Sirac 26 - Pangasinan Meaning-Based Bible(MBBPAN83)

1Mapalar so lakin asawa na maung a bii; mamidway karokey na pambilay to, lapud asawa to.

2Liket na laki so asawa ton masimpit, tan maliket so pambilay to ya anggad ag to ipatey.

3Say maung ya asawa et sakey ed saray mablin bindision a niiter ed saray lalakin ontatakot ed Katawan.

4Anggan mayaman odino mairap so bilay na sarayan lalaki, maliket ira tan magayaga lawas so nengneng da.

5Walay apatiran bengatlan mamapatakot ed siak: saray aliwan tuan balbalita a niwawakawak ed baley, say grupo na totoon manggaway golo, saray tilatilan panagakusa—maoges ni ra ya nen say patey.

6Balet panlalapwan na sakit na olo tan ermen so pangimon na sakey a bii ed sananey a bii; pasakitan na dila to so amin a too.

7Singa pakon aliway lira to ed tenger so makapoy ya asawan bii. Singa pamemben na alakdan so pamatoluk ed sikato.

8Makapaingungot a nengnengen so sakey ya abuek a bii; ag to niamut so andi-baing a kagagawa to.

9Nibagam so biin aliwan matoor ya asawa diad panamegley na makaayayat tan mankindat iran mata to.

10No ipasoot na anak mon bii so labay to, bantayan mon maung. No ag mo bantayan, anamuten toy antokaman a pankanawnawa to.

11No lawas ton oonuren so labay to manalwar ka, tan ag ka mankelaw no onsumpad sika.

12Diad anggan iner a pasen ikayang to ray ulpo tod siopaman a lakin malabay ed sikato, a singa napgaan a bumabiahi ya inomen toy antokaman a danom a nayarian ton inomen.

13Gayaga na laki so makalakal ya asawa; ombibiskeg so sakey a laki lapud karunongan na asawa to.

14Rigalo na Katawan so asawan bii ya aliwan malabir. Mablin tuloy so ogalin napokpokan so sangi.

15Ag onkupas so ganggana na asawan biin masimpit; ag nasugat so kablian na ontan ya ogali.

16Say ganggana na maung ya asawa diad masinup ya abung to et singa agew ed kaagwan ya onsisinag ed tawen na Katawan.

17Say magangganan lupa to tan say makaayayat ya impanlaman to et singa karakep na liwawan manlalapud masanton lamparaan ed Timplo,

18tan singa balituk a pokel na lamparaan a nilira ed pilak a dapan iray marakep a bikking to tan saray mabiskeg a sali to.,Saray Nanaimanon Makapaermen

28Walay duaran bengatlan mamapaermen ed siak, tan walay kumatlon pamapasnuken to ak:

sakey a sondalon nagmaliw a mairap-bilay,

saray maotek a totoon ag gagalangen,

tan sakey a toon matonung a manggagaway kaogsan.

Patey so panusa na Katawan ed satan a too!

29Mairap a napaliisan na sakey a nigosianti so panggaway makapoy; makasalanan so kapag managlako.