2 Saray Awaran 15 - Pangasinan Meaning-Based Bible(MBBPAN83)

Saray Pasimbalon Ginagawa nen Asa

1Linmoob ed kinen Azarias a lakin anak nen Obed so ispiritu na Dios,

2insan linman inmabet ed Ari Asa. Inkuanto, “Dengel mo ak, Ari Asa, tan amin yon totood Juda tan Benjamin! Mansiansiad sikayo so Katawan, legan a mansiansia kayo ed sikato. No anapen yoy Katawan iyabuloy ton naalmo yo, balet no ibeneg yo ikaindan to kayo.

3Abaybayag lan panaon a nambilay so Israel ya anggapoy tua a Dios to, anggapo ray papari a mambangat ed sikara, tan anggapoy ganggan.

4Balet nen sinmabiy segsegang, sinmingger irad Katawan a Dios na Israel. Inanap da et arumog da.

5Diad saraman ya agew anggapoy toon makapaliis ed kaatapan, lapud walay segsegang tan golo ed intiron dalin.

6Say sakey a bansa pinairap toy sananey a bansa, tan say sakey a siudad pinairap toy sananey a siudad, lapud ipapasabi na Dios so segsegang tan kairapan ed sikara.

7Balet pabiskeg yoy linawa yo, tan ag yo pakakapoyey sikayon dili. Natumangan iray kimey yo.”

8Apabiskeg so linawa nen Asa nen nadngel toy propisiya nen Azarias a lakin anak nen Obed. Ineekal to ray talintao a walad dalin na Juda tan Benjamin tan amin a talintao da ray siudad ya adakep to ed kapokdulan a bansa na Efraim. Inapiger to met so altar na Katawan a walad patio na Timplo.

9Ingganggan nen Asa a mantitipon iray amin a totoo—saray totood Juda tan Benjamin, tan saray amayamay a totoon akigampid sikato nen anengneng dan walad sikato so Katawan, salanti saray taga Efraim, Manases, tan Simeon, tan natan manaayam la ra ed nanarian to.

10Nantitipon irad Jerusalem nen kumatlon bulan na kumalabinliman taon na panaari nen Asa.

11Diad saman ya agew angibagat irad Katawan na pigarad saramay asamsam da: piton lasus a baka tan piton libon karniro.

12Akisipanan ira a diad intiron puso tan kamarerwa ra panlingkuran day Katawan a Dios na saray lalaki ra, tan nepeg a pateyen so

13siopaman ed sikara ya ag manlingkur ed Katawan, malangwer may matakken, bii may laki.

14Inkasikasil day nansamba ed ngaran na Katawan a sumpalen day impisipanan da, insan ira inmeyag, tan amaknul na saray trumpita tan saray tambuyog.

15Maliket iray amin a totood Juda, lapud akisipanan ira diad intiron puso ra. Nanliket iran nanlilingkur ed Katawan; inawat ira sirin na Katawan tan impanari toy kareenan ed amin a pasen.

16Inekal nen Ari Asa si bai ton Maaca ed kipapasen ton riynan ina, lapud nampagawa na makapaingungot a talintao na diosan Asera. Binatang nen Asa imay talintao, binelang to, insan to pinoolan ed Patar na Cedron iray abelang to.

17Nansiansian matoor ed Katawan si Asa legan na impanbilay to anggaman ya ag to dineral ya amin iray paganon pasen a panangigalangan ed bansa.

18Inyan tod Timplo ya amin iray kagawaan ya insasaklang nen ama to ed Dios. Inyan to met iray balituk tan pilak a kagawaan ya insasaklang ton dili, ed Katawan.

19Anggapo lay bakal ya agawa anggad kumatalomplo tan limay taon na impanoley to.