1Saraya so bindision ya inter nen Moises a too na Dios ed saray Israelita kasakbayan na impatey to.
2Say Katawan nanlapud Palandey na Sinai;
inmatagey a singa agew ed tagey na Edom
tan sinminag ed saray totoo to manlapud Palandey na Paran.
Kaiba to ray samplon libon anghil
manliub ya apoy so walad nikawanan to.
3Inaro na Katawan iray totoo to
tan iyaagel to ray totoon kayaryan to.
Kanyan ondakmomo itayod saliyan to
tan onuren tayo ray ganggan to.
4Onuren tayoy Ganggan ya inter ed sikatayo nen Moises,
say Ganggan a sankablian a kayaryan na bansa tayo.
5Say Katawan nagmaliw ya ari na saray totoo ton Israelita
nen nantitipon iray tribu ra tan saray pangulo ra.
6Inkuanen Moises nipaakar ed tribu nen Ruben:
“Ag komun naerep a balut so tribu nen Ruben,
Anggaman a daiset iray kabyangan to.”
7Nipaakar ed tribu nen Juda inkuanto:
“Katawan, dengel mo pay ikekerew day tulong;
Pikasakeyen mo ra lamet ed saray arum a tribu.
Milaban ka pa Katawan, para sikara,
Tan tulongan mo pa ran mibakal ed saray kalaban da.”
8Nipaakar ed tribu nen Levi inkuanto:
“O Katawan, ipaamtam pay linawam diad panamegley na Urim tan Tummim
Diad panamegley na saray matoor ya aripen mon Levita;
Sinubok mo ra ed dalin na Masa
Tan apaneknekan mon matua ra diad danum ed Meriba.
9Impanengneng dan baleg so panangaro rad sika
Nen say panangaro rad saray atateng, agagi, odino anak da.
Inonur da ray ganggan mo
Tan matoor irad impisipanan mod sikara.
10Ibangat da ray totoom a mangonur ed Ganggan mo;
Mangisaklang ira na saray bagat ed altar mo.
11 Katawan, tulongan mo pan ombiskeg so tribu ra;
Manliket ka pa ed gagawaen da.
Temek mo ray amin a kalaban da;
Ag mo pa la ran balut papabangonen.”
12Nipaakar ed tribu nen Benjamin inkuanto:
“Sikato yay tribu ya inaro na Katawan tan iyaagel to;
Guaguardiaan to ran sanagew
Tan manaayam ed pegley da.”
13Nipaakar ed tribu nen Jose inkuanto:
“Say Katawan bindisionan to komun na oran so dalin da.
Bindisionan to met komun na danum a manlapud dalem na dalin.
14Nabindisionan komun so dalin da na bunga na saray tanaman ya alotod agew.
Nawalaan komun na daakan tan sankamaungan iran bungay kiew no panaon na panagbunga.
15Napano komun na masasamit a bungay kiew iray abaybayag lan kapokdulan da.
16Napano komun na amin a kaabigan so dalin da.
Nabindisionan komun na kaabigan na Katawan,
A nansalitan nanlapud mandarlang ya abeban kiew.
Onsabi komun ira yan bindision ed tribu nen Jose
Ta sikato so pangulo da ray agagi ton lalaki.
17Singa biskeg na bakan kalakyan so biskeg nen Jose,
Singa saray saklur na bakad katakelan iray saklur to.
Saray saklur to et singa pigan libon saklur nen Manases
Tan samplon libon saklur nen Efraim.
Pambono to rad saray bansa
Tan pandesdes tod saraya ya anggad saray sokusokung na mundo.”
18Nipaakar ed saray tribu di Zabulon tan Isacar inkuanto:
“Onaligwas komun so tribu nen Zabulon ed panagbiahi to ed dayat,
Tan ondakerakel komun ed abung da so kayamanan na saray kabyangay tribu nen Isacar.
19Imbitaan dad palandey da ray sangkaili.
Tan mangisaklang irad man na manepeg iran bagat.
Diad dayat so pangaalaan day kayamanan da
Tan diad saray buer ed gilig na dayat.”
20Nipaakar ed tribu nen Gad inkuanto:
“Nagalang so Dios ya amaawang na dalin da ray kabyangay tribu nen Gad.
Mantatalaran iran singa lion,
Mantatalaran na bingbingkasen dan taklay odino tapak-tapak na olo.
21Inala ran para sikara so sankaabigan a parti na dalin;
Nipabetang ed sikara so apag na pangulo.
Inonur da ray ganggan tan saray bilin na Katawan
Nen nantitipon iray pangulo na Israel.”
22Nipaakar ed tribu nen Dan inkuanto:
“Sakey a malangwer a lion so tribu nen Dan
Onlulukso manlapud Basan.”
23Nipaakar ed Neftali inkuanto:
“Apenepenek na kaabigan tan bindision na Katawan
iray kabyangan na tribu nen Neftali;
Say dalin da sakop toy anggad abalaten manlapud Dayat na Galilea.”
24Nipaakar ed tribu nen Aser inkuanto:
“Dakdakel niy bindision na tribu nen Aser nen saray arum a tribu na Israel.
Sikato komun so araroen na saray agagi ton lalaki,
Tan dakerakel komun so ontubon kiew na oliba ed dalin to.
25Niagel komun na saray gansa tan balatyang a puirta iray baley to,
Tan arawi ra lawas komun ed kaatapan.”
26Sikayon Israelita, anggapoy dios a miparad Dios yo,
Manloglogan a sigagalang a ombeltang ed tawen.
Manloglogan ya onsorub ed kaloreman ta ondagon ontulong ed sikayo.
27Say andi-anggaan a Dios so lawas manangyagel yo;
saray magnayon a taklay to so sakorung yo.
Pinataynan to ray kalaban yo legan yon mankukurang,
tan imbaga tod sikayon deralen yo ran amin.
28Kanyan manaayam ya arawid kaatapan
iray kabyangay boleg nen Jacob,
mareen so bilay dad sakey a dalin a daakan so trigo tan alak,
diad dalin a linaew so manasalog.
29Israel, agaylay liket mon bansa!
Anggapoy mipara sika,
sakey a bansan inliktar na Katawan.
Say Katawan a dili so samper tan ispadam,
a mangyagel ed sika tan mangiter ed sikay pananalo.
Ondagon mikasid sika iray kalaban mo,
et gatin-gatinan mo ra.
Who We AreWhat We EelieveWhat We Do
2025 by iamachristian.org,Inc All rights reserved.
