1Nilistan amin iray totoo ed Israel onung ed saray pamilya ra, tan nisulat ed Libron nipaakar ed saray Ararid Israel.
Nibantak ed Babilonia iray totood Juda lapud saray kasalanan da.
2Saray inmonan pinmawil ed saray kayaryan da a walad saray siudad et saray papari, saray Levita, tan saray managlingkur ed Timplo, tan saray karaklan ya Israelita.
3Linman nanayam ed Jerusalem iray totoon kabyangan na saray tribu di Juda, Benjamin, Efraim, tan Manases.
4-6Nanayam ed Jerusalem so anem a lasus tan siamaplon pamilya na tribu nen Juda.
Si Utai a lakin anak nen Amihud tan apo nen Omri so pangulo da ray kabyangay boleg nen Fares a lakin anak nen Juda. Di Imri tan Bani et kabyangan met ira na saray lalaki nen Utai.
Si Asaya so pangulo da ray kabyangay boleg nen Sela a lakin anak nen Juda. Sikato met so pangulo na pamilya to.
Si Jeuel so pangulo da ray kabyangay boleg nen Zera a lakin anak nen Juda.
7-8Nanayam ed Jerusalem iray onggendan a lalakin kabyangay tribu nen Benjamin:
Sallu ya anak nen Mesullam ya anak nen Hodavias ya anak nen Asenua.
Ibnias ya anak nen Jeroham
Ela ya anak nen Uzi tan apo nen Micri
Mesullam ya anak nen Sefatias ya anak nen Reuel ya anak nen Ibnia.
9Siam a lasus tan limamplo tan anem a pamilyad sayan tribu so manaayam diman. Pangulo na saray pamilya iray lalakin abitla.
Saray Paparin Nanayam ed Jerusalem10-12Nanayam ed Jerusalem iray onggendan a papari:
Jedaya, Joiarib, tan Jakin.
Azarias (say manonan opisyal ed Timplo) a lakin anak nen Helcias a saray arum a lalaki to di Mesullam, Sadoc, Meraiot, tan Ahitob
Adaya a lakin anak nen Jeroham tan saray arum a lalaki to a di Pasur tan Malkias
Masai a lakin anak nen Adiel tan saray arum a lalaki to di Jazera, Mesullam, Mesilemit, tan Imer
13Sanlibo tan piton lasus tan anemaplon amin iray paparin pangulo na saray pamilya. Marunong iran amin ed antokaman a kimey a nipaakar ed panaglingkur ed Timplo.
Saray Levitan Nanayam ed Jerusalem14-16Nanayam ed Jerusalem iray onggendan a Levita:
Semaya a lakin anak nen Hasub, tan saray arum a lalaki to a di Azricam tan Hasabias a kabyangay boleg nen Merari
Bacbakar, Heres, tan Galal
Matanias a lakin anak nen Mica tan saray arum a lalaki to a di Zicri tan Asaf
Obadias a lakin anak nen Semaya tan saray arum a lalaki to a di Galal tan Jedutun
Berekias a lakin anak nen Asa tan apo nen Elcana tan nanayam ed dalin a sakop na baley na Netofa
Saray Guardiad Timplo a Nanayam ed Jerusalem17Nanayam ed Jerusalem ira yay onggendan a guardiad Timplo: Sallum, Acub, Talmon, tan Ahiman. Si Sallum so pangulo ra.
18Manlapud saman a panaon saray kabyangay boleg da nipasen ira ed bokig na lolooban a tatawagey Puirtay Ari. Nen saman guardia ra ed saray puirta da ray kampo na saray Levita.
19Si Sallum a lakin anak nen Core tan apo nen Ebiasaf, pati saray kapara ton kabyangay boleg nen Core, so makaoley a mangguardia ed lolooban na Tuldan Ayamay Katawan; onya met so ginagawa na saray lalaki ra nen sikaray makaoley ed kampo na Katawan.
