1Nen nankampod Patar na Acasia iray Israelita, saray lalaki ginapwan day akiakdul ed saray bibiin Moabita a wadman.
2Sarayan bibii iniimbitaan da ra yan lalaki a mipista ed pambagat dad dios na Moab. Saray Israelita angaakan ira tan inggagalang da so
3Baal a dios na Peor. Kanyan akapasnuk so Katawan ed sikara
4tan kuantod kinen Moises, “Tipon mon amin iray pangulo na Israel tan, diad pangonur mod siak, patey mo ra ed arap na karaklan et diad ontan onkepa lay pasnuk kod saray totoo.”
5Si Moises kuantod saray opisyal, “Balang sakey ed sikayo ed nepeg a pateyen toy amin a lalakin kabyangan na tribu to a nagmaliw a manangigalang ed Baal na Peor.”
6Aminsan walay sakey ya Israelitan angawit ed dalem na tulda to na sakey a biin Madianita, legan a sankanengneng nen Moises tan amin ya Israelita a wala rad lolooban na Tuldan Ayamay Katawan ta maneermen ira.
7Nen anengneng ya nen Finees a lakin anak nen Eleazar tan apo nen Aaron a pari, inmalagey tan tinaynan to ra may nantitipon a totoo. Angala na pika,
8tinombuk to may laki tan bii a walad dalem na tulda, insan to ra dinoyuk a dua et pinmaway so ngeroy pika ed kabalgay bii. Diad onya apatonda may salot a mandederal ed Israel,
9balet akapatey la na duamplo tan apat a libon totoo.
10Say Katawan kuantod kinen Moises,
11“Lapud samay ginawa nen Finees, ag ak la mamapasnuk ed saray totood Israel. Ag to inyabuloy so pangigalang ed dinan man a dios likud ed siak, kanyan ag ko ra dineral ya amin ed pasnuk ko.
12Ibagam sirin ed sikato a misipanan ak ya anggad angga ed sikato.
13Sikato tan saray kabyangay boleg to et mansiansia ran pari, lapud ag to inabuloyan so siopaman a manamsam na kipapasen ko tan ginawa toy pakapirdonaan na kasalanan na saray totoo.”
14Say ngaran na samay Israelitan pinatey a kaiba toy sakey a biin Madianita et Zimri a lakin anak nen Salu, pangulo na sakey a pamilya ed tribu nen Simeon.
15Say ngaran na samay bii et Cozbi. Say ama to et si Zur a pangulo na sakey a grupo na saray boleg na Madianita.
16Say Katawan ingganggan toy Moises,
17“Dogpaan yo ray Madianita tan kabil yo ra,
18lapud maoges a ginawa rad sikayo nen pinalikdo da kayo dimad Peor, tan lapud kinen Cozbi a pinatey nen panaon na salot dimad Peor.”
Who We AreWhat We EelieveWhat We Do
2025 by iamachristian.org,Inc All rights reserved.
