Tobit 7 - Pangasinan Meaning-Based Bible(MBBPAN83)

Diad Abung nen Raguel

1Kaloob nen Tobias tan si anghil Rafael ed siudad na Ecbatana, si Tobias inkuanto, “Kaaron Azarias, iyakar mo ak a tampol ed kinen Raguel, ta labay kon pinengnengan.” Inyakar nen Rafael si Tobias ed abung nen Raguel, tan asabian dan manyodyorung ed lolooban na solar to. Inmonan angigalang si Rafael tan si Tobias ed sikato; insan inmebat si Raguel, “Loob kayo, kakaaro. Maliket ak a mangawat ed sikayo!”

Pinaloob nen Raguel ed abung to iray sangkaili to

2tan inkuantod kinen Edna ya asawa to, “Ag ta kaluplupa nen kapinsan kon Tobit yan balolaki?”

3Tinepetan ira nen Edna, “Nanlapwan yo?”

“Israelita kami a kabyangay tribu nen Neftali,” ebat nen Tobias tan si Rafael, “balet manaayam kami la natan diad siudad na Ninive na Asiria, ta diman so nibantakan mi.”

4“Kabat yoy kapinsan min Tobit?” tepet nen Edna.

“On, kabkabat min maung,” ebat dan dua.

“Komusta si Tobit?” tinepet nen Edna.

5Inmebat ira. “Mabilay tan mabiskeg ira.”

Insan intombuk ya inkuanen Tobias, “Amak si Tobit.”

6Diad saya inmalagey si Raguel, akaterter iray lua to lapud liket to, tan inanguban toy Tobias.

7Insan inkuanto, “Bindisionan ka komun na Dios, anak ko. Maung tan mapagalang a too si amam. Makapasinagem a tuloy so agawad kinen amam! Abulag, anta toon matwa tan mabonluk a mangiter ed kapara ton too.” Nilakap nen Raguel si Tobias tan nanakis ed saray takeb to.

8Akaakis met ira di Edna tan si Sara, lapud kipapasen nen Tobit.

Ampetang so impangawat nen Raguel ed kindi Tobias tan Rafael. Impapatas toy sakey ed saray kalakyan a karniro to. Kayarin nanames ira may sangkaili, tan nen ondongo la ran mangan, inkuanen Tobias ed kinen Rafael. “Kaaron Azarias, kapigan mo ibagad Raguel so pangyabuloy ton asawaen koy Sara?”

9Balet nadngel nen Raguel so tepet nen Tobias ed kinen Rafael kanyan inkuantod kinen Tobias,

10“Mangan tan inom kayo nin onona tan manliket kayod sayan labi. Walay kanepegan mon mangasawad kinen Sara, tan ag ko nayarin ipaasawad arum, ta sika so sankaasinggeran a kanayon ko. Balet nepeg ya ibagak ed sikay tua, anak ko.

11Amimpito lan impiasawak ed lalakin kakanayon ko, balet inatey so balang sakey ed sikara diad samay labi na bansal, no onloob lad kuarton ogipan da. Balet natan, anak ko, mangan tan inom kayo. Say Katawan so mangasikasod sikayon dua.”

“Ag ak mangan odino oninom,” ebat nen Tobias, “anggad narengel koy ebat mo.”

12Inmabubon si Raguel tan kuanto, “On, onabuloy ak. Iter kon asawaen mo, onung na ibabagay Ganggan nen Moises. Imparaan na Dios na tawen yan panasawa yo, kanyan alam ya asawam. Manlapud natan, saksakey kayo lan laman. Kayaryan mo la si Sara manlapud natan a labi ya anggad angga. Iyagel kayo komun na Katawan na tawen diad sayan labi. Abageyen tan kasian to kayo komun.”

Say Sirimonya na Kasal

13Insan tinawag nen Raguel si anak ton Sara. Kaloob nen Sara, inala tod lima, insan to inyawat ed kinen Tobias tan bindisionan to ra a kuanto, “Onung na ibabagay Ganggan nen Moises, awat mon asawa si Sara. Kaibam lan onsempet ed abung nen amam. Ag mo papaolyan. Say Dios a walad tawen et itdan to kayo komun a sanasawa na maliket a bilay.”

14Kinmerew si Raguel ed asawa to na malinis a papil a nilokut, ta pangisulatan toy kaletan na impankasal nen Tobias tan si Sara. Inyawat nen Edna imay papil a nilokut tan diman insulat nen Raguel so paknaan, ya ibabaga ton niiter si Sara ed kinen Tobias, onung na ibabagay Ganggan nen Moises.

15Kayariy sirimonya, dinmongo ran angan.

16Tinawag nen Raguel si asawa to tan inkuanto, “Iparaan mo may sakey a kuarto, tan paonlam dimay Sara.”

17Imparaan sirin nen Edna so katri, onung ed imbaga nen Raguel. Insan to inolup ya inloob si Sara ed kuarto. Ginmapon manakis si Sara, balet pinonasan nen Edna iray lua to tan inkuanto,

18“Ag ka mapaga, Sara. Amtak a say Katawan a walad tawen et andi-saew a paliketen to ka natan, ya aliwan panermenen. Manliket ka sirin, pinablin anak ko.” Insan la tinmaynan si Edna.