Sirac 8 - Pangasinan Meaning-Based Bible(MBBPAN83)

Say Pangikanay Kalakal

1Ag mo lalabanan so toon bibirbiren ed baley; nayarin napelag ka ed pakayari to.

2Ag ka mikokolkol ed toon mayaman; nayarin pasoksokan ton onsumpad sika iray totoo. Amayamay lay totoon dinederal na balituk tan pinapaoges toy kanunotan da ray arari.

3Ag ka misasangsangan ed toon mapalaloy inkalabir to; songluran mo labat ed satan so apoy to.

4Ag mo lulureyen so toon aliwliway kagagawa to; nayarin pabaingan to ray lalakim.

5Ag mo babalawen so sakey a too no ibebeneg to lay kasalanan. Ag mo lilingwanan a makasalanan itayon amin.

6Ag mo leleglemewey siopaman lapud matakken la; ontatakken met lay pigarad sikatayo.

7Ag ka manliliket ed impatey na siopaman; ag mo lilingwanan a nepeg ya ompatey itayon amin.

8Ag mo ipopolisay so imbaga na saray makabat a totoo. Aral mo ray probirbio ra; makaaral kad sikara na marakep a panagbilay tan say panlingkur ed saray matalonggaring a totoo.

9Dengel mon maung so ibabaga da ray mamatakken a totoo, ta akaaral ira ed saray akaonan nambilay nen say sikara. Makaaral kad sikara, tan nibangat da ka na sipaparaan ya ebat no nakaukolan.

10Ag mo nepeg so mangiter ed toon makasalanan na pankanawnawa ton mankasalanan ni. Nayarin napasakitan moy sikan dili; singa ya kainomay na pakapoolan no isosonglur mo ray kiew ed pool.

11Ag mo aalageyan tan tataynanan so sakey a toon mapaatagey. Ag la pigan pikeweten to ray salitam tan ikana to ra sumpad sika.

12Ag mo papabayesen na bengatla so siopaman a makapanyari ni nen sika. No gawaen mo ya, ipasen mo lan abalang.

13Ag mo gagawaen a sikay makaoley ed utang na sakey a too no ag mo nayarian. Nepeg ya akaparaan kan mambayar ed inebatan mo.

14Ag mo iririmanda so sakey a huis. Sikatoy manalo lapud betang ya eegnaan to.

15Ag ka mambibiahi no kaolup moy toon anggapoy adya. Gunigon labat so nagunggonam. Gawaen toy antokaman a panliketan ton inaambagel a bengatla, et ompatey kan kaibam.

16Ag ka misasangsangan ed siopaman a mapetang na olo odino mimila ed pasen a bukbukor yon dua. Anggapoy wala ed satan a too so inkaruksa, et dogpaan to ka no anggapoy toon ontulong ed sika.

17Ag ka nepeg ya onkerew na simbawa ed toon kulang na kalakal. Ag to nayarin iyamut so ibagam ed sikato.

18Ag mo nepeg a gawaen ed arap na sangkaili so antokaman a bengatlan nepeg ya iyamut. Non gawaen mo, anggapoy pakaamtaan mo no antoy nagawa.

19Ag mo nepeg ya ipaamtad siopaman iray kanunotan a manepeg a sika labat so makaamta. No gawaen mo, singa pinalabas mo so pankanawnawam a makagamur na liket.