Say Kakabatan nen Solomon 19 - Pangasinan Meaning-Based Bible(MBBPAN83)

Inkakulang-kulang a Panagbikkel na saray Egipsio

1Balet tuloy-tuloy iray totoon anggapoy Dios a nanlikna na andipanangasin pasnuk mo, anggad kasamputan. Amtam so gawaen da kasakbayan na impanggawa ra.

2Amtam ya anggaman ya inabuloyan dan onsiput iray totoom tan maganat da ran pinataynan, mangoman iray kanunotan tan osilan da ra.

3-4Nen saray Egipsio et maneermen ni rad saray lobuk da ray inaatey da, alingwanan da no akin et agawa ra yan amin, tan makulang-kulang dan ninunot a saramay totoon kinerew dan ontaynan et ontatakas ira. Kanyan inosilan da ra. Niwanwan irad saya, ta sakey yan kabyangan na dusan kanepegan da, pian nalikna da iray nakdaan nin kairapan a kanepegan dan awaten.

5Nasagmak day nidoman ipapatey, legan ya intuloy na saray totoom so makapakelaw a biahi ra.

Inwanwan tan Inyagel na Dios iray Totoo to

6Lapud ganggan mo naoman so intiron sansinakuban, pian ag napasakitan iray totoom.

7Anengneng da may lorem ed petek na kampo ra tan amagan dalin diad nanlapwan na danum. Walay patar a napnoy dika diad nampegleyan na saray ankabaleg a daluyon na Dayat ya Ambalanga, et sikato yay nampainomay ed imbaliw da.

8Anengneng na saray totoom, a walad silong na panangyagel mo, so sayan milagro tan binmaliw ira.

9Mankutapbo ran singa saray kabayon nibolus ed pastolan; manlukso ran singa saray kordiro, tan indayew da ka lapud inlaban mo ra, Katawan.

10Anunotan da ni no panoy impanbilay da nen aripen ira-no panoy impamarakel na mundo ed saray kuto, aliwan saray baka, no panoy impamapaway na ilog ed amayamay a patang, aliwan saray sira.

11-12Insan ag abayag, nen nakaukolan dan mapalalo so magmaung a kakanen, sinmabi ray pugo a nanlapud dayat, pian napesel ira. Say pugo et sakey a manok ya ag da nin balut anengneng.

Say Dusan Niiter ed saray Egipsio

13Balet say maksil a karul et impasakbay toy dusan onsabid saramay makasalanan. Nanlikna ray manepenepeg a dusa, lapud baleg a kaogsan da. Anggapoy bansan ontan lay impanbosul tod saray sangkaili.

14Wala ray totoo ya ag da awaten iray sangkailin onlad sikara, balet inaripen na sarayan totoo iray sangkaili ra tan angipanengneng ed sikara na panangasi.

15Nadusa ya amin iray bansa ya ag mangaawat ed saray sangkaili,

16balet sarayan totoo, ya angawat nen saman ed saraman a sangkaili diad panamegley na maliket iran silibrasyon tan impangipasen dan kapara da ra, et mapalaloy impamairap dad sikara.

17Akabil met ira yan totoo na inkabulag, a singa saramay totood Sodoma a linmad puirtay abung nen Lot a matonung a too. Nalmo ray sikaran dili a wala rad sigput a kabilongetan, legan a karapkarap dan inanap iray kapuirtaan da.

Say Makapakelaw a Pakayari na Dios

18Balang deles na arpa et walay dilin tanul to, balet nayarin itipon so kapag tanul ed saray arum, pian napapaway so nandoroman laineng. Onman so agawa ed saraman ya agew, nen saray dilin iliminto et nanlalauk ira ed balo ran impantitipon. Nengneng yoy agawa!

19Saray ayayep ed dalin et linma rad danum, tan saray manlalanguy a pinalsa et linma rad dalin.

20Dinmalang so apoy anggan diad danum, et ag naerep.

21Balet ag apoolan iray laman na saray ompatey a pinalsa nen nanakar irad apoy tan ag tinonaw na apoy imay mangatatawen a kakanen a natonaw komun a singa yilo.

22Katawan, impagmaliw mon matalonggaring iray totoom-mapagalang irad amin a pamaakaran. Ag mo ran balut inkaindan. Tinulongan mo ra lawas tan anggan iner a pasen.