Deuteronomio 31 - Pangasinan Meaning-Based Bible(MBBPAN83)

Sinalatan nen Josue si Moises

1Intuloy nen Moises so nansalita ed saray totood Israel,

2tan inkuanto, “Sanlasus tan duamploy taon ko la natan kanyan ag ko la nayarian so mangipangulod sikayo. Aliwan satan labat, say Katawan imbaga tod siak ya ag ko baliwen so Jordan.

3Say Katawan a Dios yo et manayam ed onaan yo tan deralen to ray bansan manaayam diman, pian napanayaman yo so dalin; et si Josue so pangulo yo onung na imbaga na Katawan.

4Pateyen na Katawan ira may totoo a singa impanalo tod kindi Sehon tan Og ya arari na saray Amorreo, tan impaneral tod bansa ra.

5Panaloen to kayod sikara, et nepeg yon gawaen ed sikaray onung na imbagak ed sikayo.

6Pabiskeg yoy linawa yo tan manmatalek kayo. Ag yo ra tatakotan. Olupen kayo na Katawan a Dios yo. Ag to kayo paolyan o ikaindan.”

7Insan tinawag nen Moises si Josue tan kuantod sikato ed arap na saray amin a totood Israel, “Pabiskeg moy linawam tan manmatalek ka; sika so mangipangulo ed sarayan totoo a manayam ed dalin ya insipan na Katawan ed saray lalaki ra.

8Say Katawan a dili so mangiwanwan ed sika tan olupen to ka. Ag to ka paolyan o ikaindan; kanyan ag mo pabebeteley linawam tan ag ka ontatakot.”

Saray Ganggan et nepeg ya Ibasa Kapag Pitoy Taon

9Kanyan insulat nen Moises so Ganggan na Dios tan inter tod saray Levitan papari, a makaoley ed Kaban na Sipanan na Katawan, tan diad saray pangulo na Israel.

10Inkuantod sikara, “Diad samput na kapag pitoy taon, no asingger lay panamaandi na saray utang, ibasa yoy Ganggan diad maksil a bosis no Pista na saray Abung-abung.

11Ibasa yod saray totood Israel no onla rad samay pasen na panangigalangan a mangigalang irad Katawan a Dios yo.

12Pantitipon yo ray amin a lalaki, bibii, tan saray ogogaw, tan saray sangkailin manaayam ed saray baley yo, pian narengel dan amin so Ganggan tan naaralan da so ontakot ed Katawan a Dios yo tan matoor dan onuren iray bangat to.

13Diad onya narengel na saray kabyangay boleg yon ag da nin balut arengel so Ganggan na Katawan a Dios yo. Naaralan dad satan so ontoluk ed sikato legan dan manayam ed dalin a ngalngali yo la panayaman diad nibaliw na Jordan.”

Saray Kaonuran a Bilin na Katawan

ed kinen Moises

14Insan say Katawan kuantod kinen Moises, “Antiktikey lay pambilay mo. Tawag moy Josue ta itagar mod mad Tulda pian nabilin ko.” Linma sirin ed Tulda si Moises tan si Josue,

15et pinmanengneng ed sikarad man so Katawan ed sakey a lusek na lorem a nanalagey ed abay na puirtay Tulda.

16Say Katawan kuantod kinen Moises, “Magano lay ipatey mo, et kapatey mo magmaliw iran malamang ed siak iray totoo tan deralen day impisipanan kod sikara. Ikaindan da ak tan mangigalang irad saray paganon diriyos na dalin a ngalngali da lan looban.

17No ontan so nagawa mampasnuk ak ed sikara; ikaindan ko ra, et ompatey ira. Amayamay so ondalan ed sikaran makapataktakot a deral, et nabirbir da ya agawa ra yad sikara lapud andi ak lad sikara, siak a Dios da.

18Ag ko rad satan tulongan lapud maoges so ginawa ra tan angigalang irad saray diriyos.

19“Natan isulat mo yan kanta. Ibangat mod saray totood Israel, pian magmaliw a sakey a tasi a sumpad sikara.

20Iyakar ko rad saman a mayaman tan mataban dalin onung na insipan kod saray lalaki ra. Nawalaan irad man na amin a labay dan kanen; mainawa tan maliket so pambilay dad man. Balet onasingger irad arum a diriyos tan mangigalang irad sikara. Ipolisay da ak tan deralen day impisipanan kod sikara,

21et amayamay a makapataktakot a deral so ondalan ed sikara. Balet nakanta yan kanta, tan magmaliw a sakey a tasi a sumpad sikara. Anggan natan, kasakbayan ko ran iyakar ed dalin ya insipan kod sikara, amtak la so nununoten da.”

22Diad saman ya agew insulat nen Moises imay kanta tan imbangat tod saray totood Israel.

23Insan say Katawan akisalitad kinen Josue a lakin anak nen Nun tan inkuantod sikato, “Pabiskeg moy linawam tan manmatalek ka. Ipangulom iray Israelita ya onlad dalin ya insipan kod sikara, et olupen ta ka.”

24Insulat nen Moises so Ganggan na Dios ed sakey a libro; inapiapiger to pian anggapoy nalingonanan to.

25Kayari ton insulat, inkuantod saray Levitan papari a makaoley ed Kaban na Sipanan na Katawan,

26“Ala yo yan libro na Ganggan na Dios tan iyan yod abay na Kaban na Sipanan na Katawan a Dios yo, pian mansiansiad man a sakey a tasin sumpad saray totoo to.

27Amtak so ontan lan inkaawet na olo ra tan say inkasumlang da. Legan na impanbilay ko sinumlang day Katawan, tan lalo ni ingen so isumlang da no inatey ak la.

28Pantitipon yod arap ko iray amin a pangulo na tribu tan saray opisyal, pian nibagak ed sikara yan bengatla; tawagen koy tawen tan say dalin a mantasi sumpad sikara.

29Amtak a kayariy ipatey ko saray totoo et magmaliw iran maoges tan ipolisay day imbabangat kod sikara. Et diad onsabin panaon nadalan ira na deral, lapud pampasnuken day Katawan diad panggawa ray isesebel to.”

Say Kanta nen Moises

30Imbalikas nen Moises imay intiron kanta tan dinengel na amin a totood Israel.