Ezekiel 5 - Pangasinan Meaning-Based Bible(MBBPAN83)

Nampoklis si Ezekiel

1Inkuan na Katawan, “Sika a toon ompatey, mangala kay matmatdem ya ispada tan ikanam ed pambalbas mo tan pangiskis moy olom. Insan mo simbangen ed simbangan so buek mo tan pankatlom.

2Poolan mod siudad so kakatlo to kayariy kalakob to. Alam so sananey a kakatlo tan tartartar mo na ispadam legan mon liliberen so paway na siudad. Ibuyandak mod tagey so akeraan a kakatlo, insan ko ra osil-osilan na ispadak.

3Mangala kay daiset ed sarayan buek, insan mo ibalkut ed saloy na kawes mo.

4Kayari to mangala kay daiset tan ibontuk mod apoy, tan paolyan mo ran ondalang. Manlapud saraya say apoy onkayat ed intiron bansa na Israel.”

5Say Katawan a Dios kuanto, “Nengneng moy Jerusalem. Inlirak ed pegley na mundo tan walad kaliber-liber to ray arum a bansa.

6Balet sinumpa na Jerusalem iray ganggan ko tan impanengneng to a lalon maoges ni nen saray arum a bansa, lalon aliwan maonur nen saray bansan walad kaliber-liber to. Impolisay to ray ganggan ko tan ag to binirbir iray bilin ko.

7Dengel ka natan, Jerusalem, ed saray ibabagak, siak a Dios a Katawan. Diad ag mo impangonur ed saray ganggan tan saray bilin ko, baleg niy gunigon ya inter mo nen saray arum a bansan walad kaliber-liber mo. Inalig mo ray ogali na saray arum a bansa.

8Kanyan siak a Katawan a Dios ibabagak ed sika a siak so kalaban mo. Sintinsiaan ta ka a sankanengneng na saray totood arum a bansa.

9Lapud ginawam iray bengatlan kabosul ko, iter kod Jerusalem so dusan ag ko nin balut inter nen saman tan ag ko lan balut gawaen.

10Lapud sayan dusa, saray atateng ed Jerusalem kanen da ray anak da, tan saray anak kanen da ray atateng da. Dusaen ta kayo tan itaytayak kod anggan iner a pasen iray natilak a mabilay ed sikayo.

11“Ontan sirin, legan a mabilay ak a Dios—sikato yay salita na Katawan a Dios—andi-panangasiy pangipolisay kod sikayo lapud dinotakan yoy Timplok diad panamegley na saray kaogsan tan makapaingungot a ginagawa to.

12Ompatey ed sakit tan eras so kakatlo na totoom ed siudad; napatey ed paway na siudad diad panamegley na ispada so kakatlo na totoom; tan itaytayak ko rad inerman a pasen, insan ko osilan na ispada so arum a kakatlo na totoom.

13“Nalikna yod satan so biskeg na pasnuk tan sanuk kod sikayo ya anggad siak so napenek. No nagawa ra yan amin, manisia ki la a siak a Katawan so nansalita lapud ampetang so olok ed inkalamang yod siak.

14Balawen tan arawian kayo na balang sakey ya ondalan a toon taga saray bansan walad kaliber-liber yo.

15“No ampetang so olok tan mapalaloy pasnuk kod sikayo tan dusaen ta kayo, nataktakot ya amin iray bansan walad kaliber-liber yo. Naingungotan iran onnengneng ed sikayo, tan ludlureyen da kayo.

16Patondaen koy pangitolur na kakanen ed sikayo pian naerasan kayo. Nalikna yo so sulit na eras a singa panan nibolus a maneral ed sikayo.

17Ipadalan koy eras tan mangibaki ak na saray ayayep ed katakelan a mamatey ed saray anak yo, tan mangyakar ak met na sakit, golo, tan bakal a mamatey ed sikayo. Siak, say Katawan, so nansalita.”