1Sikato yay propisiya a nipaakar ed Moab.
Aderal a sanlabi iray siudad na Ar tan Kir, tan nakokobutan na bilonget so dalin na Moab.
2Onkakalab ed pokdul iray totood Dibon, ta mannangis irad man ed altar. Saray totood Moab mandageyem irad ermen lapud saray siudad na Nebo tan Medeba; kiniskisan day olo ra tan saray balbas da lapud ermen da.
3Akakawes na sako iray totood daladalan; maermen tan mannangis iray totoo ed saray plasa tan diad saray toktok na abung.
4Manaakis iray totood Hesbon tan Eleale, tan narengel anggad Jahaz so ogaog da. Anggan saray sondalo et manggiwgiw ira; nakalan la ray biskeg na linawa.
5Kaskasian koy Moab! Batik ed baley na Zoar tan diad Eglatshelishiyah iray totoo to. Manakakis ya ontatatdang ed Luhit iray pigaran totoo; saray arum batik irad Horonaim a maksil so panakakis da lapud sinmabin deral.
6Nakatan so Kolus na Nimrim, amagaan iray dikad gilig to, tan anggapoy nakdaan a malambut a dika.
7Bebeltangen na saray totoo so Patar na Kiew a Sausi, ta ombatik iran sankaawit da ray amin a kayaryan da.
8Narerengel so panakakis ed anggan iner a pasen ed saray ketegan na Moab. Narerengel ed saray baley na Eglaim tan Beer-elim.
9Diad baley na Dibon, ambalangad dala so ilog, tan wala niy lalon makapasinagem ya ipadalan diman na Dios. Nagaway pinasyan pampatey ed saray mabilay ya atilak ed Moab.
Who We AreWhat We EelieveWhat We Do
2025 by iamachristian.org,Inc All rights reserved.
