1Aminsan ya agew tinepet nen David, “Wala niy atilak kasin kabyangay pamilya nen Saul? No wala ni, labay kon kasian makasengeg ed kinen Jonatan.”
2Walay aripen na pamilya nen Saul a manngaran na Siba; nibagad sikato ya onlad kinen David. “Sikay Siba?” tepet na ari.
“On, siak so aripen mo,” ebat to.
3Tinepet na ari ed sikato, “Wala niy atilak kasin kabyangay pamilya nen Saul, pian nakasian ko onung na insipan kod Dios?”
Inmebat si Siba, “Wala niy sakey ed saray anak nen Jonatan, balet lopuy.”
4“Kawalaan to?” tepet na ari.
“Walad abung nen Makir a lakin anak nen Amiel, diad Lo-debar,” ebat nen Siba.
5Kanyan impaawit nen Ari David.
6Nen sinmabiy Mefiboset a lakin anak nen Jonatan tan apo nen Saul, dinmakmomod kinen David a pangigalang to. Inkuanen David, “Mefiboset,” insan inmebat, “Wadya ak ya aripen mo.”
7“Ag ka natatakot,” ebat nen David. “Kasian ta ka makasengeg ed kinen amam a Jonatan. Ipawil kod sikay amin a dalin a kayaryan nen lakim a Saul, tan mangan ka lawas ed lamisaan ko.”
8Dinmakmomo lamet si Mefiboset tan kuanto, “Singa ak la inatey ya aso, katawan! Akin et ontan lay abig na linawam ed siak?”
9Insan tinawag nen David si Siba ya aripen nen Saul tan kuanto, “Iter kod kinen Mefiboset, ya apo na katawan mon inatey la, so amin a kayaryan nen Saul tan say pamilya to.
10Sika, saray anak mo, tan saray aripen mo so ondalus ed dalin para sikato; iter yod sikatoy naani, pian walay taganoy pamilya to. Balet si Mefiboset mangan lawas ed lamisaan ko.” (Si Siba labinliman lalaki so anak to tan duamplo so aripen to.)
11Inmebat si Siba, “Gawaen koy amin ya ingganggan mo, Kagalgalang kon Ari.”
Kanyan angakan si Mefiboset ed lamisaan na ari, a singa sakey ed saray lalakin anak na ari.
12Si Mefiboset walay malangwer ya anak ton laki a manngaray Mica. Nagmaliw ya aripen nen Mefiboset iray amin a kabyangay pamilya nen Siba.
13Kanyan nanayam ed Jerusalem si Mefiboset a lopuy iray sali to. Diad lamisaan na ari so angakanan to lawas.
Who We AreWhat We EelieveWhat We Do
2025 by iamachristian.org,Inc All rights reserved.
