Isaias 1 - Pangasinan Meaning-Based Bible(MBBPAN83)

1Diad sayan libro nisulat iray impasingayew na Dios ed kinen Isaias a lakin anak nen Amoz legan na impanari ed Juda di Uzias, Jotam, Acaz, tan Ezekias.

Nampasnukan na Dios iray Totoo to

2Inkuan na Katawan, “Sikayon tawen tan mundo, dengel yoy ibagak! Linmaban ed siak iray pinabaleg kon anak.

3Amta na saray baka iray akankaryan ed sikara, tan amta na saray asno no iner so pamapakanan ed sikara na amo ra. Balet ag ak amta o natalusan na saray totook ya Israelita.”

4Nadudusa ka, sika a makasalanan a bansa, sikayon marotak tan maoges a totook! Ikokotep ka na saray kasalanan mo! Impolisay moy Katawan a masanton Dios na Israel tan imbeneg mo.

5Akin et itutuloy moy onsumpa? Labay mon ompalaloy pakadusam? Israel, asugat-sugat lay olom, tan wala lay sakit na pusom tan say kanunotan mo.

6Maletey so intiron laman mo. Aliber so laman mo na saray sugat, giri, tan saray tinmeterak a larag. Ag alinisan o aberber iray sugat mo. Ag ira anggan nainan na tambal.

7Nagmaliw ya apaolyan so bansa yo tan tinemek na apoy iray siudad yo. Sankanengneng yon sasakopen na saray taga arum a bansa so dalin yo tan dederalen day amin a bengatla.

8Jerusalem labat so nakdaan ya aliktub a siudad—singa la ag makapangyagel a bantayan ya abung ed kaubasan odino alolung ed alog na kamilonan.

9No ag labat inyabuloy na Katawan a Makapanyarin-amin a niagel iray pigaran totoo to, sigput komun ya aderal so Jerusalem, a singa inkaderal na Sodoma tan Gomorra.

10Jerusalem, saray manoley mo tan saray totoom et singa ra saray manoley tan saray totoo ed Sodoma tan Gomorra. Dengel ka ed ibabagad sika na Katawan. Talineng moy ibabangat ed sika na Dios tayo.

11Kuanto, “Say abaloan yo labay ko ray bagat ya itutuloy yon isasaklang ed siak. Andi! Sinmawa ak la ed saray popoolan yon bagat tan saray taba na saray sankaabigan ya ayayep yo. Ag ko la labay so dala da ray bakan kalakyan, saray karniro tan saray kanding.

12Siopay angibagan mangawit kayo na sarayan ayayep no mangigalang kayod siak? Siopay angiganggan ed sikayon gatin-gatinan yoy kaliber-liber na Timplok?

13Andi-kakanaan so mangawit na saray bagat yo. Nanaingungotan ak lad balingit na insinson ibabagat yo. Ag ko la naanosan iray Balon Bulan a Pista yo, saray Agew na Panagpainawa yo, saray masanton panagtipon yo; nagmaliw iran andi-kakanaan lapud saray kasalanan yo.

14Kabosul ko ray Balon Bulan a Pista yo tan saray masanton agew yo. Ag ko la ra naanosan a sakbaten.

15“Onlingaw ak ed biek no itagey yo ray lima yo a mampikasi. Ag ta kayo dengelen anggan mansosoldungay pikakasi yo, lapud dala ya amin so lima yo.

16Orasan yoy sikayon dili. Tondaan yoy amin a kaogsan a nanenengneng kon gagawaen yo. On, tondaan yo lay panggagawa yoy kaogsan

17tan manaral kayo lan manggaway kamaungan. Ipakurang yoy kaptekan ed saray katoowan—tulongan yo ray napapairap, iyagel yo ray olila, tan imasakit yo ray balo.”

18Say Katawan kuanto, “Gali dia natan, ta mampapalinewan itayo. Anggaman a marotarotak kayod kasalanan, pagmaliwen ta kayon malinis a singa yilo. Anggaman ya ambalangan singa dala iray kasalanan yo, pagmaliwen ta kayon singa kapotiy bagoy karniro.

19No onuren yo ak, kanen yo ray maabig a bengatlan bungay dalin.

20Balet no ipolisay tan labanan yo ak, andi-duaruwan ompatey kayo. Siak, say Katawan, so nansalita.”

Say Makasalanan a Siudad

21Say siudad a matoor nen saman et nagmaliw la natan a singa marotak a bii! Nen saman matonung a totoo iray manaayam diman; balet natan saray managpatey na totoo labat lay manaayam.

22Jerusalem, singa ka pilak nen saman, balet natan andi-kakanaan ka la; singa ka masamit ya alak nen saman, balet natan danum ka labat.

23Mananumpa iray pangulom tan kakaiba ra na saray matakew; labalabay day mangawat lan mangawat na rigalo tan saray pasoksok. Balet ag da iyaalagey ed korti iray olila, odino onderengel ed pankatonungan na saray balo.

24Kanyan dengel yo natan so ibabaga na Katawan a Makapanyarin-amin, say Makapanyarin Dios na Israel, “Ombawi ak ed sikayo ran kalaban ko, et ag yo ak lad satan nasigensigen.

25Walay gawaen ko sumpad sikayo. Linisan ta kayon singa panagpalba ed mital, tan ekalen koy amin a dotak yo.

26Itdan ta kayo na saray pangulo tan saray sumisimbawa yo a singa nen saman. Diad ontan, say Jerusalem natawag a matonung tan matoor a siudad.”

27Lapud matonung so Katawan, iyagel toy Jerusalem tan amin da ray wadman a magbabawi.

28Balet deralen toy balang sakey a mankakasalanan tan onlalaban ed sikato; pateyen toy siopaman a mangikaindan ed sikato.

29Ombaing kayo lapud impangigagalang yod saray kiew tan lapud impanggawa yo ray masanton tanamanan.

30Onlenes kayon singa ompapatey a kiew a robli, singa tanamanan ya anggapoy mansalug.

31No panon a napadalang na anggan melmelag ya apoy so amagan dayami, ontan met a naderal iray makapanyarin totoo diad panamegley na saray dilin maoges a gawgawa ra tan anggapoy makapatonda na kaderal da.