Judit 15 - Pangasinan Meaning-Based Bible(MBBPAN83)

Say Impanalo na Israel

1Nen nadngel na saray sondalo so agawa, ataktakot ira

2tan ginmiwgiw irad takot. Akaykayat irad nandoroman dapag manlapud kampo; ag da anggan sinali so mankakasakey, ta nagsibatik la ra ed saray dalan ed kapalandeyan tan saray patar.

3Saray sondalo a nankampod saray palandey ed kaliber-liber na Betulia et ginapoan da met so onsener. Insan linmeksab iray sondalon Israeilta tan dinodogpaan da ra.

4Si Uzias angibaki na totoo ed saray baley na Betomestaim, Bebai, Choba, tan Kola, tan diad intiron baley na Israel a mangibalitad balang too na nipaakar ed agawa tan mananggoyur ed sikara a mikasakey iran mangosil tan mamatey ed saray kalaban.

5Nen nadngel day balita, dinogpaan dan amin iray taga Asiria tan inosilan da ra ya anggad Choba. Pinapatey da ra legan dan ombabatik. Anggan saray totoo ed Jerusalem tan saray arum a manaayam ed kapalandeyan et akikasakey iran dinmogpa, nen imbagad sikara na saray totoon imbaki so agawad kampo na saray taga Asiria. Saray totood dalin na Galaad tan Galilea et sinaraan day dalan na saray onsesener a taga Asiria, tan dakerakel so apatey da. Inosilan da ra ya anggad kaliber-liber na Damasco.

6Linmad kampo na saray taga Asiria iray arum a taga Betulia, sinamsaman da, tan imbatik da ray nala ra a diad karakel et minmayaman ira.

7Nen pinmawil iray Israelita kayari ran nampapatey, inaala da ray atilak-tilak a bengatla. Dakerakel niy atilak, kanyan akapinabang iray totood saray baley tan saray bario.

Sinilibraan na Israel so Impanalo

8Sinmabin manlapud Jerusalem si Joakim a Pangulon Pari tan say Konsiho na Israel, ta nengnengen da ray baleg a bengatlan ginaway Dios para saray totoo to tan abeten day Judit a pipasamanoan.

9Kasabi ra, indayew dan amin si Judit, “Sika so kagalangan na Jerusalem, say palbayani na Israel, say ikikinon tan gayaga na saray totoo tayo!

10Sikan diliy akagamur na sayan pananalo para Israel. Makaliliket so Dios a Makapanyarin-amin lapud ginawam. Bindisionan to ka komun legan mon mambibilay.”

Inmebat ya amin iray totoo, “Amen.”

11Talomplon agew so impakasumpal na saray totoo diad impangaala ray bengatlan atilak-tilak ed kampo na saray taga Asiria. Niiter ed kinen Judit so tulda nen Holofernes, amin a pilak to, saray yaung to, saray kama to, tan amin a kagawaan tod tulda. Inala to ra tan inlogan toy amin a nayarian ya awiten ed beneg na mulo; insan to inawit iray kariton to tan kinargaan to met ira.

12Dinmagon ninmengmeng ed sikato iray amin a bibiin Israelita; kinantaan da na saray dayew tan sinmayaw ira a pamagalang dad sikato. Diad sayan maliket a pansisilibra, inwawasiwas nen Judit tan saray arum a bibii iray sangay kiew tan

13nankorona ray bolung na oliba ed olo ra. Si Judit linmad onaan da ray mansasayaw a bibii tan inwanwan to ra. Tinmombuk ed sikara iray amin a lalaki ed Israel, ya akakorona ra na saray rosas, sankaawit da ray armas da, tan mangankanta ra na saray dayew.