1Kanyan say ari tan si Haman et linma ran mirongo ed kinen Ester
2a pidwa. Nen oniinom iray alak, tinepet na ari ed kinen Ester, “Natan, Riyna Ester, antoy labay mo? Ibagam ed siak, et iter kod sikay anggan kapaldua na impirio.”
3Inmebat si Riyna Ester, “No labay na Kagalang ya Ari ya ipagamur so mugmon kerew ko, say pilalek ko et say pakapaliis ko tan saray totook ed patey.
4Saray totook tan siak et nilako kamin aripen; asamsam iray kayaryan mi, tan natan naderal kami. Amin mi, a pati saray anak mi, et magmaliw kamin aripen. Anggad natan, ag ak inmesel. Aliwan manepeg ya opisyal na palasio so toon kalaban mi.”
5Insan tinepet nen Ari Asuero ed kinen Riyna Ester, “Siopay makatepel a manggawa na ontan? Kawalaan to tan a too?”
6Inmebat si Ester, “Say kalaban mi et sayan toon maoges—si Haman!”
Asabyan na baleg a takot si Haman diad arap na ari tan say riyna.
7Inmalagey so ari, pinmaway ed kuarto, tan linmad tanamanan na palasio. Atalusan nen Haman a maatap so kipapasen to, kanyan tinmilak ta kerewen tod Riyna Ester ya ag la komun napatey.
8Nen pinmawil ed kuarto so arin nanlapud tanamanan, katiktikleb nen Haman ed yorungan a kawalaan na riyna. Diad impakanengneng na ari ed saya, inmeyag, “Labay mo nin pasooten so asawak diad dilin loob na palasiok?”
Nen nadngel ya nen Haman, linmingaw ed biek diad inkaekalan toy ilalo.
9Insan inkuan na sakey ed saray yunuko, a si Harbona, “Si Haman nampagawa ni ingen diad abay na abung to na panagbitayan a pamitayan tod kinen Mardokeo, ya angibagad Kagalang ya Ari na nipaakar ed samay komplut. Duamplo tan talon mitro so kaatagey to!”
“Ibitay yod man si Haman!” ingganggan na ari.
10Kanyan nibitay si Haman ed panagbitayan ya impagawa ton para si Mardokeo. Insan kinmepa so pasnuk na ari.
Who We AreWhat We EelieveWhat We Do
2025 by iamachristian.org,Inc All rights reserved.
