1Sikato yay pasakbay ed dalin na Tiro. Managogul kayod ermen, sikayon managbiahid bapor! Aderal lay puirto yod Tiro; aderal-deral la ray kaabungan tan saray puirto to. Diad ipapawil yo manlapud Chipre, narerengelan yo yan balita.
2Tagleey kayo, sikayo ran nigosiantin taga Sidon! Angibaki kayo ed biek na dayat
3na saray totoo a mansaliw tan manlako na saray trigon ontutubod Egipto tan mannigosiod saray amin a bansa.
4Siudad na Sidon, naplag ka lad kababaingan! Inkaindan ka la na tapew tan say kaaralman na dayat a kuanto, “Ag ak balut nananak. Ag ak balut nampabaleg na saray anak a lalaki tan bibii.”
5Anggan saray Egipsio et natalagnaw tan manermen ira no nakabatan da ya aderal lay Tiro.
6Managogul kayod ermen, sikayon taga Fenicia! Sali yoy ombatik ed Espanya!
7Sikato ta ya may maliket a siudad na Tiro ya abaybayag lan niletneg? Sikato ta ya may siudad ya angibaki na saray nansasakop ed pasen ed biek na dayat?
8Siopay angiplanod sayan deral ed Tiro, say siudad a wala ray sakop ton nanarian tan saray nigosianti to ran prinsipi et sikaray manonan gagalangen ed tapew na dalin?
9Say Katawan a Makapanyarin-amin so angiplano. Implano to ya, pian napatonda toy panagpaatagey da ray taga Tiro ed saray agawgawaan da tan ontan met pian napaabeba to ray gagalangen dan totoo.
10Sikayo ran totood saray dalin a sakop na Espanya, laka yo lan ondalus ed kaalogan yo, ta anggapo lay manebel ed sikayo.
11Inyonat la na Katawan so lima tod tapew na dayat tan tinatalo to ray nanarian. Ingganggan to a deralen dad Fenicia iray pasen a kawalaay ankakabaleg a nigosio.
12Siudad na Sidon, angangga lay liket mo tan napapairap la ray totoom. Anggan ombatik irad Chipre, siansian ag ni ra makaarawid kaatapan.
(
13Saray taga Babilonia, aliwan saray taga Asiria, so angibolus ed saray ayayep ed katakelan a nandederal ed Tiro. Saray taga Babilonia so angipaalagey na saray torin panaglakob ed siudad na Tiro, inggegeba ray padir to, tan tinaynan dan aderal-deral).
14Managogul kayod ermen, sikayon nigosiantid dayat! Aderal lay siudad a nanmatalekan yo.
15Onsabiy panaon a say Tiro et nalingwanan a pitomploy taon, a singa la kabayag na panoley na sakey ya ari. Kayari na sarayan taon, say Tiro aliling toy sakey a biin marotak onung ed sayan kanta:
16Alam so arpam, sika ya alingwanan a marotak a bii,
ta liber moy baley.
Mantogtog ka tan kantam lamet ira may kantam
pian napapawil mod sika iray lalaki.
17No kayari na pitomplon taon, iyabuloy na Katawan a say Tiro et makapawil ed gendat a panaganapan to, tan sikatoy paikana ed amin da ray nanarian ed intiron mundo.
18Say kuartan natubo to ed nigosio et niyapay ed Katawan. Ag to isinup yan kuarta, no ag ingen ikana na saray manangigalang ed Katawan diad pansaliw da na tagano tan saray kawes a nakaukolan da.
Who We AreWhat We EelieveWhat We Do
2025 by iamachristian.org,Inc All rights reserved.
