Isaias 16 - Pangasinan Meaning-Based Bible(MBBPAN83)

Say Pangaskasiyan a Kipapasen na Moab

1Manlapud kalawakan ed siudad na Sela saray taga Moab et ama-iyakar ira na sakey a kordiron rigalo rad manooley ed Jerusalem.

2Manaalagar irad gilig na Ilog na Arnon, onsulong, ompawil iran anggapoy getma, a singa ra saray manok ya asibwak ed obung da.

3Kuandad saray totood Juda, “Ibaga yod sikamiy gawaen mi. Iyagel yo kami pa; magmaliw kayo pan singa kiew a mangilaknab na anino tod kapetapetangay agew tan pampainawa yo kami pad sirum yo. Ibabatikan mi ray kalaban; iyamut yo kami pad pasen ya ag da kami naalmo.

4Panayam yo kami pa lad dalin yo. Iyagel yo kamid saray malabay a manderal ed sikami.”

(Mangangga so panagpairap tan panagderal, et naandi ray mandederal na bansa.

5Insan magmaliw ya ari so sakey ed saray kabyangay boleg nen David, tan iletneg tod kaptekan tan panangaro so panoley tod saray totoo. Masiglat a manggaway katonungan, tan andi-saew ya ipakurang toy kaptekan.)

6Saray totood Juda kuanda, “Nadngelan min ontan lay panagpaatagey da ray taga Moab. Amta mi a malastug tan anggapoy pangitaltalek da, balet andi-kana ya amin so ipapangaya ra.”

7Onnangis iray taga Moab lapud saray gunigon a liliknaen da. Onakis iran amin diad pakanunot dad saray taganon mananam ya inaakan dad siudad na Kirhareset. Naekalan iray ilalo.

8Aderal iray kaalogan ed Hesbon tan say kaubasan ed Sibma—saray kaubasan a say alak da et iniinom nen saman na saray manoley na saray bansa. Kinmayamkam ya aminsan iray wakal to ya anggad siudad na Jazer tan diad kalawakan diad bandad bokig, ya asabiy anggad basil na Inatey a Dayat diad bandad sagur.

9Nanangisan ko natan iray wakal na Sibma a singa pannanangis kod Jazer. Onteterter so luak lapud Hesbon tan Eleale, ta anggapoy ani a makapaliket ed saray totoo.

10Anggapo la natan so maliket ed saray mataban kaalogan. Anggapo la ray maneeyagan o mankakantaan ed saray kaubasan. Anggapo lay manggaway alak diad panggagatin dad saray ubas; nansamput lay paneeyagan ed liket.

11Manoogaog ak ed ermen lapud agawad Moab tan Kir-hareset.

12Saray taga Moab pakekesawen day sikaran dili ed itatatdang dad saray santuariod tagey na pokdul tan diad saray timplo ra; mampipikasi rad man balet anggapoy nagunggona ra.

13Sikato yay inmonan propisiya na Katawan nipaakar ed Moab.

14Balet natan say Katawan kuanto, “Diad loob na dugarugan taloy taon, naandipat so baleg a kayamanan na Moab. Dagdaiset so nakeraan ed saray amayamay a totoo to, tan nakapoyan ira yan nakeraan.”