1Diad ontombuk a tiagew, say panaon a saray ari et ompaway iran mibakal, impangulo nen Joab iray sondalo tan dinakep day dalin na Ammon. Balet nanayam ed Jerusalem si David. Nilooban day siudad na Rabba, dinogpaan da tan dineral da.
2Say talintaoy dios na saray Ammonita a si Milcom et walay balituk a korona to a mambelat na sakey a talomplo tan apat a kilo; walay mablin bato ed samay korona. Inala nen David imay bato, insan to inyan ed korona to. Amayamay met ni ray nala ton bengatla ed siudad.
3Inala nen David iray totood mad siudad tan impankikimey to rad panamegley na saray ligari, bukan balatyang, tan wasay. Onya met so ginagawa tod saray totood arum a baley na Ammon. Insan pinmawil ed Jerusalem a kaiba to ray totoo to.
Saray Bakal a Sumpad saray Alan a Filisteo(2 Sam. 21:15-22)4Diad ontombuk a panaon wala lamet so bakal na saray Israelita tan saray Filisteo diad Gezer. Diad sayan bakal pinatey nen Sibecai a taga Husa so sakey ya alan a manngaran na Sipai; atalo ray Filisteo ed sayan bakal.
5Walay sakey nin bakal da ray Israelita tan saray Filisteo. Diad sayan bakal pinatey nen Elhanan a lakin anak nen Jair Lahmi a lakin agi nen Goliat a taga Gat, a say potan na pika to et singa kabaleg na panagpotipotay tinebey ed panaglagaay abel.
6Walay sananey nin bakal ed Gat. Diad sayan bakal walay sakey ya alan ya anemiray gamet na balang lima tan sali to. Sikatoy kabyangay boleg na saray gendat ya alan.
7Sinagyat ton milaban iray Israelita, et pinatey nen Jonatan a lakin anak nen Simea a lakin agi nen David.
8Sarayan talo a pinatey nen David tan saray totoo to et kabyangan ira na boleg na saray alan ed Gat.
Who We AreWhat We EelieveWhat We Do
2025 by iamachristian.org,Inc All rights reserved.
