen say mandarlang a pasnuk na Katawan et onliub a sumpad sikato, tan amin a samba a nisulat ed sayan libro et ompelag ed sikato ya anggad sigput a naoput na Katawan.
21Say Katawan pagmaliwen ton sakey a panmarmaran da ray amin a kabyangay amin a tribu na Israel tan ipelag tod sikato so deral onung ed amin da ray samban nikorit ed sipanan a nisulat ed sayan libro na saray bangat na Katawan.
22“Diad saray mantombuk a kailalakan saray kabyangay boleg yo tan saray sangkailin taga arawin dalin et nanengneng da ray deral tan saray kairapan ya impadalan na Katawan ed dalin yo.
23Saray kaalogan et magmaliw iran andi-kakanaan, atabunan na asumpri tan asin; ag nataneman na anggan dinan a tanaman, tan anggapoy anggan dika ya ontobo. Say dalin yo et magmaliw a singa saray siudad na Sodoma tan Gomorra, singa Adma tan Zeboiim a dinederal ira na Katawan nen mapalaloy pasnuk to.
24Insan amin da ray totood intiron mundo tepeten da, ‘Akin et ginawa ya na Katawan ed dalin da? Antoy makasengeg a mapalaloy pasnuk to?
25Et say ebat saya, ‘Say makasengeg et lapud dineral na saray totoo so impisipanan ed sikara na Katawan, say Dios na saray lalaki ra, nen impaway to rad Egipto.
26Nanlingkur irad arum a diriyos ya ag dan balut ginalang nen saman, saray diriyos ya insebel na Katawan a panlingkuran da.
27Kanyan say Katawan akapasnuk ed saray totoo to tan impadalan tod dalin da iray amin a samban nisulat ed sayan libro.
28Nagmaliw a mapalaloy pasnuk na Katawan, tan diad gaway pasnuk to binagut to rad dalin da tan imbantak to rad sananey a dalin, et wadman ira natan.’
29“Wala ray arum a bengatlan iyaamut na Katawan a Dios tayo; balet impaamta tod sikatayo so Ganggan to, et sikatayo tan saray kabyangay boleg tayo nepeg ya onuren tayo ya anggad angga.
Who We AreWhat We EelieveWhat We Do
2025 by iamachristian.org,Inc All rights reserved.
