Aggeo 2 - Pangasinan Meaning-Based Bible(MBBPAN83)

Say Karakpan na Balon Timplo

1Nen kumaduamplo tan sakey ya agew na kumapiton bulan na saman lamlamang a taon, say Katawan nansalita lamet diad panamegley nen propita Aggeo.

2Say Katawan impaibaga tod kinen Aggeo so salita tod kinen Zorobabel a gobirnador na Juda, si Josue a Pangulon Pari, tan saray totoo:

3“Siopad sikayo so makanunot na karakpan na samay gendat a Timplo? Antoy pakanengneng yo natan? Arawdawi yan tuloy ed karakpan, anto?

4Balet mampabiskeg kayoy linawa, sikayon amin. Ituloy yoy kimey yo, ta siak so kaiba yo.

5Nen pinmaway kayod Egipto insipan kon siak so kaiba yo lawas. Siak ni so kaiba yo, kanyan ag kayo natatakot.

6“Ag mabayag yegyegen koy tawen tan say mundo, say dalin tan say dayat.

7Taloen kon amin iray bansa, tan niyakar dia iray kayamanan da, tan napano na kayamanan so Timplo.

8Kayaryan kon amin iray pilak tan balituk ed intiron mundo.

9Magmaliw a marakep ni so balon Timplo nen say samay daan, tan itdan ko na aligwas tan kareenan iray totoo.” Say Katawan a Makapanyarin-amin so nansalita.

Angipanonan na Propita iray Papari

10Nen kumaduamplo tan apat ya agew na kumasyam a bulan na kumadwan taon na panaari nen Dario, say Katawan a Makapanyarin-amin akisalita lamet ed propita Aggeo.

11Inkuanto, “Tepet mod saray papari no antoy kuandad totontonen a nipaakar ed saya:

12No bilang ta walay toon sankaawit tod saloy na kawes to so sankategteg a pinasanton karni, insan nisapigar to may kawes to ed tinapay, odino antokaman a niloton kakanen, odino alak, odino larak na oliba, odino antokaman a tagano, magmaliw met man kasin masanton kakanen?”

Nen nitepet ya, saray papari inmebat ira, “Andi.”

13Insan tinepet nen Aggeo, “No bilang ta walay sakey a toon arotakan lapud adiwit toy bangkay, insan to diwiten so sakey ed sarayan kakanen, nadotakan met la ra kasi?”

Inmebat ira may papari, “On.”

14Insan inkuanen Aggeo, “Say Katawan ibabaga to ya onya met so nagawad saray totood sayan bansa tan amin a bungay kimey da tan saray ayayep da; kanyan marotak ya amin iray isasaklang dad altar.”

Insipan na Katawan

so Bindision to

15Say Katawan kuanto, “Ag yo nanaimano so agawad sikayo! Kasakbayan yon inggapoy pamaalagey lamet ed Timplo,

16linma kayod bunton na trigo ya inilaloan yon makala kayoy duamplon sako, balet samsamploray wala. Linma kayon mangaur ed pananginan na limamplon galon na alak, balet duamduamploy nala yo.

17Angibaki ak na makasinit a dagem tan ontan met na kristal ya angoran ed antokaman ya intanem yo, balet siansian ag kayo nagbabawi.

18Natan et kumaduamplo tan apat ya agew na kumasyam a bulan, say agew na impakasumpal na pundasion na Timplo. Imano yo no antoy nagawa manlapud natan.

19Anggaman ya anggapoy atilak ya ilik na trigo, tan ag ni nambunga iray ubas, igos, granada, tan oliba, balet bindisionan ta kayo.”

Say Sipan na Katawan

ed kinen Zorobabel

20Diad saman lamlamang ya agew, say kumaduamplo tan apat agew na bulan, say Katawan kuanton pidwa ed kinen Aggeo,

21“Laka ta ibagam ed kinen Zorobabel a gobirnador na Juda, ya onyay kuankod sikato, ‘Ngalngalik la yegyegen so tawen tan dalin;

22taloen ko ray bansa tan panganggaen koy pakayari ra. Ipabalintuag ko ray karwahi ra tan saray kutsiro ra; ompatey iray kabayo tan mampapateyan iray kumakabayo.

23Diad satan ya agew alaen ta ka, Zorobabel, ya aripen ko tan toroen ta kan manoley ed ngaran ko. Sika so pinilik.” Say Katawan a Makapanyarin-amin so nansalita.