Sirac 27 - Pangasinan Meaning-Based Bible(MBBPAN83)

1Amayamay iray totoon nankasalanan legan dan manaanap na pakatuboan da; no labay moy onyaman nakaukolan a pepetan mo ray matam.

2Mairap ya ekalen so palpal a nipanek ed nanleetan na duaran baton a sakey ya abung; ontan met a mairap ya ekalen so panagsaol ed pansaliw tan panlako.

3Likud a matway itatakot mod Katawan, nakusbod sika so abung mo.

Ipapanengneng na Pananalita iray Tuan Liknaan

4Ipapanengneng na pananalita na too iray kasalanan to; singa yakayakan a mangibibiig na dotak.

5Say panagnunot mo et ipapanengneng toy ogalim, a singa say banga et ipapanengneng toy aderal no napopoolan ed palbaan.

6Nibagam no panoy inkaasikaso ed sakey a kiew diad panamegley na saray bunga to, tan nibagam iray liknaan na sakey a too diad panamegley na pananalita to.

7Ag mo nin balut idadayew so sakey a too kasakbayan mon narengel a mansalita; satan so tuan panagsubok.

Inkamatwa

8No salien moy magmaliw a matwa, nayarian mo tan naparakep mo niy ogalim, a singa say marakep a kawes et paabigen toy alagey mo.

9Saray manok mititipon irad saray kapara ran klasin manok, tan say ogalin inkamatwa nararapat da ray manasalin matwa.

10Mantatalaran so kasalanan ed saray manaanap na pankanawnawa ran mankasalanan, a singa panaalagar na lion ed nabwag ton ayep.

Tongtongan ya Andi-kakanaan

11No mansalita iray totoon matonung, walay kabaliksan lawas so sasalitaen da, balet susumlangen da lawas so sikaran dili iray makulang-kulang.

12No akapilimug kad saray totoon makulang-kulang, mambaraan ka lan ontaynan, balet no kalimug mo ray marunong a totoo, milimug kad sikara ed anggaay nayarian mo.

13Makapasakit na linawa iray istorian totongtongen na saray totoon makulang-kulang, tan manlulurey ira nipaakar ed saray sankaogsan a kasalanan.

14Makapabegas na bago so panangisamba na saratan a totoo. Pampepet na layag mo so nagawaan mo labat no igapo da lay mansasangsangan.

15Ansakit so pandengel ed sikaran mampapabaingan, tan nayarin mansumpal ed pateyan so pampapabaingan da.

Panangibawag na Iyaamut

16No ibagam ed arum iray bengatlan iyaamut a nibagad sika, dederalen moy panagmatalek na arum a totoo ed sika, et ag ka lan balut nawalaan na maasinger a kaaro.

17Igalang mo ray kakaarom, tan pansiamsiam so panagmatalek mod sikara. No pantraidoran moy panagmatalek na sakey a kaaro, lingwanan mo lalaingen a walay kaarom.

18Pinatey mo man a pankakaaro, a singa ka angalay ayora tan pinatey moy sakey a kalaban.

19Naandi lay kaarom. Ag mo la napapawil, a singa ag mo pakapapawil ed limam na manok ya imbolus mo.

20Ag ka la manaabalan ontombuk ed sikato. Naotit ka lan tuloy. Batik lan singa uson nablus ed patit.

21Nayarin berberen so sugat tan napirdona so panamabaing, balet no pantraidoran moy panagmatalek, anggapoy lay ilalo.

Pansimpisimpitan

22No mankindat ed sika so sakey a too, walay makapoy a kanunotan to, et anggapoy makapatonda ed panumpal na getma to.

23No kaibam, agaylay dakep na panagsalita to! Idayew toy balang salitan ibabagam. Balet sananey lan tongtongan no akabeneg ka la; ikana to ray imbabagam a panumlang ed sika.

24Anggapo lay bengatla diad mundo a mipara ed pambosul kod saman a klasiy too—et kabosul met na Dios.

25Mangitupak ka na bato a mapmaptek ed tagey, et ompawil ya ondapod olom. Mamekpek ka, et nasugat so anggan sika.

26Napapatitan iray totoo ed saray dilin patit da.

27Saray totoon mamapasakit na arum a totoo et napasakitan met na dilin gawgawa ra tan ag da amta no akin.

28Papabaingan na saray totoon mapaatagey iray arum a totoo tan luludlureyen da ra, balet walay manaalagar a singa lion na pankanawnawa ton ombawid sikara.

29Saray maliket a makanengneng na kapelag da ray totoon matonung et napelag irad patit tan nairapan irad ipatey da.

Panagpasnuk

30Makarimdimla so pasnuk tan say petang na olo, balet wala ra yan dua ed saray makasalanan.