1Insan nampikasi si Tobit:
“Idayew yoy andi-anggan a Dios,
idayew yo so manooley.
2Dudusaen to itayo; insan kakasian to itayo.
Ibabaki to itayod pasen a panaayaman da ray inaatey,
insan pababangonen to itayo manlapud lobuk.
Anggapoy makaliktar ed pakayari to.
3“Totood Israel, misalamat kayo diad pegley da ray bansa
ya angibantakan tod sikayo;
4anggan diman impanengneng toy baleg a pakayari to.
Iparengel yod amin a mambibilay so pangidadayew yo.
Say Katawan so Dios tan ama tayo ya anggad angga.
5“Anggaman a dinusa to kayo lapud kaogsan yo,
kasian tan pasempeten to kayo
manlapud saray bansan nikaykayatan yo.
6“Pawil kayod Dios,
diad intiron puso tan kamarerwa yo,
mambilay kayon matoor ed sikato.
Insan onlingaw ya ontulong ed sikayo
tan ag to la iyamut so sikaton dili.
Nunot yo no antoy ginawa na Dios para sikayo
tan misalamat kayo diad intiron puso yo.
Idayew yo so matonung a Katawan;
pagalangan yo so andi-anggaan ya ari.
“Anggaman a manaayam ak ed dalin a nibantakan ko,
misalamat ak ed Katawan
tan ipaamtak ed bansa na saray makasalanan so biskeg na pakapanyari to.
‘Benegan yo ray kasalanan yo,
tan gawa yoy makapaliket ed Dios!
Angangko sibegan to kayo
tan kasian to kayo.’
7“Idadayew ko so Dios ko tan manliliket ak ed inkatalonggaring to;
igagalang na kamarerwak so Ari na tawen.
8Ibawag komun na balang sakey so inkatalonggaring to
tan kantaen da ray dayew to diad Jerusalem.
9“Jerusalem, Masanton Siudad na Dios mi,
dusaen kay Dios lapud saray kasalanan da ray totoom,
balet kasian to ray maptek so gagawaen da.
10Kanyan misalamat kad Katawan, ta sikato et maung.
Idayew mo so andi-anggaan ya ari.
Nipaalagey lamet so Timplom,
tan manliket lamet iray totoom.
“Paliketan komun na Katawan iray amin a totoom a nibantak ed saray arum a bansa;
asikasoen to komun iray maniirap a totoom
legan ya ondadalan so panaon.
11“Jerusalem, onsinag a maliwliwawa so silew mo ed intiron mundo,
tan onlad sika iray arawin bansa.
Saray totoo ra et onla rad sika a mangigalang ed
Katawan a Dios mo;
mangawit ira na saray rigalon para Ari na Tawen.
Diad saray daladalan mo mankanta iray amayamay a kailalakan na magayagan panangidayew;
say ngaran mo et anggad anggan mansiansia a pinili na Dios a siudad.
12Nisamba ya amin iray manataktakot ed sika,
amin da ray mandederal ed sika tan mangigegeba na saray padir mo,
amin da ray mangigegeba na saray torim tan saray abung mo.
Balet nabindisionan ya anggad angga iray mangigagalang ed sika.
13“Manggayaga ka, O Jerusalem, lapud saray matonung a totoom;
natipon ira manlapud saray arum a bansan nibantakan da
a mangigalang ed Katawan na amin a panaon.
14“Maliket ya amin iray totoon mangaarod sika,
tan saray maliket a makanenengneng ed iyaaligwas mo.
Saray maneermen lapud saray kairapan mo natan
et onsabiy agew na panliket da;
pagayagaen iran anggad angga na liket mo.
15“Idadayew koy Katawan, say matalonggaring ya Ari;
16nipaalagey lamet so Jerusalem,
tan sikatoy panayamam to ya anggad angga.
“Jerusalem, agaylay panliket ko
no nanengneng na saray kabyangay boleg ko so karlangan mo
tan misalamat irad Ari na Tawen.
“Nagawad saray safiro tan ismiralda iray puirtam,
tan nagawad saray mablin bato iray padir mo.
Nagawad balituk iray torim,
tan nagawad puron balituk iray tirinsira ra.
17Natapewan iray dalan mo na saray rubi tan saray mablin alahas.
18Manlapud saray puirtam, narengel iray magayagan kanta;
tan manlapud saray kaabungan mo, ibelyaw na saray totoo,
‘Idayew yoy Katawan! Idayew yoy Dios na Israel!’
“Jerusalem, bindisionan na Dios iray totoom
tan idayew da ya ando lan ando so masanton ngaran to.”
Sarayan salita so impanamput nen Tobit ed kanta ton panangidayew.
Who We AreWhat We EelieveWhat We Do
2025 by iamachristian.org,Inc All rights reserved.
