2 Samuel 16 - Pangasinan Meaning-Based Bible(MBBPAN83)

Si David tan si Siba

1Nen akalabas na daiset si David ed toktok na pokdul, inabet nen Siba ya aripen nen Mefiboset, a wala ray kaiba ton duaran asno a napnoy beneg da na duan lasus a tinapay, sanlasus a monggol na pasas, sanlasus a monggol na kapamborbor a prutas, tan sakey a supot a katat a napnoy alak.

2Tinepet nen Ari David, “Antoy gawaen mod saratan ya amin?”

Inmebat si Siba, “Saray asno luganan na pamilyay ari, saray tinapay tan saray prutas kanen na saray totoo, tan say alak inomen da no naksawan la rad kalawakan.”

3“Kawalaan nen Mefiboset ya apo nen katawan mon Saul?” tepet na ari ed sikato.

Inmebat si Siba, “Manaayam ed Jerusalem, ta sisiaen to ya ipawil natan na saray Israelita ed sikato so nanarian na laki ton si Saul.”

4Inkuan na ari ed kinen Siba, “Kien mo lay amin a kayaryan nen Mefiboset.”

“Siak so aripen mo,” ebat nen Siba. “Maabig lawas komun so linawam ed siak, Kagalang kon Ari!”

Si David tan si Simei

5Kasabi nen Ari David ed Bahurim, inabet na sakey ed saray kakanayon nen Saul, si Simei a lakin anak nen Gera. Nen onsasabi inaayew-ayew to si David.

6Tinutupak toy bato si David tan saray opisyal to, anggaman ya akaliber ed kinen David iray totoo to tan saray managbantay to.

7Insamba nen Simei tan kuanto, “Taynan ka dia! Taynan ka dia! Managpatey na too! Kriminal!

8Inalam so nanarian nen Saul, et natan dudusaen kay Katawan lapud impamatey mod amayamay a kabyangay pamilya nen Saul. Inter na Katawan so nanarian ed anak mon si Absalom, tan aderal ka la, sikan managpatey na too!”

9Si Abisai a lakin anak nen Sarvia kuantod kinen Ari, “Akin et palpaolyan mon ayewen ka na satan ya aso? Abuloyan mo ak pan onla, ta potuten koy olo to!”

10Inkuan na ari ed sanagin si Abisai tan si Joab, “Anggapoy pibabali yod saya. No aayewen to ak lapud imbagay Katawan ed sikato, siopay toon walay kanepegan a manepet no akin et gagawaen to?”

11Insan inkuanen David ed kinen Abisai tan saray amin ya opisyal to, “No say dilin anak ko et labay to ak a pateyen, ag kasi nagkalalo ed satan a Benjaminita? Imbaga na Katawan a manayew; kanyan paolyan yon gawaen to.

12Angangko imanoen na Katawan so pangaskasiyan a kipapasen ko, et itdan to ak na saray bindision ya onsalat ed sayan panaayew to.”

13Kanyan intuloy nen David tan saray totoo to so kurang da. Tinmombuk si Simei, tan diad gilig na pokdul so dinalan to; legan ton manaakar inaagew to ra tan tinutupak to ra na bato tan dabuk.

14Naknaksawan si David tan saray totoo to nen asabi ra so Jordan, kanyan nampainawa rad man.

Si Absalom ed Jerusalem

15Linmoob ed Jerusalem si Absalom tan amin da ray Israelitan kakaiba to; kaiba ra met si Ahitofel.

16Nen si Cusai ya Arkita tan kaaro nen David et nabet toy Absalom, ineyag to, “Andokey komun so bilay na ari! Andokey komun so bilay na ari!”

17Tinepet nen Absalom ed sikato, “Antoy agawad inkatoor mod kaarom a David? Akin et ag ka akilad sikato?”

18Inmebat si Cusai, “Panoy pilak? Nepeg koy migampi ed toon pinili na Katawan, sarayan totoo tan amin ya Israelita. Mikasakey ak ed sika.

19Sakey ni, siopay panlingkuran ko, no ag say anak na dilin katawan ko? Nanlingkur ak ed amam, ontan met a manlingkur ak natan ed sika.”

20Insan inmarap ed kinen Ahitofel si Absalom tan kuanto, “Natan ta wadya itayo la, antoy isimbawam a gawaen tayo?”

21Inmebat si Ahitofel, “Laka, ta akdulan mo ray bibiin inamung nen amam ya intilak to ran manasikasod palasio. Diad ontan, nakabatan na intiron Israel a bobosulen ka nen amam, tan napabiskeg so linawa da ray totoom.”

22Kanyan nanggawa ray tulda a para si Absalom diad toktok na palasio, tan diad pakanengneng na amin a totoo linmoob si Absalom tan akiakdul ed saray bibiin inamung nen ama to.

23Diad saraman a panaon, amin a simbawa nen Ahitofel et nipapasen a singa dilin salita na Dios; tinotombuk ira nen David tan si Absalom.