Sirac 7 - Pangasinan Meaning-Based Bible(MBBPAN83)

Nandoroma ran Simbawa

1-2No ag ka manggawa na makapoy, anggapoy makapoy ya onsabid sika.

3Ag mo babakaen so dalin a taneman na saray bokel na aliwan inkatonung; nayarin manani ka na dakdakel nen say iilaloan mo.

4Ag ka onkekerew ed Katawan na sakey a pasen na kagalangan odino onkerew kad ari na sakey a manonan kipapasen.

5Ag mo sasalien a panisiaen so Katawan a matonung ka odino ipantam so kakabatan mo diad arap na ari.

6Ag mo pampipilalekan so magmaliw a sakey a huis, likud no walad sikay mabiskeg ya inkatoon mamatondad pikewet a nagagawa.

7Ag ka manggagaway krimin sumpad karaklan, tan ag mo ipepelag so sikan dili ed kababaingan diad pegley da ray kabansaan mo.

8Ag mo pipidwaen so ginawam a kasalanan. Manepeg a masarag lay dusan asagmak mo ed inmona.

9Ag mo nununoten a birbiren na Sankatagyan a Dios so ontan lan inkabonluk mon mangiter, kanyan awaten toy antokaman a labay mon isaklang.

10Ag ka onsasawan mampikasi, tan ag mo papalabasey pankanawnawam a mangiter ed saray mairap-bilay.

11Ag mo eelekan so toon apaabeba. Say Katawan so mamapaabeba ed too, balet say Katawan met so mamapaatagey ed sikato.

12Ag ka mannununot na saray tilan ibagam nipaakar ed saray kakaarom.

13Ag kan balut mantitila. Ag yan balut makapanggawa na antokaman a kamaungan.

14Diad ingganan tipon, ag ka onaalagey a mansalitay dakel ya andi-kakanaan. Ag mo ooliten so pikakasim.

15Ag mo sasalien a paliisan so kimey ed alog odino say arum a mairap a kimey; inter na Sankatagyan ira yan kimey a gawaen tayo.

16Ag ka mioolup ed tipon da ray managkasalanan; ag mo lilingwanan ya andi-saew ya onsabi so pananusa na Katawan.

17Mampaabeba ka a maung, lapud manaalagar ed sikatayon amin so kaboboluk ya iter na patey.Say Pisisiglaotan ed Arum a Totoo

18Ag mo pantratraidoran so sakey a kaaro lapud kuarta. Ag mo pantratraidoran so peteg a kaaro, lapud amin a balituk ed intiron mundo.

19Ag mo papalabasen so pankanawnawam a mangasawa na makabat tan maung a bii. Mabli ni nen say balituk so masimpit ya asawan bii.

20Ag mo lulukoen so aripen a maung so pankikimey to, odino say kumikimey a gagawaen toy anggaay nayarian ton para sika.

21Ipanengneng mod makabat ya aripen so panangaron labay mon ipanengneng ed sikan dili, tan abuloyan mon walay kawayangan to.

22Apiapiger moy pangasikasom ed saray dilin ayayep mo. No nanaitdan da kay kuarta, pansiansiam iran kayaryan.

23No wala ray anak mon lalaki, panaral mo ra. Ibangat mo ran peteken day sikaran dili legan a malangwer ni ra.

24No wala ray anak mon bibii, pansiansiam iran masimpit, tan ag mo ra papalongkitan.

25No apaasawam so anak mo, agawaan moy baleg a kimey, balet paasawam ed makalakal a laki.

26No walay maung ya asawam, ag mo isisian, balet ag mo imamatalek so sikan dili ed siopaman ya ag mo inaro.

27Igalang moy amam ed intiron pusom, tan ag mon balut lilingwanan a mapalaloy impanirap nen inam nen nianak ka.

28Ag mo lilingawanan ya utang moy bilay mod sikara. Panoy pakabayar mod sikara ed amin a ginawa ran para sika?

29Takotan mod intiron pusom so Katawan, tan pagalangan mo ray papari to.

30Arom ed intiron biskeg mo so Manamalsam, tan iter moy tulong mo ed saray ministro to.

31Igalang moy Katawan tan pagalangan mo ray papari. Iter mod sikara iray niganggan ed sikan iter mo: say ononan naanim, say bagat a para kasalanan, say takeb na ayep a para bagat—amin da ray manepeg a bagat tan saklang.

32Iter moy tulong mod saray mairap-bilay, et iter na Katawan so nagnap a bindision to.

33Mangiter kan mabonluk ed balang kamarerwa, tan ag mo isisiblet so panangarom ed saray inaatey.

34Ipanengneng moy panagabagey mod saray akabalang na inaro dad bilay, tan midamay kad ermen da.

35Ag mo panduaduaruwaay pambisitam ed saray mangiinagem. Sika so naaro lapud singa sarayan bengatla.

36Antokaman a gawaen mo, ag mo lilingwanan a waly agew na ipatey mo. Legan a pinunot mo ya, ag kan balut mankasalanan.