Ezekiel 21 - Pangasinan Meaning-Based Bible(MBBPAN83)

Say Ispada na Katawan

1Say Katawan akisalitad siak.

2“Sika a toon ompatey,” kuanto, “Mansalita ka sumpad Jerusalem. Mansalita ka sumpad saray pasen a panangigalangan na saray totoo. Pasakbayan mo so dalin na Israel

3a siak a Katawan kuanko: Siak so kalaban yo. Oyusen koy ispadak tan pateyen ta kayon amin, matonung may maoges.

4Ikanak so ispadak sumpad balang sakey a too manlapud baybay ya anggad abalaten.

5Naamtaan na balang sakey a siak a Katawan, inoyus koy ispadak tan ag ko ipawil ed kaluban to.

6“Sika a toon ompatey, mandageyem kan singa ombetag so pagew mod ermen. Dia kad pasen a bambantayan ka na amin a totoo no mandadageyem kad ermen.

7No tepeten dad sika no akin et mandadageyem ka, ibagam ed sikara a lapud onsasabin balita. No onsabi tan a balita, napano na takot so kapusoan da, nalaylay so kalimaan da, naekalan iray biskeg na linawa, tan ompayegpeg iray pueg da. Sinmabi lay panaon; wadya la.” Say Katawan a Dios so nansalita.

8Say Katawan kuantod siak,

9“Sika a toon ompatey, mampropisiya ka. Ibagam ed saray totoo so kuanko, siak a Katawan:

Sakey ya ispada, sakey ya ispada so niyobul tan apasileng.

10Niyobul a mamatey,

apasileng ya onkidyam a singa kirmat.

Anggapoy nagawan panliliket,

lapud ag inasasikaso na saray totoo so pasakbay tan say dusa.

11Apasileng so ispada,

pian niparaan ya ikana.

Niyobul tan apasileng,

pian niderew ed saray lima na pumapatey.

12Managlem kad ermen, sika a toon ompatey;

sayan ispada et ikanan pampatey ed saray totoo

tan diad amin da ray pangulo na Israel.

Napatey ira a kaiba na saray arum a totook.

Tapuk-tapuk moy pagew mo lapud ermen.

13Susuboken ko ray totook,

et no ag ira magbabawi,

nagawa yan amin ed sikara.

14“Sikan too a ompatey, mampropisiya ka natan. Mantipak ka, et ondoyuk lan ondoyuk so ispada. Say ispada so mamatey, ispada a manaktakot tan mamatey na amayamay a totoo.

15Patalawen to ray totook tan tumbaen to ra. Say ispadan mankidyam a singa kirmat tan akaparaan a mamatey so pamapatakot kod siudad da.

16Waswas kad kawanan tan diad kawigi, sikan matdem ya ispada! Mantipas ka iner may naarap mo.

17Pantipaken ko met iray limak, et onkepa lay pasnuk ko. Siak a Katawan so nansalita.”

Say Ispada na Ari na Babilonia

18Say Katawan akisalitad siak.

19Inkuanto, “Sika a toon ompatey, markaan mo so duaran dalan a nayarin laen na ari na Babilonia ya akaispada. Sarayan duaran dalan et onggapo ra ed saksakey a bansa. Mangipaalagey ka na saray tandan pangibiigan diad nansangaan na dalan.

20Say sakey a tanda ipanengneng tod ari so dalan a mamaarap ed Raba a siudad da ray Ammonita, tan say sakey ipanengneng toy dalan a mamaarap ed Juda, diad Jerusalem, say siudad ya aliber na padir.

21Manaalagey so ari na Babilonia diad abay na samay tanda ed nansangaan na dalan. Diad pangamta to no dinay dalanen to, ibuyandak to ray pana to, ipapanon tod saray talintaoy diriyos to; sosokayan toy altey na nibagat ya ayep.

22Bebembenan natan na kawanan a lima to so pana a nanmarka na Jerusalem! Ibabaga na saman a dimay laen to, mangiparaan na saray panmasod saray puirta, oneyag na para bakal, ilira to ray bunton, tan mankotkot na saray tirinsira.

23Ag ya sisiaen na saray totood Jerusalem, lapud saray paknaan a ginawa ra. Balet sayan pasakbay et mangipanunot ed sikara na saray kasalanan da tan pasakbayan to ran nadakep ira.

24Sikato ya sirin so ibabagak, siak a Katawan a Dios: Niparontal iray kasalanan yo. Amta na balang sakey a nankasalanan kayo. Ipapanengneng yo ray kasalanan yo diad panamegley na amin a gagawaen yo. Asintinsiaan kayo lan nadusa, tan iyawat ta kayod saray kalaban yo.

25“Sikan maoges tan nisamba a manoley na Israel, onsasabi lay agew na kaonuran a pakadusam.

26Siak a Katawan a Dios so nansalita. Ekal moy koronam tan say turban mo. Naoman ya amiy bengatla. Itagey mod pakayari iray mairap-bilay! Iyabebam ed kipapasen iray manoley!

27Deral! Deral! On, pagmaliwen kon deral-deral so intiron siudad. Balet ag ya nagawa anggad isabi na samay pinilik a manusad siudad. Sikato so pangiteran ko na siudad.

Say Ispada tan saray Ammonita

28“Sika a toon ompatey, mampropisiya ka. Ibawag mo so ibabagak, siak a Katawan a Dios, ed saray Ammonita a mamapabaing ed Israel. Ibagam ed sikara:

‘Akaparaan lan maneral so sakey ya ispada;

Apasileng a mamatey, onkidyam a singa kirmat.

29Tila ray nanenengneng yon pasingayew, tan aliwan tua iray ipapasakbay yon nagawa. Maoges kayon totoo. Onsasabi lay agew na pakadusa yon siansia. Ondapo lan ontoruk ed pagew yo so ispada.

30“‘Ikaluban yo so ispada! Sintinsiaan ta kayo ed pasen ya amalsaan ed sikayo.

31Nalikna yo so sulit na pasnuk ko no singa apoy ya idapok ed sikayo. Insan ipalima ta kayod saray maruksan totoo a marunong iran manderal.

32Naderal kayo ed apoy. Onterter ed dilim a bansa so dalam, tan anggapo lan balut so makanunot ed sika.’” Say Katawan so nansalita.