20Walay panaon a say pangulo ra et si Finees a lakin anak nen Eleazar—wala komun ed sikato so Katawan!
21Si Zacarias a lakin anak nen Meselemias so guardia met ed lolooban na Tuldan Ayamay Katawan.
22Duanlasus tan labinduan lalaki so apilin guardia ed saray lolooban tan diad saray puirta. Nilista ra onung ed saray barion nanaayaman da. Di Ari David tan propita Samuel iray angipasen ed saray lalaki ra ed sayan kimey lapud napanmatalkan ira.
23Sikara tan saray kabyangay boleg da intuloy day nangguardia ed saray puirta na Timplo.
24Kapag dapag na Timplo, diad baybay, abalaten, sagur, tan diad bokig walay puirta tan walay pangulon guardia.
25Sarayan guardia tinutulongan na saray kakanayon da a manaayam ed saray bario tan nansosoblayan ira a nambantay kapag pitoy agew.
26Levita ra may apatiran pangulon guardia tan ag iran balut nasublayan. Makaoley met ira ed saray kuartod dalem na Timplo tan saray kayamanan a karga ra.
27Nanaayam irad abay na Timplo, ta kanepegan dan bantayan so Timplo tan lokasan iray puirta to kapag kabwasan.
Saray Arum a Levita28Makaoley ed saray kagawaan ya ikakana ed panangigalang iray arum a Levita. Nepeg dan bilangen iray kagawaan no ipaway ira tan no isinup ira.
29Saray arum makaoley irad saray masanton kagawaan tan saray arina, alak, larak na oliba, insinso, tan rikado.
30Saray papari so makaoley ed panaglaok ed saray rikado.
31Sakey a Levita a manngaray Matatias, a sankapangulowanan a lakin anak nen Sallum tan kabyangan na boleg nen Core so makaoley ed panaggaway maimpis a tinapay a para bagat.
32Saray kabyangay boleg nen Core so makaoley ed panagparaan ed saray masanton tinapay a para Timplo kapag Agew na Panagpainawa.
33Saray pigaran Levitan pamilya so makaoley ed panagtogtog tan panagkanta ed Timplo. Nanaayam ed pigaran kuarto ed dalem na Timplo iray pangulo na sarayan pamilya tan anggapo lay arum a kimey da, lapud nayarin natawag iran mankanta o manogtog, agew may labi.
34Pangulo na saray Levitan pamilya iray lalakin abitla, onung ed saray boleg a nanlapwan da. Sikaray pangulon nanaayam ed Jerusalem.
Saray Lalaki tan saray Kabyangay Boleg nen Ari Saul(1 Awa. 8:29-38)35Inletneg nen Jeiel so siudad na Gabaon insan nanayam diman. Maaca so ngaran na asawa to.
36Abdon so ngaran na pangulowan ya anak to tan saray arum a lalakin anak to et di Zur, Cis, Baal, Ner, Nadab,
37Gedor, Ahio, Zacarias, tan Miclot
38ya ama nen Simea. Nanayam ed Jerusalem iray kabyangay boleg da diad kaabay na saray arum a pamilya na boleg da.
39Si Ner so ama nen Cis, tan si Cis so ama nen Saul. Apatiray lalakin anak nen Saul; di Jonatan, Melkisua, Abinadab, tan Esbaal.
40Si Jonatan so ama nen Meribbaal ya ama nen Mica.
41Apatiray lalakin anak nen Mica; di Piton, Melec, Tarea, tan Acaz.
42Si Acaz so ama nen Jara ya ama na taloran lalaki a sikara di Alemet, Azmavet, tan Zimri. Si Simri so ama nen Moza.
43Si Moza so ama nen Binea ya anak toy Refaya. Si Refaya so ama nen Elasa ya anak toy Azel.
44Anemiray lalakin anak nen Azel: di Azricam, Bocru, Ismael, Searias, Obadias, tan Hanan.
Who We AreWhat We EelieveWhat We Do
2025 by iamachristian.org,Inc All rights reserved.
