1Anak, no manlingkur kad Katawan, paraanan mo ray panaon a nasubok ka.
2Magmaliw kan matwa tan mapeget ed pananumpal. Mandeen ka no onsabiy gunigon.
3Mansiansia ka ed Katawan; ag mon balut ikakaindan, et onaligwas ka ed kasamputan na saray agew mo.
4Awat mo so antokaman a nagawad sika. Mananos ka, anggan napaabeba ka.
5Nasusubok na apoy so balituk, tan nasusubok ed palbaan na pakapaabeba so ogali na too.
6Manmatalek kad Katawan, et tulongan to ka. Mankurang kan maptek ed linawa to, tan manilalo kad sikato.
7Amin yon walay takot ed Katawan, alagar yon ipanengneng tod sikayoy panangasi to. Ag kayo ontataynan ed sikato, ta no ontaynan kayo napelag kayo.
8Amin yon walay takot ed Katawan, manmatalek kayod sikato, et andisaew a natumagan kayo.
9Amin yon walay takot ed Katawan, bantag yo ray bindision to na panangasi tan andi-anggaan a liket.
10Nudnunot yo ray gendat a kailalakan tan motektek yo ya: Wala la kasiy toon manmamatalek ed Katawan ya inekalan to na ilalo? Wala la kasiy toon lawas papagalangan toy Katawan ya inkaindan to? Wala la kasiy toon nampikasid Katawan ya ag to inasasikaso?
11Mapangasi tan maabagey so Katawan; pipirdonaen to ray kasalanan tayo tan iyaarawi to tayod kaatapan no panaon na gunigon.
12Balet nadudusa iray totoon nanaandiy liknaan da—amin da ray makasalanan a sasalien day duaran kurang na bilay!
13Dusa so andi-saew ya onsabid saray nanaekalay biskeg na linawa; anggapoy pananisia ra, kanyan anggapoy mangyagel ed sikara.
14Dusa so andi-saew ya onsabid saray totoon nanaandiay ilalo. Antoy gawaen da no onsabiy Katawan a manintinsia ed sikara?
15Saray walay takot ed Katawan et ag da susumlangen iray ganggan to; saray mangaaro ed sikato mambilay ira onung na labay ton pambilay da.
16Gawaen na saray walay takot tan mangaarod Katawan so pamaliket ed sikato tan iyapasakey day bilang da ed Ganggan.
17Akaparaan lawas a manlingkur ed Katawan iray walay takot ed sikato. Mampapaabeba ra ed arap to, tan ikukuanda,
18“Ipapalima mid Katawan so pansumpalan na bilay mi; aliwan diad saray totoo no ag diad sikato, lapud singa kalaknab na katagyan to so panangasi to.”
Who We AreWhat We EelieveWhat We Do
2025 by iamachristian.org,Inc All rights reserved.
