Ezekiel 39 - Pangasinan Meaning-Based Bible(MBBPAN83)

Say Katalo nen Gog

1Say Katawan a Dios kuanto, “Sika a toon ompatey, mansalita ka na sumpad Gog a manonan manoley na saray bansa na Mesec tan Tubal, tan ibagam ed sikato a siak so kalaban to.

2Ipadalan kod sananey a dalan, insan ko iwanwan ed bandad baybay ya anggad nasabi to ray kapalandeyan na Israel.

3Kayari to ya, paspasen kon ipelag so bekang na pana ed kawigin lima to tan saray balay pana ed kawanan a lima to.

4Diad satan sikato tan saray sondalo to et ompatey iran kibalatar ed kapalandeyan na Israel tan paolyan kon kanen na saray manok tan saray ayayep ed katakelan iray bangkay da.

5Ompatey iran kibalatar ed maawang ya alog. Siak a Katawan a Dios so nansalita.

6Mangigapo ak na pool ed dalin na Magog tan diad amin a pasen ed gilig na dayat ya ag nasisigensigen ed pambibilay iray totoon manaayam, et naamtaan na balang sakey a siak so Katawan.

7Ipaamtak ed saray totook ya Israel so masanton ngaran ko, tan ag ko la abuloyan a napelag ed kababaingan so ngaran ko. Diad satan nakabatan na saray bansa a siak so Katawan, say masanton Dios na Israel.”

8Say Katawan a Dios kuanto, “Andi-duaruwan onsabi imay agew a sinalitak.

9Saray totoon manaayam ed saray siudad na Israel et ompaway ira tan tiponen dan intongo iray atilak-tilak ya armas. Poolan da ray samper, pana, pika, tan maso, et ag da ra naoput ya ipool legay pitoy taon.

10Ag la ra manalad kaalogan o mambatang na kiew ed katakelan na itotongon kiew, lapud nawalaan ira na atilak-tilak ya itongon armas. Samsaman da ra so nansamsam ed sikara.” Say Katawan a Dios so nansalita.

Say Kipompon nen Gog

11Say Katawan kuanto, “No nagawa la ra yan amin, ibiigan kod Israel si Gog na pomponan a dalin diad Patar na saray Biahiro, diad bokig na Inatey a Dayat. Nipompon diman si Gog tan amin da ray sondalo to, et saman a patar natawag na ‘Say Patar na saray Sondalo nen Gog.’

12Saray Israelita et pitoy taon a mangipompon ed saray amin a bangkay tan manlinis ed dalin.

13Ontulong so balang too ed dalin a mangipompon ed sikara, tan napagalangan irad saya no onsabiy agew na panalok. Siak a Katawan a Dios so nansalita.

14Kalabas na pitoy bulan ed satan, wala ray napilin lalaki a manliber ed dalin, pian naanap tan nipompon da ray bangkay ya atilak ed dalin, et nalinisan da.

15Diad panliber da ed bansa, kapag makalmo ray pokel na too itdan da na tanda so abay to, pian naala na saray managkotkot na abut, insan da ipompon ed Patar na saray Sondalo nen Gog.

16(Diad asingger diman niwala so baley ya inaon so ngaran to ed ngaran na saman a grupoy sondalo). Kanyan say dalin nalinisan lamet.”

17Say Katawan a Dios kuantod siak, “Sika a toon ompatey, paragom ya amin iray manok tan ayayep a walad kaliber-liber, ta mangan iray bagat ya ipaparaan kon para sikara. Balbaleg yan nagawan pista ed kapalandeyan na Israel, tan dia ra makapangan na karni tan makainom na dala.

18Nepeg a mangan ira na laman na saray sondalo tan oninom na dala da ray manoley ed tapew na dalin, a napatey iran amin a singa karniron kalakyan odino kordiro odino kanding, odino mataban bakan kalakyan.

19No pateyen kon singa saray bagat ira yan totoo, saray manok tan saray ayayep kanen day labalabay dan taba tan inomen day nayarian dan inomen a dala.

20Diad lamisaan ko mangan na nayarian dan kanen iray kabayo tan saray kumakabayo, saray sondalo tan saray bumabakal. Siak a Katawan a Dios so nansalita.”

Say Kipawil na Gendat a Kipapasen na Israel

21Say Katawan kuanto, “Abuloyan kon nanengneng na saray bansa so kagalangan ko tan ipanengneng kod sikara no panoy pangikakanak na pakayarik diad pangipakurang kod sintinsian ginawak.

22Manlapud saya naamtaan na saray Israelita a siak so Katawan a Dios da.

23Nakabatan na saray bansa a saray Israelita et nibantak irad arum a bansa, lapud saray kasalanan dad siak. Inkaindan ko ra tan inabuloyan kon taloen tan pateyen ira ed bakal na saray kalaban da.

24Inter kod sikara so kanepegan dan dusa lapud inkarotak tan inkaoges da, insan inkaindan ko ra.”

25Say Katawan a Dios kuanto, “Balet natan kasian ko ray kabyangay boleg nen Jacob, saray totood Israel, tan paaligwasen ko ra lamet. Iyagel ko so masanton ngaran ko.

26No manayam ira lamet ya arawid kaatapan diad dilin dalin da, ya anggapo lay manaktakot ed sikara, nalingwanan da may inkaplag dad kababaingan lapud impantraidor dad siak.

27Diad pangipanengneng kod saray amayamay a bansa a masanto ak, papawilen ko ray totook manlapud saray bansan panaayaman na saray kalaban da.

28Diad satan naamtaan na saray totook a siak so Katawan a Dios da. Naamtaan da ya, lapud imbantak ko rad arum a bansa tan natan titiponen ko ran ipawil ed dilin dalin da, ya anggapon balut so itilak kod sikara.

29Ikalbok ed saray totood Israel so ispirituk tan ag ko la ran balut ikaindan. Siak a Katawan a Dios so nansalita.”