1 Saray Awaran 4 - Pangasinan Meaning-Based Bible(MBBPAN83)

Saray Kabyangay Tribu nen Juda

1Sikara yay pigaran kabyangay tribu nen Juda: Fares, Hezron, Carmi, Hur, tan Sobal.

2Si Sobal so ama nen Reaya ya ama nen Jahat. Si Jahat so ama di Ahumai tan Lalad, saray sengeg na saray Zoratita.

3-4Si Hur so sankapangulowanan a lakin anak nen Caleb ed kinen Efrata ya asawa to, tan saray kabyangay boleg to so angiletneg na siudad na Betlehem. Taloray lalakin anak nen Hur: di Etam, Penuel, tan Ezer. Taloray lalakin anak nen Etam: di Jezreel, Isma, tan Idbas. Walay biin anak to a manngaray Hazelelponi. Si Penuel so angiletneg na siudad na Gedor, tan si Ezer so angiletneg na Husa.

5Si Asur ya angiletneg na baley na Tecoa et duaray asawa to a di Hela tan Naara.

6Apatiray lalakin anak da nen Naara: di Ahuzam, Hefer, Temeni, tan Naahastari.

7Taloran lalaki so anak di Asur tan Hela: di Zeret, Izhar, tan Etnan.

8Si Coz so ama di Anub tan Zobeba, tan sikato so sengeg na saray kabyangay boleg nen Aharhel a lakin anak nen Harum.

9Walay lakin manngaray Jabes; sikatoy anak a gagalangen nen saray agagi to. Inngaran nen ina to na Jabes, lapud nairapan a maung ed impangyanak tod sikato.

10Nampikasiy Jabes ed Dios na Israel, “Bindisionan mo ak pa, O Dios, tan itdan mo ak pay maawang a dalin. Ibaan mo ak pa tan iyagel mo ak ed maoges pian ag ak napasakitan.” Et inter na Dios iray kinerew to.

Saray Listaay Arum a Boleg

11Si Caleb, a lakin agi nen Suha, et walay lakin anak to a si Mehir. Si Mehir so ama nen Eston.

12Taloray lalakin anak nen Eston: di Bet-rafa, Pasea, tan Tehina. Si Tehina so angiletneg na siudad na Nahas. Sikara yay sengeg na totoon nanayam ed Reca.

13Duaray lalakin anak nen Kenaz: di Otniel tan Seraya. Duara met so lalakin anak nen Otniel: di Hatat tan Meonotai.

14Si Meonotai so ama nen Ofra.

Si Seraya so ama nen Joab ya angiletneg na Ge-harasim a dimay panaayaman na saray totoon marunong a kumikimey.

15Taloray lalakin anak nen Caleb a lakin anak nen Jefone: di Iru, Ela, tan Naam. Si Ela so ama nen Kenaz.

16Apatiray lalakin anak nen Jehalelel: di Zif, Sifa, Tiria, tan Asarel.

17-18Apatiray lalakin anak nen Ezra: di Jeter, Mered, Efer, tan Jalon. Inasawa nen Mered si Bitia ya anak na ari ed Egipto; walay sakey a biin anak da a si Miriam, tan duaray lalakin anak da a di Samai tan Isba. Si Isba so angiletneg na baley na Estemoa. Inasawa met nen Mered so sakey a biin kabyangay tribu nen Juda, tan taloray lalakin anak da a di Jered ya angiletneg na baley na Gedor, Heber ya angiletneg na baley na Soco, tan Jecutiel ya angiletneg na baley na Zanoa.

19Inasawa nen Hodias so agi nen Naham. Saray kabyangay boleg da so sengeg na saray Garmita a nanayam ed baley na Ceila, tan saray Maacatita a nanayam ed baley na Estemoa.

20Apatiray lalakin anak nen Simon: di Amnon, Rina, Benhanan, tan Tilon.

Duaray lalakin anak nen Isi: di Zohet tan Ben-zohet.

Saray Kabyangay Boleg nen Sela

21Si Sela et sakey ed saray lalakin anak nen Juda. Saray kabyangay boleg to et di Er ya angiletneg na baley na Leca; Laada ya angiletneg na baley na Maresa; saray pamilya na saray managinaramey na linen a nanayam ed baley na Asbea;

22Jokim tan saray totoon nanayam ed baley na Cozeba; Joas tan Seraf ya angasawa rad saray bibiin Moabita, insan ira pinmawil ed Betlehem. (Abaybayag lan maung ira yan awaran.)

23Nanayam irad saray baley na Netaim tan Gedera; manlilingkur irad ari diad panggagawa ray banga.

Saray Kabyangay Tribu nen Simeon

24Limaray lalakin anak nen Simeon: di Nemuel, Jamin, Jarib, Zera, tan Saul.

25Say lakin anak nen Saul et si Sallum, say lakin apo to et si Mibsam, tan say lakin apo tod pueg et si Misma.

26Si Misma so ama nen Hamuel. Si Hamuel so ama nen Zacur ya ama nen Simei.

27Labinanem a lalaki tan anemiran bibii iray anak nen Simei, balet daiset so anak na saray kakanayon to. Kanyan ag dinmakel iray kabyangay tribu nen Simeon, aliwan singa indakel na saray kabyangay boleg nen Juda.

28Sarayay onggendan a baley so nanaayaman da ray kabyangay boleg nen Simeon: Beer-seba, Molada, Hazarsual,

29Bilha, Ezem, Tolad,

30Betuel, Horma, Siclag,

31Bet-marcabot, Hazarsusim, Bet-biri, tan Saaraim. Sikara yay boleg a nanaayaman da, anggad inggapo na impanoley nen ari David.

32Nanayam met ni rad saray onggendan a limaran lugar: Etam, Ain, Rimon, Token, tan Asan,

33tan diad saray kaliber-liber dan bario ya anggad abalaten a sagur na baley na Baal. Sikara yay insinup dan listaan na saray pamilya ra tan saray lugar a nanaayaman da.

34Pangulo na saray boleg da iray onggendan a lalaki: Mesobab, Jamlec, Josa ya anak nen Amasias,

35Joel, Jehu (ya anak nen Josibias, ya anak nen Seraya ya anak nen Asiel),

36Elioenai, Jaacoba, Jesohaya, Asaya, Adiel, Jesimiel, Benaya,

37Ziza (ya anak nen Sifi ya anak nen Allon; si Allon so anak nen Jedaya ya anak nen Simri ya anak nen Semaya).

38Sikara yay lalakin pangulo na saray boleg da.

Lapud ondarakel lan ondarakel so kabyangay pamilya ra,

39kinmayat irad bandad sagur ya angga lawarid Gerar, tan impapastol da ray karniro ra diad bokig na patar a kawalaay siudad.

40Akalmo rad may amayamay a mabonan pastolan diad maawang ya alog, mareen tan arawid kaatapan. Saray Hamita so nanayam diman nen saman.

41Diad panaon nen Ezekias ya arid Juda, linmad Gerar iray lalakin asalita la. Dinederal da ray tulda tan pinapatey da ray Meunim ya asabian dad man. Nansiansia rad man a nanayam, lapud walay pangipastolan dad saray karniro ra.

42Linmad palandey na Seir iray liman lasus a kabyangay tribu nen Simeon. Saray angipangulo ed sikara et saray lalakin anak nen Isi a di Pelatias, Nearias, Refaias, tan Uziel.

43Pinapatey dad man iray akeraan ya Amalecita tan manlapud saman nanayam la rad man.