Ecclesiastes 7 - Pangasinan Meaning-Based Bible(MBBPAN83)

Saray Kanunotan a Nipaakar ed Bilay

1Say maung a ngaran et magmaung ni nen say mabmablin pabalingit; say agew na ipatey na too et maung ni nen say agew na inkianak to.

2Magmaung niy onlad abung a walay ermen lapud walay inatey nen say onlad abung a walay ponsia, ta diad iyakar ed kawalaay inatey nipanunot a say patey et manaalagar ed sikatayon amin.

3Magmaung niy ermen nen say elek, ta nayarin pabilongeten toy lupam, balet aruman toy pakatalus mo.

4Makulang-kulang so toon mannununot lawas na nipaakar ed liket. Makabat balet so toon mannununot na nipaakar ed patey.

5Magmaung niy makadngel na pasnuk na toon makabat nen say makadngel na kantan panangidayew na toon makulang-kulang.

6Say elek na toon makulang-kulang et singa masalanisit a kasabitan a napopoolan. Anggapoy kabaliksan to.

7Say toon makabat a manasaol na kapara ton too et singa lamlamang toon makulang-kulang. Say pasoksok deralen toy maung ya inkatoo.

8Say pangangga na bengatla et maung ni nen say gapo to. Say toon maanos maung ni nen say toon mapaatagey.

9Ag ka bengatbengat mamapasnuk; inkakulang-kulang so pomokuk na sakit na linawa.

10Ag mon balut itetepet, “Akin et maung niy kipapasen na bilay nen saman nen say natan?” Aliwa yan tepet na makabat a too.

11Balang toon mambibilay nepeg a walay kakabatan to, ta no walaan kay kakabatan singa ka anawir na kayamanan.

12Say kakabatan iyagel to kad kaatapan a singa pangyagel ed sika na kuarta. Say kakabatan iyarawi to kad kaatapan—sikato yay kamaungan na pakatalus.

13Dalepdep mo no antoy ginawa na Dios. Siopay makapetek ed pikewet a ginawa na Dios?

14Manliket ka no maligen so bilay mo. Balet no nagugunigon ka, nunot mo: iiter na Dios so liket tan say gunigon tan ag mon balut naamtaan no antoy onsoblay a nagawa.

15Legan na andi-kakanaan ya impanbilay ko anengneng koy amin a bengatla. Wala ray totoon matonung ya antikey so bilay da, balet wala ray maoges a totoo ya andokey so bilay da.

16Kanyan ag mo lalabasey inkatonung mo odino say inkakabat mo—akin et pateyen moy sikan dili?

17Balet ag mo met lalabasey inkaoges mo odino inkakulang-kulang mo—akin et ompatey ka kasakbayan na nigetar a panaon?

18Ag mo lalabasey inkaoges odino say inkatonung mo. Igalang moy Dios et onaligwas ka met ni lamlamang.

19Dakel niy nagawaan na kakabatan para sakey a too nen say nagawaan na samploran manoley para sakey a siudad.

20Anggapoy too diad tapew na dalin a manggagawa lawas na kamaungan tan ag balut mankasalanan.

21Ag mo dedengeley amin ya ibabagay totoo—ta ag la pigan narengel moy pangisasambad sika na aripen mo;

22tan amtam ed sikan dili ya amimpiga-piga lay impangisambam ed arum a totoo.

23Inkanak so kakabatan ko diad impanubok kod sarayan amin. Ginetmak a magmaliw ak a makabat, balet ag ko nayarian.

24Panoy pakapikabat na sakey a too ed kabaliksan na bilay? Aralem a tuloy so kabaliksan to, ag nayarin natalusan.

25Inyapasakey koy siak a dili ed pangamta tan panaral; peteg a ginetmak so mansokimat ed kakabatan tan saray ebat na saray tepet ko, tan say pangamtak na kaogsan na inkakulang-kulang.

26Arumog ko a lalon ampait niy bii nen say patey. Singa patit a mangerel ed sika so panangaro tod sika odino singa sakey ya iket; singa golunggolung ya ombaliber iray taklay ton onlakap ed sika. Nibatikan ya na toon makapaliket ed Dios, balet erelen to so toon makasalanan.

27On, kuay Managpulong, nankalkalnan akabatan ko ya, legan kon aanapen iray ebat.

28Nananap ak na arum ya ebat, balet anggapoy arumog ko. Arumog kon sanlibo so sakey a laki a nayarin galangen ko, balet anggapoy anggan sakey a bii.

29Saya labat so naaralan ko: Pinalsa na Dios a maptek so too, balet say too amayamay so sinmeseksek a kaogsan ed olo to.