1Kasian lamet na Katawan iray totoo ton Israelita tan pilien to ran kayaryan to. Panayamen to ra lamet ed saray dilin dalin da, tan ondago ray sangkaili tan miayam irad sikara.
2Dakel iray bansan ontulong ed saray totood Israel diad ipawil da ed dalin ya inter ed sikara na Katawan, tan diman saray bansa manlingkur iran aripen na saray Israelita. Saramay anakep ya aminsan ed Israel et nadakep ira natan na Israel, tan saray totood Israel et oleyan da ra may nampapairap ed sikara nen saman.
Say Ari na Babilonia Diad Pasen a Panaayaman da ray Inaatey3Ekalen na Katawan so kairapan a liliknaen na saray totood Israel, tan say ambelat a kimey ya impasoot ed sikaran gawaen da.
4No gawaen ya na Katawan, nepeg dan ludlureyen so ari na Babilonia tan ikuanda:
“Atalo la so maruksan ari! Ag to lan balut mampairap na siopaman!
5Inekal la na Katawan so pakayari na saray maoges a manoley,
6a diad gaway petang na olo ra et pinapairap da ray totoo tan ag iran balut tinmonda a nampapairap ed saray bansan adakep da.
7Sinmabin siansia ed intiron mundo so inawa tan kareenan, tan mankantad liket so balang sakey a too.
8Saray kiew a saleng tan sidro ed Libano et manliket irad inkatalo na ari, lapud anggapo lay mambatang ed sikara, natan ta naandi lay ari na Babilonia!
9“Sipaparaan lan mangawat ed ari na Babilonia so pasen a panaayaman da ray inaatey. Saray ispiritu na saray makapanyari ed mundo et ag ira makareen. Onaalagey a manlapud trono ra iray ispiritu na saray nanari ed mundo.
10Iyeyag dan amin ed sikato, ‘Makapoy ka met lan singa sikami! Sakey ka met lad sikami!
11Pinapagalangan da ka nen saman na togtog na saray arpa, balet natan wadya ka lad pasen a panaayaman da ray inaatey. Mandokdokul ka natan ed kawalaan da ray bigis tan kobutan da ka!’”
12Ari ed Babilonia, masnag a kabontatalad kabwasan, apattak ka lan nanlapud tawen! Adakep mo ray bansa nen saman, balet natan nibantak ka ed dalin.
13Ginetmam so onkalab ed tawen tan mangipasen na tronom ed tagey da ray sankatageyan a bitewen. Abaloan mon onirung kan sakey ya ari diad toktok na palandey ed baybay a pantitiponan da ray diriyos.
14Imbagam ya onkalab ka ed saray tapew na kaloreman tan magmaliw kan singa Makapanyarin-amin.
15Balet naplag kad sankaaraleman a pasen a panaayaman da ray inaatey.
16Nengnengen ka na saray inaatey tan tepeten da, “Ag ta saya may toon niyegyeg toy mundo tan pinagiwgiw to ray nanarian?
17Ag ta saya man so toon aneral ed saray siudad tan impagmaliw ton kalawakan so mundo? Ag ta sikato ya may toon ag balut angibolus ed saray adakep to odino amasempet ed sikara?”
18Amin ya ararid tapew na dalin nipompon ed saray marakerakep a pantion,
19balet anggapoy pantion mo tan nibantak a naboluk so bangkay mo. Atabunan na saray bangkay da ray sondalon apatey ed bakal; nibantak a pati sikara ed mabaton abut, tan agatin-gatinan.
20Nipompon ka ya aliwan singa saray arum ya arari, lapud dineral moy bansam tan pinapatey mo ray dilin totoom. Napatey ya amin iray maoges a kabyangay pamilyam.
21Igapo lay pampatey! Ompatey ira yan lalakin anak na ari lapud saray kasalanan na lalaki ra. Pateyen ira pian anggapod sikaray manoley ed mundo odino mangiletneg na amayamay a siudad ed tapew na dalin.
Deralen na Dios so Babilonia22Say Katawan a Makapanyarin-amin kuanto, “Dogpaan koy Babilonia tan deralen ko. Anggapoy ikerak ya ogaw odino siopaman a mabilay. Siak, say Katawan, so nansalita.
23Pagmaliwen kon lonek so Babilonia tan panayaman na saray kulayot. Panisan koy Babilonia tan ikanak so panis a mangibantak ed amiamin a bengatla. Siak, say Katawan a Makapanyarin-amin, so nansalita.”
Deralen na Dios iray taga Asiria24Say Katawan a Makapanyarin-amin sinambaan to: “Nasumpal so antokaman ya implanok. Nagawa so antokaman a ginetmak a gawaen.
25Deralen kod dalin na Israel iray taga Asiria tan igatin-gatin ko rad kapalandeyan ko. Ekalen kod panamairap na taga Asiria iray totook tan saray ambelat a nipasakbat ed sikara.
26Sikato yay planok ed mundo; akaonat so taklay kon manusa ed saray bansa.”
27Say Katawan a Makapanyarin-amin et ginetma to la yan gawaen; akaonat la so taklay ton manusa tan anggapoy makapatondad sikato.
Deralen na Dios iray Filisteo28Sikato yay salitan nibawag diad taon ya inatey si Ari Acaz.
29Totood Filistia, apoter so bastun ya amekpek ed sikayo, balet ag yo ya nepeg a panliketan. No ompatey so sakey ya oleg, onsalat so lalon maoges nen say sikato. Ompusnak so mantikyab a dragon ya iknul na oleg.
30Say Katawan magmaliw a sakey a pumapastol ed saray mairap-bilay a totoo to tan pambilayen to ran arawid kaatapan. Balet mangipadalan na eras ed sikayon Filistio tan anggapoy ikera ton mabilay ed sikayo.
31Kolyaot tan kerew kayo na tulong, amin yon totood siudad na Filistia! Takot kayo, amin yo! Ta onsasabin manlalapud baybay so makapal a dabuk—sakey ya olup na saray sondalo ya anggapod sikaray matakot.
32Antoy iyebat mid saray nibakin nanlapud Filistia? Ibaga mid sikara ya inletneg na Katawan so Sion tan saray maniirap a totoo to et makalmo rad man na salimbeng.
Who We AreWhat We EelieveWhat We Do
2025 by iamachristian.org,Inc All rights reserved.
