Sirac 47 - Pangasinan Meaning-Based Bible(MBBPAN83)

Si Natan

1Kayari nen Samuel sinmabiy Natan, a sikatoy propita nen panaon nen David.

Si David

2No panon a niganan para Katawan so pinilin taba a parti na bagat a para kareenan, ontan met ya apili si David ed saray Israelita.

3Akigalaw ed saray lion tan saray uso, a singa ra labat saray kordiro odino saray kilaw na kanding.

4Nen ogaw ni, pinatey toy sakey ya alan a pangyagel tod saray totoo to. Ininan to na bato so bansut to, impaliteng to, tan pinatonda toy panagpasirayew nen Goliat.

5Nampikasid Katawan, say Sankatageyan, et naitdan na pakayarin mamatey ed samay bantug a sondalo, pian nabirbir na saray bansa so pakayari na saray totoo to.

6Pinagalangan na saray totoo si David, lapud impamatey tod saray totoon nilibo, tan nen akoronaan ya ari, indayew da lapud sikatoy apili na Katawan.

7Inoput ton amin iray kalaban to tan nansiansiay impanalo tod saray Filisteo, kanyan ag la ran balut nagmaliw a katatakotan na saray Israelita.

8Angiter si David na pisasalamat tan dayew ed Masanton Katawan a Sankatageyan diad amin a ginagawa to. Inaro to so Manamalsa to tan kinantaan to na saray dayew ed intiron puso to.

9Angyan na saray kumakanta diad abay na altar a mamawalay marakep a musika.

10Pinili to ray panaon na pampista diad intiron taon tan ginawa to ran magaygayagan silibrasion; sanagew ya inmalingawngaw so Timplo lapud saray dayew ed Katawan.

11Pinirdona na Katawan so kasalanan nen David tan inletneg ton andi-anggaan so pakayari to. Akisipanan ed sikato so Katawan tan marlang a manoley ed Israel iray kabyangay boleg to.

Si Solomon

12Maung so impangiparaan nen David ed dalan para anak ton laki, sakey a toon makabat, a manoley ya onsalat ed sikato.

13Anggapoy bakal legan na impanari nen Solomon. Say Dios initdan toy kareenan diad amin a ketegan na nanarian to, kanyan nayarian toy mangipaalagey para Katawan na sakey a Timplon manalalagey ya anggad angga.

14Agaylay inkakabat mo, Solomon, nen malangwer ka ni! Singa Ilog na Nilo a linmepwas so pakaamtam.

15Kinmayat ed intiron mundo so pakayarim; kabat ed inerman a pasen iray probirbiom tan saray pabitlam.

16Bantug kad amin a pasen tan inaro ka na saray totoo lapud panangiter mo na kareenan.

17Atagey so impangidayew ed sika na saray bansa ed intiron mundo lapud saray kantam, saray probirbiom, saray alimbawam, tan saray makabat a balikas mo.

18Nanaala ka na pilak tan balituk, a singa labat ira lata odino ismay; ginawam ya diad ngaran na Katawan a Dios na Israel.

19Balet say angipelag ed sika et say maoges ya impanpilalek mod saray bibii.

20Minansaan moy ngaran mo tan saray kabyangay boleg mo. Adusa ra lapud kalokowan mo, a makasengeg na impanermenan dan maung.

21Pinaldua toy bansa, tan walay niwalan kalaban a nanarian diad baybay na Israel.

22Balet mapangasi lawas so Katawan tan tooren ton amin iray sipan to. Ag ton balut deralen iray kabyangay boleg nen David, a pinili to tan inaro to. Kanyan lapud Israel, inabuloyan ton mambilay so pamilya nen David.

Si Roboam tan si Jeroboam

23Inatey si Solomon a singa saray lalaki to tan intilak toy Roboam, sakey ed saray anak ton lalaki, a manoley kayari to. Si Roboam melmelag so impanotek to tan baleg so kalokowan to; saray totontonen ya impaakseb to so makasengeg na inlaban da ray totoo.

Wala met si Jeroboam ya ag nibalikas so kaogsan to, tan inwanwan tod maoges a kagagawa so baybay na Israel.

24Nagmaliw a makasalanan iray totoo to, kanyan nibantak ira ed sananey a bansa.

25Sinali ray amin a klasiy kaogsan, anggad binmawid sikara so Katawan.